បូអ៊ីងជើងហោះហើរMH៣៧០បានធ្លាក់ក្នុងសមុទ្រ ក្នុងល្បឿនរាប់រយគីឡូម៉ែត្រក្នុងមួយម៉ោង
យោងតាមការសិក្សាមួយ ចុះផ្សាយថ្ងៃអង្គារនេះ យន្តហោះបូអ៊ីង៧៧៧ជើងហោះហើរ MH៣៧០ របស់ក្រុមហ៊ុនម៉ាឡេស៊ី ដែលបានបាត់ខ្លួនជាង២ឆ្នាំហើយនោះ បានធ្លាក់ចុះទៅក្នុងទឹកសមុទ្រ ក្នុងល្បឿនលឿន រាប់រយគីឡូម៉ែត្រក្នុងមួយម៉ោង។ ថ្មីៗនេះដែរ មន្ត្រីម៉ាឡេស៊ីប្រាប់ថា អ្នកបើកយន្តហោះធ្លាប់ហាត់សមជាមួយម៉ាស៊ីន លើផ្លូវហោះហើរមួយ ឆ្ពោះទៅសមុទ្រឥណ្ឌា នៅកន្លែងដែលយន្តហោះអាចបាត់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
យន្តហោះបូអ៊ីង៧៧៧ជើងហោះហើរ MH៣៧០ របស់ក្រុមហ៊ុនម៉ាឡេស៊ី ផ្ទុកមនុស្ស២៣៩នាក់ ហោះចេញពីក្រុងកូឡា ឡុំពួ ឆ្ពោះទៅក្រុងប៉េកាំង បានបាត់ខ្លួនជាង២ឆ្នាំហើយ។ យោងតាមការសិក្សាមួយ ចុះផ្សាយថ្ងៃអង្គារនេះ យន្តហោះបានដាំក្បាលចុះ ក្នុងកំពស់ជាង១០គីឡូម៉ែត្រ និងធ្លាក់ចុះក្នុងល្បឿនពីជាង២០០គីឡូម៉ែត្រ ដល់ជាង៣៦៥គីឡូម៉ែត្រក្នុងមួយម៉ោង។ លទ្ធផលនៃការសិក្សានេះ មានទំនោរគូសបញ្ជាក់ទៅលើការគិតកន្លងមកថា យន្តហោះអាចធ្លាក់ ក្នុងតំបន់ដែលគេរុករក។ ក្រុមហ៊ុនបូអ៊ីងយល់ថា ពេលយន្តហោះម៉ាឡេស៊ីត្រូវអស់សាំងហើយនោះ វាបានបន្ថយល្បឿន ហើយធ្លាក់ចុះលឿនស្លេវ ចូលក្នុងទឹកតែម្តង។
ប្រតិបត្តិការរុករកយន្តហោះ ដឹកនាំដោយអូស្ត្រាលី កន្លងមក ផ្តោតលើតំបន់ទំហំ ១២០ ០០០ គីឡូម៉េត្រការ៉េ គឺស្មើនឹងប្រទេសស៊្វីសដល់ទៅ៣។ ក្រសួងការពារជាតិអូស្ត្រាលីធ្លាប់ប្រាប់ថា ប្រព័ន្ធផ្កាយរណបបានចាប់បានសញ្ញាដែលយន្តហោះបញ្ចេញដោយស្វ័យប្រវត្តិ- នេះជាព័ត៌មានគូសបញ្ជាក់លើលទ្ធផលនៃការសិក្សា ចុះផ្សាយថ្ងៃអង្គារនេះ ដែលថា យន្តហោះបានធ្លាក់ចុះលឿនស្លេវ ក្នុងទឹកសមុទ្រ។
ថ្មីៗនេះ មន្ត្រីម៉ាឡេស៊ីប្រាប់ថា អ្នកបើកបរឈ្មោះ ហ្សាហារី អាម៉ាត ស្ហា ដែលបញ្ជាយន្តហោះបូអ៊ីង ជើងហោះហើរMH៣៧០ នោះ ធ្លាប់បានហាត់សមជាមួយម៉ាស៊ីន នៅលើផ្លូវហោះហើរមួយឆ្ពោះទៅកាន់សមុទ្រឥណ្ឌា ជិតផ្លូវដែលយន្តហោះកាច់ចង្កូតទៅ នៅពេលចុងក្រោយនោះ។ ទោះអ្នកបើកបរធ្លាប់ហាត់សមតាមផ្លូវមួយនេះក្តី ក៏គេគ្មានភស្តុតាងបញ្ជាក់ថា គាត់ពិតជាបានកាច់ចង្កូតយន្តហោះ ឆ្ពោះទៅសមុទ្រឥណ្ឌា នៅថ្ងៃដែលយន្តហោះបាត់ខ្លួនដែរ។
គួរបញ្ជាក់ថា ផ្លូវហោះហើរដែលយន្តហោះកាច់ចង្កូតទៅរកចុងក្រោយ មិនមែនជាផ្លូវដែលត្រូវប្រើ ដើម្បីធ្វើដំណើរទៅក្រុងប៉េកាំងទេ តាមការគ្រោងទុកទេ។ ការបាត់ខ្លួនរបស់បូអ៊ីង៧៧៧ជើងហោះហើរ MH៣៧០ ជាហេតុការណ៍ដ៏អាថ៌កំបាំងបំផុត ក្នុងប្រវត្តិអាកាសចរណ៍ស៊ីវិល។ គេគិតថា ការបាត់ខ្លួននេះ អាចបណ្តាលមកពីបញ្ហាគ្រឿងម៉ាស៊ីន ភេរវកម្ម រឺក៏ការចាប់ចំណាប់ខ្មាំង ប៉ុន្តែ រហូតពេលនេះ នៅមិនទាន់មានតំរុយអ្វីបញ្ជាក់ការសង្ស័យទាំងនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ