ចិនពង្រឹងចំណងយោធាជាមួយស៊ីរី រុស្ស៊ីសម្រុកវាយពួកជីហាតពីអ៊ីរ៉ង់
រុស្ស៊ីកំពុងបោះជំហានទៅមុខមួយដំណាក់ទៀត ក្នុងយុទ្ធនាការយោធាគាំទ្ររបបក្រុងដាម៉ាស។ នៅថ្ងៃអង្គារនេះ ជាលើកទីមួយ យន្តហោះរុស្ស៊ី បើកចេញពីទឹកដីអ៊ីរ៉ង់ បានសម្រុកវាយប្រហារលើពួកជីហាតអង្គការរដ្ឋអ៊ីស្លាមនៅស៊ីរី។ ក្នុងពេលជាមួយគ្នានេះដែរ សម្ព័ន្ធមិត្តមួយទៀតរបស់ក្រុងដាម៉ាស គឺចិន ក៏បានប្រកាសរឹតចំណងសម្ព័ន្ធភាពយោធាបន្ថែមទៀតជាមួយស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
“យោធាចិននិងស៊ីរីធ្លាប់មានប្រវត្តិជាមិត្តនឹងគ្នា ដូច្នេះទើបយោធាចិនចង់បន្តពង្រឹងការផ្តោះប្តូរ និងកិច្ចសហប្រតិបត្តការជាមួយយោធាស៊ីរី ឱ្យបានកាន់តែរឹងមាំថែមទៀត។ នេះជាសេចក្តីប្រកាសរបស់នាយកការិយាល័យកិច្ចសហប្រតិបត្តិការអន្តរជាតិចិន ដែលបានជួបពិភាក្សាជាមួយរដ្ឋមន្ត្រីក្រសួងការពារជាតិស៊ីរី។
មេដឹកនាំទាំងពីររូប បានលើកអំពីការបំពាក់បំប៉នបុគ្គលិកយោធា និងបានត្រូវរ៉ូវគ្នាឱ្យយោធាចិនជួយផ្គត់ផ្គង់ជំនួយមនុស្សធម៌។
តាំងពីវិបត្តិនៅដើមនិងមជ្ឈិមបូព៌ាបានផ្ទុះឡើង ចិនបានប្រកាន់យកយុទ្ធសាស្ត្រមួយ គឺដកខ្លួនឱ្យនៅឆ្ងាយ ទុកភារៈឱ្យសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិជាអ្នកសម្រេច និងបញ្ចេញមតិយោបល់បន្តិចបន្តួច ក្នុងជំហរដោះស្រាយដោយសន្តិវិធី។ ប៉ុន្តែបើទោះបីចិនមើលមិនឃើញប្រយោជន៍ពីការចូលរួមធ្វើប្រតិបត្តិការយោធាដោយផ្ទាល់នៅស៊ីរីក៏ដោយ ក៏ប៉េកាំងនៅបានសម្តែងការស្វាគមន៍ តួនាទីយោធារបស់រុស្ស៊ី នៅក្នុងស៊ីរីជានិច្ច។
រុស្ស៊ីដែលបានបង្កើនប្រតិបត្តិការផ្លូវអាកាសកាន់ខ្លាំងឡើងដើម្បីជួយរបបក្រុងដាម៉ាស កម្ចាត់ពួកបះបោរឧទ្ទាម និងពួកអង្គការរដ្ឋអ៊ីស្លាម ដោយថែមទាំងបានចាប់ដៃសហការជាមួយអ៊ីរ៉ង់ក្នុងក្របខ័ណ្ឌប្រយុទ្ធប្រឆាំងភេរវនិយមទៀត។ ជាក់ស្តែង និងជាលើកទីមួយ នៅថ្ងៃអង្គារនេះ រុស្ស៊ីបានបើកការវាយប្រហារលើទីតាំងស្តុកអាវុធនិងគ្រាប់ធំៗចំនួន៥កន្លែង ទីបញ្ជាការយោធាបីកន្លែងរបស់ពួកជីហាតនៅស៊ីរី ដោយប្រើយន្តហោះហោះចេញពីមូលដ្ឋានទ័ពប្រទេសអ៊ីរ៉ង់។ ជាយុទ្ធសាស្ត្របាចគ្រាប់ ព្រោះការប្រើលេនដ្ឋានអ៊ីរ៉ង់ អនុញ្ញាតឱ្យយន្តហោះរុស្ស៊ីចាយផ្លូវខ្លី អាចដឹកនិងទម្លាក់គ្រាប់បានកាន់តែច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ