រុស្ស៊ីបញ្ជូនមីស៊ីល Iskander ទៅប្រចាំការបន្ថែមទៀតនៅខេត្តខាងលិចរបស់ខ្លួន
រសៀលថ្ងៃ៨តុលាម្សិលមិញ ក្រសួងការពារជាតិរុស្ស៊ីបានថ្លែងបញ្ជាក់ពីការបញ្ជូនប្រព័ន្ធមីស៊ីលធុន Iskander-M ទៅប្រចាំការបន្ថែមទៀតនៅលើដែនដីខេត្ត Kaliningrad ជាខេត្តនៅប៉ែកខាងលិចបង្អស់នៃសហព័ន្ធរុស្ស៊ីនៅជាប់នឹងព្រំដែនប៉ូឡូញ និងលីទុយអានី។ ក្រសួងយោធារុស្ស៊ីគូសបញ្ជាក់ថា បញ្ជូនទៅនេះ គឺក្នុងក្របខ័ណ្ឌនៃលំហាត់សឹក។
ចុះផ្សាយនៅថ្ងៃ៖ កែប្រែថ្ងៃទី៖
មូលហេតុនៃការបញ្ជាក់នេះ មកពីមួយថ្ងៃមុន ប្រព័ន្ធផ្សព្វផ្សាយខាងលិចខ្លះមាន Reuters និងកាសែតអង់គ្លេស The Guardian យោងទៅលើប្រភពអេស្តូនីនាំគ្នាផ្សាយថា មីស៊ីលធុន Iskander-M ដឹកទៅនោះគឺតាមកប៉ាល់ចេញពីផែក្រុង Siant-Petersbourg ទៅ។ ម៉្លោះហើយបានជារសៀលម្សិលមិញ ដោយថ្លែងទៅពូកអ្នកកាសែត តំណាងផ្លូវការនៃក្រសួងការពារជាតិរុស្ស៊ី លោកឧត្តមសេនីយទោ Igor Konashenkovលម្អិតថា កងទ័ពរុស្ស៊ីដែលធ្លាប់បានបញ្ជូនមីស៊ីលបែបនេះ មិនតិចដងទេ ទៅកាន់តំបន់ Kaliningrad នឹងបន្តបញ្ជូនវាតទៅទៀតទាំងក្នុងអនាគត សមទៅតាមតម្រូវការសម្រាប់ធ្វើលំហាត់សឹក។
គាត់រំលឹកថា Iskander-M ជាមីស៊ីលចល័តហើយក្នុងក្របខ័ណ្ឌនៃផែនការខាងត្រៀមប្រយុទ្ធអង្គភាពទ័ពមីស៊ីល ២៤ម៉ោងលើ២៤ម៉ោង តែងបោះពួយឆ្លងកាត់លំហល្ហល្ហេវនៃសហព័ន្ធរុស្ស៊ី ទាំងតាមផ្លូវអាកាស ទាំងតាមផ្លូវទឹក និងទាំងតាមផ្លូវគោកដោយវិធីខ្លួនឯង។ ឧត្តមសេនីយ៍តំណាងឲ្យក្រសួងការពារជាតិរុស្ស៊ីថែមទាំងបង្ហើបឲ្យដឹងពីចំណុចរសើបមួយទៅផង គឺថា ការដឹកមីស៊ីល Iskander លើកនេះត្រូវរុស្ស៊ីធ្វើដោយចំហដោយចេតនា គឺបញ្ចេញរូបរាងវាយ៉ាងសំញែងនៅលើកប៉ាល់ឈ្មោះ Ambal ដែលដឹកវា គ្រាន់ជានុយទាក់ភ្នែក ផ្កាយរណបអាមេរិកាំង ហើយមិនយូរប៉ុន្មាន ក៏មានផ្កាយរណបឈ្លបការណ៍អាមេរិកាំងហោះកាត់ពីលើថតមីស៊ីលនោះមែន ហេតុដែលអនុញ្ញាតឲ្យភាគីរុស្ស៊ីបរិហារអាក្រាតប្រតិបត្តិការបំពេញដោយផ្កាយរណបអាមេរិកាំង រួចកំណត់បានយ៉ាងទៀងទាត់អំពីកម្ពស់ហោះ និងផ្លូវហោះរបស់វានៅពីលើដែនដីរុស្ស៊ី។
ពិតជាយោងលើទិន្នន័យផ្តល់ដោយផ្កាយរណបខ្លួនដែលបណ្តាញឈ្លបការណ៍អាមេរិកាំងថ្ងៃសុក្រម្សិលម៉្ងៃ ទម្លាយដំណឹងថា រុស្ស៊ីចាប់ផ្តើមដឹកមីស៊ីល Iskander ទៅកាន់ខេត្ត Kaliningrad ។ ម៉ូស្គូធ្លាប់បានឲ្យដឹងថា មីស៊ីលនេះអាចជាប្រតិកម្មទល់នឹងបក្សសម្ព័ន្ធអូតង់ដែលនៅតែបន្តដំឡើងខែលមីស៊ីលប្រឆាំងមីស៊ីលនៅលើដែនដីប៉ូឡូញ ខែលដែលរុស្ស៊ីចាត់ទុកជាគ្រោះថ្នាក់ឥតប្រកែកបានដល់សន្តិសុខជាតិខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ