ក្រុងគៀវ មានបំណង សុំឲ្យកោះប្រជុំជាបន្ទាន់ ក្រុមប្រឹក្សាសន្តិសុខ អ.ស.ប.
ក្រុងគៀវកំពុងសិក្សាបញ្ហា កោះប្រជុំជាបន្ទាន់ ក្រុមប្រឹក្សាសន្តិសុខ អ.ស.ប. ប្រសិនបើភាពតានតឹងនៅតែបន្តទៅ ក្រោយពីម៉ូស្គូ ល្ងាចថ្ងៃ១០សីហាម្សិលមិញ បានចោទ អាជ្ញាធរអ៊ុយក្រែនថា ជាអ្នកចាត់ចែង ឲ្យមានការប៉ុនប៉ងប្រព្រឹត្តអំពើភេរវកម្មនៅលើទឹកដីគ្រីមេ- សេចក្តីនេះ ថ្លែងល្ងាចនោះឯង ដោយតំណាងអចិន្ត្រៃយ៍របស់អ៊ុយក្រែន ប្រចាំនៅ អ.ស.ប.។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
តាមសំដី តំណាងអចិន្ត្រៃយ៍របស់អ៊ុយក្រែន ប្រចាំនៅ អ.ស.ប. លោកអគ្គរដ្ឋទូត Volodymyr Yelchenko ៖ យើងត្រៀមជានិច្ច ចំពោះអំពើបង្កហេតុថ្មីៗពីខាងរុស្ស៊ី។ យើងចិញ្ចឹមទុក គម្រោងកោះប្រជុំនេះ ហើយបើស្ថានការណ៍តានតឹងហួសកម្រិតនោះ យើងនឹងសុំឲ្យ កោះប្រជុំភ្លាម ក្រុមប្រឹក្សាសន្តិសុខ អ.ស.ប.។
អ៊ុយក្រែន បានក្លាយជាសមាជិកមិនអចិន្ត្រៃយ៍ របស់ក្រុមប្រឹក្សាសន្តិសុខអ.ស.ប. គឺ កាលពីខែមករាឆ្នាំនេះ ហើយមានសិទ្ធិកោះប្រជុំជាបន្ទាន់ក្រុមប្រឹក្សានេះ បើខ្លួនយល់ថាបញ្ហាណាមួយ ស្រាប់តែ ពាំនាំជាគ្រោះថ្នាក់ដល់សន្តិភាពនិងសន្តិសុខអន្តរជាតិ។ ក្នុងរយៈពេលនេះ អ៊ុយក្រែន បានកោះប្រជុំ ក្រុមប្រឹក្សានេះតែមួយលើកគត់ ឧទ្ទិសដល់វិបត្តិក្នុងប្រទេសខ្លួន ដោយសុំឲ្យ អ.ស.ប. ពង្រាយទ័ពមួកខៀវ ខាងរក្សាសន្តិភាព នៅតំបន់បះបោរខាងកើតអ៊ុយក្រែន ប៉ុន្តែរហូតមកទល់ឥឡូវ សំណើនេះរបស់អ៊ុយក្រែន នៅកកស្ទះដោយមកពីមានការជំទាស់ ពីខាងរុស្ស៊ី ដែលបំពាក់ទៅដោយសិទ្ធិវេតូ ក្នុងឋានៈជាសមាជិកអចិន្ត្រៃយ៍របស់ក្រុមប្រឹក្សា សន្តិសុខអ.ស.ប. ។
គឺថ្ងៃ១០សីហា ដែលស្ថាប័នសន្តិសុខជាតិរុស្ស៊ី FSB បានប្រកាសថា ចាប់បាន ពួកវិច្ឆេតករ អ៊ុយក្រែន ដែលបញ្ជូនដោយអាជ្ញាធរក្រុងគៀវ ឲ្យទៅប្រព្រឹត្តអំពើភេរវកម្ម នៅលើទឹកដីគ្រីមេ ទឹកដី ដែលម៉ូស្គូចាត់ទុកជា ដែនដីសហព័ន្ធរុស្ស៊ី តាំងពីខែមិនាឆ្នាំ២០១៤មក។ ទូរទស្សន៍រុស្ស៊ី ថែមទាំងបានបង្ហាញឲ្យឃើញទាំងអាវុធ ទាំងគ្រឿងផ្ទុះ មានម៉ាកវា សរសេរជាភាសាអ៊ុយក្រែន ទៅផង ព្រមទាំងសម្លេងសារភាព នៃពួកជនដែលត្រូវបានចាប់ខ្លួននោះ។
ម៉្លោះហើយបានជា លោកប្រធានាធិបតីរុស្ស៊ី ពូទីន ក្នុងថ្ងៃនោះតែម្តង បានប្រតិកម្មដោយឆេះដុំ ហើយចោទក្រុងគៀវត្រង់ៗ ដែលមិនធ្លាប់មានទេពីមុនៗថាជាអ្នកចាត់ចែងអំពើភេរវកម្មនៅលើ ទឹកដីរុស្ស៊ី ដែលជាជម្រើសថ្មីរបស់អ៊ុយក្រែន សម្រាប់ដោះស្រាយជម្លោះ។ ដោយហេតុថា ក្នុង ប្រតិបត្តិការទប់ស្កាត់អំពើភេរវកម្មនោះ មានយោធារុស្ស៊ីពីរនាក់បានធ្លាក់ខ្លួនស្លាប់ បានជាគាត់ ព្រមានថា វិធានការបកវិញយ៉ាងមធ្យ័ត ពីខាងរុស្ស៊ី នឹងកើតមានចៀសមិនផុតទេ។
ចំណែកលោកប្រធានាធិបតីអ៊ុយក្រែន ប៉ូរ៉ូឆេនកូ បានច្រានចោល ការចោទប្រកាន់របស់ លោកពូទីន ដោយចាត់ទុកការចោទប្រកាន់នេះ ថាជា “គំនិតរវើរវាយមិនចេះខ្មាស និងថា គឺ រុស្ស៊ីខ្លួនឯងទេតើ ជាប្រទេសភេរវនិយម តាមរយៈសកម្មភាពខ្លួន នៅគ្រីមេ និង នៅ តំបន់ បះបោរខាងកើតអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ