លីបង់៖ប្រមុខចលនាហេស្បូឡាអំពាវនាវពួកជីហាតនៅស៊ីរីឲ្យឈប់ច្បាំង និងទម្លាក់អាវុធ
ចុះផ្សាយនៅថ្ងៃ៖
ស្តាប់ - ០៥:៤០
នៅថ្ងៃសៅរ៍ ទី១៣ សីហា ប្រមុខចលនាហេស្បូឡាលីបង់លោកហាសាន ណាស្រាឡាបានអំពាវនាវដល់ពួកជ្រុលនិយមស៊ុយនីតនៅក្នុងប្រទេសស៊ីរីឲ្យឈប់ច្បាំង និងទម្លាក់អាវុធចុះ។ ការអំពាវនាវរបស់លោកណាស្រាឡាបានធ្វើឡើងនៅក្នុងឱកាសខួបគម្រប់ ១០ឆ្នាំនៃសង្រ្គាមរវាងចលនាហេស្បូឡាលីបង់ និងអ៊ីស្រាអែលកាលពីឆ្នាំ ២០០៦។ សូមជម្រាបជូនថាតាំងពីស៊ីរីធ្លាក់ក្នុងវិបត្តិនយោបាយ មក ចលនាមួយនេះបានចេញមុខគាំទ្ររដ្ឋាភិបាលស៊ីរីរបស់លោកប្រធានាធិបតីអាសាដ និងបានប្រកាន់ជំហរម៉ឹងម៉ាត់ប្រឆាំងនឹងពួកជ្រុលនិយមស៊ុយនីត។
ការថ្លែងអំពាវនាវរបស់ប្រមុខចលនាហេស្បូឡាលីបង់ជារឿងភ្ញាក់ផ្អើល និងមិនធ្លាប់បានឮនាពេលកន្លងមក ពិសេសតាំងពីស៊ីរីបានធ្លាក់ក្នុងវិបត្តិនយោបាយហែកហួរគ្នាក្នុងឆ្នាំ ២០១១។ តាំងពីឆ្នាំ ២០១៣ ចលនាហេស្បូឡាលីបង់បានបញ្ជូនកម្លាំងប្រដាប់អាវុធរបស់ខ្លួនជាច្រើនពាន់នាក់ទៅកាន់ប្រទេសស៊ីរីក្រោមហេតុផលថា ដើម្បីការពារស៊ីរីកុំឲ្យធ្លាក់ក្នុងកណ្តាប់ដៃអង្គការរដ្ឋអ៊ីស្លាម និងរណសិរ្យអាល់ ណូស្រា។ មេចលនាហេស្បូឡាធ្លាប់បានបញ្ជាក់ជាច្រើនដងថា បើស៊ីរីធ្លាក់ក្នុងកណ្តាប់ដៃអង្គការរដ្ឋអ៊ីស្លាម ឬរណសិរ្យអាល់ ណូស្រា គឺជារឿងមួយគ្រោះថ្នាក់ខ្លាំងណាស់សម្រាប់ប្រទេសលីបង់ និងពិភពលោក។
តែគឺពួកប្រឆាំងនឹងរដ្ឋាភិបាលស៊ីរីរបស់លោកប្រធានាធិបតីអាសាដឯណោះទេដែលកំពុងទទួលរងការវាយប្រហារពីពួកយុទ្ធជនហេស្បូឡាលីបង់ដោយមានការសហការណ៍ពីសម្ព័ន្ធមិត្តអ៊ីរ៉ង់ដែលជាក្រុមឈីអ៊ីតដូចហេស្បូឡា រួមទាំងកម្លាំងទ័ពអាកាសរបស់រុស្ស៊ី។ មេចលនាហេស្បូឡាលីបង់រូបនេះដដែលក៏ធ្លាប់បានបញ្ជាក់ដែរថា យុទ្ធជនហេស្បូឡានឹងបន្តស្ថិតក្នុងប្រទេសស៊ីរីដើម្បីជួយលោកអាសាដឲ្យទទួលបានជោគជ័យលើក្រុមបះបោរ។ គឺដោយមានការគាំទ្រពីចលនាហេស្បូឡាលីបង់ និងសម្ព័ន្ធមិត្តមួយចំនួន ពិសេសគឺអ៊ីរ៉ង់ដែលបានធ្វើឲ្យកម្លាំងរបស់លោកអាសាដមានប្រៀបជាងលើក្រុមប្រឆាំងនៅលើសមរភូមិ។
លោកណាស្រាឡា៖អ៊ីស្រាអែល និងអាមេរិកប្រើដៃពួកជ្រុលនិយមដើម្បីប្រយោជន៍ខ្លួន
ក្រៅពីអំពាវនាវឲ្យពួកជីហាតស៊ុយនីតឈប់ច្បាំង និងទម្លាក់អាវុធចុះ លោកណាស្រាឡាក៏បានលើកឡើងពីលទ្ធភាពក្នុងការផ្សះផ្សា និងការសម្រុះសម្រួលដែរ។ ការថ្លែងរបស់ប្រមុខចលនាហេស្បូឡាលីបង់ពេលនេះបានធ្វើឡើង នាឱកាសខួបគម្រប់ ១០ឆ្នាំនៃសង្រ្គាមរវាងចលនាហេស្បូឡាលីបង់ និងប្រទេសអ៊ីស្រាអែលកាលពីឆ្នាំ ២០០៦។ សង្រ្គាមដែលមានរយៈពេលដល់ទៅ ៣៣ថ្ងៃ និងដែលចលនាហេស្បូឡាលីបង់បានតស៊ូទ្រាំទ្រទល់នឹងកម្លាំងអ៊ីស្រាអែលដែលមានប្រៀបខ្លាំង។
យោងតាមលោកណាស្រាឡា អ៊ីស្រាអែលដែលជាអ្នកចាញ់សង្រ្គាមកាលពី ១០ឆ្នាំមុន រួមជាមួយសម្ព័ន្ធមិត្តអាមេរិកបានប្រើដៃពួកជ្រុលនិយមស៊ុយនីតដើម្បីកម្ទេចចលនាហេស្បូឡាលីបង់ ប្រទេសស៊ីរី និងប្រទេសអ៊ីរ៉ង់។ លោកណាស្រាឡាយល់ឃើញថា អ៊ីស្រាអែល និងអាមេរិកជាអ្នកអុជអាលឲ្យនិកាយស៊ុយនីត និងនិកាយឈីអ៊ីតកាប់ចាក់គ្នាក្នុងគោលដៅបំផ្លាញហេស្បូឡា ស៊ីរី និងអ៊ីរ៉ង់។
សម្រាប់ប្រមុខចលនាហេស្បូឡាលីបង់ ការតស៊ូរបស់ពួកជ្រុលនិយមស៊ុយនីតនៅក្នុងប្រទេសស៊ីរីជាល្បែងរៀបចំដោយអ៊ីស្រាអែល និងអាមេរិក ព្រមទាំងកំពុងបម្រើផលប្រយោជន៍ឲ្យមហាអំណាចទាំងពីរនេះ។ នៅក្នុងន័យនេះ លោកណាស្រាឡាបានលើកឡើងពីការផ្សះផ្សា និងការសម្រុះសម្រួលជាមួយពួកជ្រុលនិយមស៊ុយនីត តែមិនបានលំអិតអ្វីបន្ថែមពីវិធានការផ្សះផ្សា និងសម្រុះសម្រួលនោះទេ។
ស្ថានការណ៍កំពុងឡើងតានតឹងខ្លាំងនៅទីក្រុងអាឡិប
ពួកជ្រុលនិយមស៊ុយនីតនៅស៊ីរីនៅមិនទាន់បានឆ្លើយតបយ៉ាងណាចំពោះការអំពាវនាវរបស់ប្រមុខចលនាហេស្បូឡាលីបង់ពេលនេះទេ។ តែបើតាមមើលទៅ ការអំពាវនាវរបស់លោកណាស្រាឡាជារឿងមួយដែលពួកជ្រុលនិយមពិបាកទទួលយក ព្រោះវាបានកើតមានឡើងនៅក្នុងកាលៈទេសៈមួយដែលហាក់ដូចជាយឺតពេលបន្តិច។ ម្យ៉ាងទៀត ការអំពាវនាវរបស់មេចលនាហេស្បូឡាលីបង់បានធ្វើឡើង ក្នុងពេលដែលគ្រប់ភាគីជម្លោះនៅស៊ីរីកំពុងត្រៀមកម្លាំងដើម្បីវាយដណ្តើមយកទីក្រុងអាឡិបដែលជាទីតាំងយុទ្ធសាស្រ្តមួយដ៏សំខាន់។
នៅក្នុងសង្រ្គាមវាយដណ្តើមយកទីក្រុងអាឡិបនេះ ក្រុមប្រឆាំង និងកម្លាំងរដ្ឋាភិបាលស៊ីរីកំពុងកែនប្រមូលកម្លាំងមនុស្ស និងត្រៀមសម្ភារៈសឹកគ្រប់បែបយ៉ាង។ ដូច្នេះសម្រាប់ក្រុមឧទ្ទាម រួមជាមួយក្រុមជ្រុលនិយមផ្សេងទៀតហាក់ដូចពិបាកដកខ្លួនថយ ហើយនៅខាងកម្លាំងរដ្ឋាភិបាលស៊ីរីដែលមានក្រុមយុទ្ធជនហេស្បូឡាស្ថិតលើសមរភូមិជួរមុខស្រាប់ក៏ពិបាកនឹងនិយាយជំនះលើក្រុមប្រឆាំងដែរ។ ទន្ទឹមគ្នានេះ កម្លាំងប្រឆាំង រួមនឹងកម្លាំងជ្រុលនិយមផ្សេងហាក់ដូចជាមានប្រៀបជាងកម្លាំងរដ្ឋាភិបាលស៊ីរី។
នៅក្នុងន័យនេះ មេចលនាហេស្បូឡាលីបង់បានដឹងច្បាស់ណាស់ និងគ្មានជម្រើសអ្វីក្រៅពីបន្តចូលប្រឡូកក្នុងសមរភូមិទន្ទឹមគ្នានឹងការអំពាវនាវឲ្យគូប្រឆាំងទម្លាក់អាវុធ។ សង្រ្គាមវាយដណ្តើមទីក្រុងអាឡិបដែលត្រូវបានគេមើលឃើញទុកជាមុនថា នឹងមានរយៈពេលវែង និងមានការបង្ហូរឈាមគ្នាដោយចៀសមិនរួច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ