យន្តហោះMH៣៧០ ទំនងជាធ្លាក់បាត់ នៅកន្លែងផ្សេង ក្រៅតំបន់រុករក
ជាដំណឹងដ៏គួរឱ្យខកចិត្តម្តងហើយ ! នៅថ្ងៃអង្គារនេះ ភ្នាក់ងារអូស្ត្រាលីបានចេញរបាយការណ៍ផ្លូវការសន្និដ្ឋានថា ខ្មោចយន្តហោះMH៣៧០ របស់ក្រុមហ៊ុនអាកាសចរណ៍ម៉ាឡេស៊ី ធ្លាក់បាត់កាលពីថ្ងៃទី ៨ មីនា ឆ្នាំ២០១៤ ទំនងជាមិនស្ថិតនៅក្នុងរុករក សព្វថ្ងៃនេះទេ ! អូស្ត្រាលី ជាសម្របសម្រួលការរុករកខ្មោចយន្តហោះ ដែលមានផ្ទុកអ្នកដំណើរ២៣៩នាក់ នៅក្នុងមហាសមុទ្ទឥណ្ឌា។
ចុះផ្សាយនៅថ្ងៃ៖
ការបាត់យន្តហោះMH៣៧០ ជាហេតុការណ៍ដ៏ចម្លែកបំផុតមួយ នៃប្រវត្តិអាកាសចរណ៍ស៊ីវិលពិភពលោក។ ស្វែងរកពីរឆ្នាំហើយ និងបើទោះបីរើសបានបំណែកជាង២០ដុំ នៅតាមឆ្នេរខាងត្បូងនៃមហាសមុទ្ទឥណ្ឌា ក៏នៅគ្មានរកឃើញសញ្ញាអ្វីបញ្ជាក់អំពីវត្តមានខ្មោចយន្តហោះថានៅទីណាទៀត !
ក្រោយពីបានរុករកស្ទើរសព្វ ក្នុងតំបន់ទំហំ១២ម៉ឺនគីឡូម៉ែត្រការ៉េ ក្រុមអ្នកឯកទេសអូស្ត្រាលីនិងបរទេស បានបើកប្រជុំ បូកសរុបការងារ កាលពីខែមុន និងបានចេញសេចក្តីសន្និដ្ឋាន នៅថ្ងៃនេះថា « ខ្មោចយន្តហោះម៉ាឡេស៊ី ទំនងជាមិនស្ថិតនៅក្នុងតំបន់ដែលនាវាមុជទឹកកំពុងរុករកទេ។ លទ្ធផលនៃគំនូសបំព្រួញ បានមកពីការអណ្តែតបំណែកយន្តហោះ ហាក់ដូចជាចង្អុលកាន់ច្បាស់ថាយន្តហោះ MH៣៧០ ប្រហែលជាបានធ្លាក់នៅប៉ែកខាងជើង កន្លែងរុករកសព្វថ្ងៃ។ នេះបើតាមរបាយការណ៍ដដែល។
តាមរយៈលទ្ធផលវិភាគលើកនេះ ប្រសិនបើត្រូវធ្វើបន្ត ការរុករកនឹងត្រូវធ្វើក្នុងតំបន់ថ្មី ២៥០០០គីឡូម៉ែត្រការ៉េ។ ប៉ុន្តែ អូស្រ្តាលី ម៉ាឡេស៊ី និងចិន ដែលមានជនរងគ្រោះច្រើនជាងគេ តែងតែអះអាងជាញយថា នឹងបញ្ឈប់ការស្រាវជ្រាវ នៅពេលណារកសព្វក្នុងតំបន់ ១២ម៉ឺនគីឡូម៉ែត្រហើយ នៅតែមិនឃើញទៀត។
ការកំណត់រកក្នុងតំបន់១២ម៉ឺនគីឡូមែត្រការ៉េនេះ ដោយមកពីអ្នកជំនាញផ្អែកលើសម្មតិកម្មថា យន្តហោះគ្មានអ្នកបញ្ជា និងអស់សាំង។ តែគ្មាននរណាដឹងសោះថាហេតុអ្វីបានជាយន្តហោះដែលធ្វើដំណើរចេញពីក្រុងកូឡាឡាំពួរ ទៅប៉េកាំង បែរត្រលប់មកនៅអឌ្ឍគោលខាងត្បូង បញ្ច្រាសទិសដៅទៅវិញ។
មានការបំប៉ោងព័ត៌មានច្រើនជុំវិញ ការខូចយន្តហោះ ផ្នែកមេកានិក ផ្នែករចនាសម្ព័ន្ធ ការចាំជាចំណាប់ខ្មាំង ការធ្វើភេរវកម្ម តែមិនដឹងថាសេណារីយោមួយណាត្រូវទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ