ម៉ូស្គូប្រតិកម្មសែនអវិជ្ជមានទល់នឹងទណ្ឌកម្មថ្មីពីខាងអាមេរិកប្រឆាំងរុស្ស៊ី
វិមានក្រេមឡាំង ថ្ងៃអង្គារម្សិលមិញបរិហារជា”ជំហានមួយបន្ថែមទៀត” ឆ្ពោះទៅអូសទាញទំនាក់ទំនងរុស្ស៊ី-អាមេរិកឲ្យកាន់តែស្រុតចុះអាក្រក់ទៅគឺទណ្ឌកម្មថ្មី ប្រកាសដោយរដ្ឋបាលប្រធានាធិបតីអាមេរិកាំងអូបាម៉ាប្រឆាំងរុស្ស៊ីទណ្ឌកម្មដែលតម្រង់ជាពិសេសទល់នឹងមន្ត្រីជាន់ខ្ពស់បំផុតនៃស្ថាប័នរដ្ឋរុស្ស៊ីខាងស៊ើបអង្កេត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ថ្លែងទៅកាន់ពួកអ្នកកាសែតនារសៀលថ្ងៃ១០មករា អ្នកនាំពាក្យវិមានក្រេមឡាំង លោក ឌ្មីទ្រី ពេស្កូវ ប្រកាសថា៖ គួរឲ្យស្តាយដែលជំហានថ្មីនេះពីខាងរដ្ឋបាលអាមេរិកាំងនាំឲ្យខូចក្នុងកម្រិតមិនធ្លាប់មានដូចទេដល់ចំណងរវាងក្រុងវ៉ាស៊ីនតោននិងម៉ូស្គូក្នុងដំណើរប្រព្រឹត្តទៅនៃអាណត្តិទី២ របស់លោកប្រធានាធិបតីបារ៉ាក់ អូបាម៉ា។
សាច់រឿងទណ្ឌកម្មលើកនេះ គឺមកពីក្រសួងហិញ្ញវត្ថុនិងក្រសួងការបរទេសអាមេរិក បានប្រកាសថ្ងៃចន្ទម្សិលម៉្ងៃដាក់ទណ្ឌកម្មទល់នឹងឥស្សរជនរុស្ស៊ី៥នាក់ទៀតក្នុងនោះមានលោក Alexandre Bastrykine ជានាយកគណៈកម្មាធិការរដ្ឋខាងស៊ើបអង្កេតតាមមុខព្រួញឧក្រិដ្ឋកម្មហៅកាត់ថា SKR ប្រៀបបាន FBI នៅស.រ.អា. ព្រមទាំងទល់នឹងតំណាងរាស្ត្ររុស្ស៊ីពីរនាក់ជាប់សង្ស័យដោយអាជ្ញាធរអង់គ្លេស ថាបានប្រព្រឹត្តឃាតកម្មតាមរយៈការប្រើធាតុ Polonium -210 បំពុលកាលក្នុងឆ្នាំ ២០០៦សត្រូវរបស់លោកប្រធានាធិបតីពូទីនគឺបុរសឈ្មោះ Alexandre Litvinenko ជាអតីតភ្នាក់ងារ KGB ភៀសខ្លួនទៅជ្រកកោននៅក្រុងឡុងដ្រ៏កាលពីឆ្នាំ ២០០៥។
ចំណែកការទូតរុស្ស៊ីក្នុងសេចក្តីថ្លែងការណ៍ខ្លួនតៀលត្មះ ឲ្យរដ្ឋបាលអូបាម៉ា ថា “ងប់នឹងដាក់ទណ្ឌកម្មដូចខ្មោចចូលអញ្ចឺង” ហើយប្រកាន់ “ អាកប្បកិរិយាមិនចេះអៀនខ្មាស “ ឡើយ។
រីឯប្រធានសភាឌូម៉ាជាសភាជាន់ក្រោមរុស្ស៊ី លោក Viacheslav Volodine សន្និដ្ឋានអំពីទង្វើរដ្ឋបាលអូបាម៉ាដែលជិតដើរចេញពីសេតវិមានទៅហើយថា ជាទង្វើក្រហល់ក្រហាយសឹងឆ្កួត។
ទោះយ៉ាងណាក្តី ក៏ក្នុងសន្និសីទកាសែតម្សិលមិញអ្នកនាំពាក្យវិមានក្រេមឡាំងនៅតែសំដែងដូចមុនដដែលសេចក្តីសង្ឃឹមថា ក្នុងថ្ងៃមុខរុស្ស៊ីនិងអាមេរិកគង់នឹងរៀបរយទំនាក់ទំនងខ្លួនឲ្យវិវឌ្ឍតាមទិសជាវិជ្ជមានពុំខាន។
ទាក់ទងនឹងគម្រោងច្បាប់ដាក់ទណ្ឌកម្មប្រឆាំងរុស្ស៊ីដែលកំពុងត្រៀមដោយសមាជិកមួយក្រុមនៃព្រឹទ្ធសភាអាមេរិកាំង តាមបទចោទប្រកាន់ថារុស្ស៊ី បានលូកដៃស្អីណាចូលក្នុងការបោះឆ្នោតនៅស.រ.អា. លោក ឌ្មីទ្រី ពេស្កូវ ថ្លែងថាគម្រោងច្បាប់បែបនេះមិនឆ្លើយស្របឡើយទោះផលប្រយោជន៍ក្រុងវ៉ាស៊ីនតោនក្តីទោះផលប្រយោជន៍ក្រុងម៉ូស្គូក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ