រឿងអាសូវកេងលុយរដ្ឋ ៖ តើលោកហ្វ្រង់ស័រ ហ្វីយ៉ុង អាចខ្ទាតពីបេក្ខភាពប្រធានាធិបតីឬ ?
ចុះផ្សាយនៅថ្ងៃ៖
ស្តាប់ - ០៤:២៧
រឿងអាស្រូវកេងលុយរដ្ឋគ្រួសារហ្វីយ៉ុង បានរីករាលដាលកាន់តែធំឡើងៗ ពីប្រពន្ធដល់កូន ... ការអង្កេតបឋមបានចាប់បើក ការសាកសួរ និងឆែកឆេរបានធ្វើឡើងជាបន្តបន្ទាប់។ ប៉ុន្តែ លោកហ្វ្រង់ស័រ ហ្វីយ៉ុង បេក្ខជនប្រធានាធិបតីនៃបក្សសាធារណរដ្ឋ បានទន្ទេញពាក្យដដែលៗថា បើគ្មានការចោទប្រកាន់ពីតុលាការទេ លោកមិនបោះបង់បេក្ខភាពប្រធានាធិបតីឡើយ។ ចុះបើលោកត្រូវបង្ខំចិត្តចាកចេញពីសង្វៀន តើនឹងមានផលវិបាកយ៉ាងណាខ្លះ ?
ពីមួយថ្ងៃទៅមួយថ្ងៃ មួយម៉ោងទៅម៉ោង យុទ្ធនាការឃោសនារបស់លោកហ្វ្រង់ស័រ ហ្វីយ៉ុង បាននិងកំពុងបោះជំហានទៅរកផ្លូវទ័ល។ ការទម្លាយរឿងអាស្រូវ មួយហើយមួយទៀត បានធ្វើឱ្យរូបភាពបេក្ខជនប្រធានាធិបតី ដែលតាំងខ្លួនជាបុគ្គលដ៏ស្អាតស្អំ ប្រលាក់ប្រលូសកាន់តែខ្លាំងឡើង។ ក្នុងរយៈពេលតែមួយសប្តាហ៍ លោកហ្វ្រង់ស័រ ហ្វីយ៉ុង បានក្លាយពីបេក្ខជនផុយស្រួយ ទៅបេក្ខជនជាប់ជុច ក្នុងសំណុំរឿងអាស្រូវកេងលុយរដ្ឋឱ្យភរិយា និងកូន ដល់ទៅប្រមាណជាងមួយលានអឺរ៉ូ។
នៅចំពោះមុខរឿងអាស្រូវដែលប្រជាពលរដ្ឋជាម្ចាស់ឆ្នោតមានអារម្មណ៍ចុកចាប់ជាងគេ លោកហ្វីយ៉ុង បានប្រឹងរក្សាជំហរ និងការពារខ្លួន ដោយអះអាងកាលពីល្ងាចថ្ងៃអង្គារថា ជាជនរងគ្រោះនៃអំពើក្បត់ និងប្រតិបត្តិការមួលបង្កាច់បែបអាជីព ៖ “នៅបីខែមុនបោះឆ្នោត ស្រាប់តែមានប្រតិបត្តិការចង់កម្ចាត់បេក្ខជនដែលជ្រើសរើសតាមបែបប្រជាធិបតេយ្យ !”។ លោកមិនព្រមចុះចាញ់ទេ ក្រោមគំនាមប្រព័ន្ធឃោសនា និងមតិសាធារណៈ ប៉ុន្តែលោក ហ្វីយ៉ុង បានដាក់កំណត់ថា នឹងបោះបង់បេក្ខភាពប្រធានាធិបតីប្រសិនបើលោកត្រូវជាប់ចោទដោយតុលាការ។
យុទ្ធនាការឃោសនា ត្រូវរំពឹងលើលទ្ធផលនៃការអង្កេត គឺពិតជាពិបាកទទួលយកបំផុត។ ក្រុមអ្នកស្តាំនិយមបារាំង ពិតជាមិនចង់ដឹងចង់ឮ រឿងដ៏អាប់អួរនេះឡើយ ព្រោះក្នុងរយៈពេលតែមួយសប្តាហ៍ លោកហ្វ្រង់ស័រ ហ្វីយ៉ុង បានបាត់បង់ប្រជាប្រិយភាពយ៉ាងខ្លាំង ប្រជាពលរដ្ឋដល់ទៅ ៧៦% មិនជឿលើពាក្យដោះសាររបស់លោកទេ។ ក្នុងបរិបទបែបនេះ តើលោកហ្វីយ៉ុង នឹងអាចឈានដល់ការបោះបង់បេក្ខភាពប្រធានាធិបតី មែនឬ?
ចម្លើយអាចមានបី។ ប្រសិនបើ លោកហ្វីយ៉ុង មានភស្តុតាងគ្រប់គ្រាន់និងលឿន បញ្ជាក់អំពីសកម្មភាពការងារពិតៗរបស់ភរិយា និងកូនៗ ក្នុងនាមជាជំនួយការ មិនបានកេងលុយរដ្ឋ ដូចការសង្ស័យ តុលាការនឹងច្រានចោលការចោទប្រកាន់។ រឿងអាស្រូវនឹងត្រូវបិទបញ្ចប់។ ក្នុងករណីនេះលោកហ្វីយ៉ុង អាចរក្សាសំណាងឈ្នះឆ្នោតខែឧសភា។
ប៉ុន្តែបើក្រុមអ្នកអង្កេតរកឃើញតែចំណុចសម្រាប់ដាក់បន្ទុកវិញ តុលាការធ្វើការចោទប្រកាន់លោកហ្វីយ៉ុងជាផ្លូវការ ដែលពេលនោះលោកត្រូវតែដកខ្លួនចេញពីបេក្ខភាពប្រធានាធិបតី។ ជាចុងក្រោយ គ្មានអ្វីជាច្បាស់លាស់ មានតែពាក្យចចាមអារាម មានតែការគាស់កកាយរឿងអាស្រូវមួយហើយមួយទៀត ការអង្កេតត្រូវបើពេលយូរ ទម្រាំតែដឹងសខ្មៅ វាអាចហួសពេលប្តូរបេក្ខជនប្រធានាធិបតី ... បើហួសពេល គឺត្រូវចាញ់ឆ្នោត។
បក្សសាធារណរដ្ឋ ខ្លាចបំផុត សេណារីយូទីពីរដែលត្រូវប្តូរបេក្ខជន។ ហេតុដូច្នេះហើយ បានគ្រប់គ្នាចង់ការអង្កេតមានដំណើរកាលលឿនបំផុត។ កាន់តែឆាប់ កាន់តែប្រសើរ ! គេមិនអាចបណ្តោយពេលវេលាឱ្យកន្លងទៅយូរបានឡើយ ព្រោះគណបក្សគ្មានផែនការសង្គ្រោះទេ។ គេមិនអាចរៀបចំការបោះឆ្នោតជ្រើសរើសបេក្ខជនបក្សជាថ្មីម្តងទៀតបានឡើយ។ លក្ខន្តិកៈបក្សមិនចែងអំពីករណីរកបេក្ខជនថ្មីជំនួសបេក្ខជនជាប់ឆ្នោតរួច ត្រូវដកខ្លួនចេញវិញទេ និងក៏គ្មានគ្រោងដែរដំណើរការច្បាប់ទាក់ទងនឹងករណីបែបនេះ។ តែបេក្ខជនម្នាក់ៗ និងហត្ថលេខាគាំទ្រចំនួន៥០០ត្រូវរកមកដម្កល់ឱ្យបាន យ៉ាងយូរបំផុតនៅថ្ងៃទី ១៧មីនា ២០១៧ ពោលគឺក្នុងរយៈពេល៦សប្តាហ៍ទៀតប៉ុណ្ណោះ។
ហើយប្រសិនបើពិតជាត្រូវប្តូរបេក្ខជនមែន នោះការិយាល័យនយោបាយអាចនឹងធ្វើការសម្រេចដោយពិគ្រោះយោបល់ជាមួយសមាជិកតាមអ៊ីនធ័រនែត ឬក៏ត្រូវកោះប្រជុំក្រុមប្រឹក្សាជាតិដែលប្រមូលផ្តុំទៅដោយតំណាងជាតិនិងតំបន់ចំនួន២ពាន់នាក់។ ខ្លះបានផ្តើមគិតស្រមៃដល់លោក អាឡាំង ហ្ស៊ូបប៉េ ដែលបានចាញ់ឆ្នោតទល់នឹងលោកហ្វីយ៉ុង ខ្លះគិតដល់លោកនីកូឡា សាកូហ្ស៊ី ឬក៏ឥស្សរជនក្នុងបក្សជំនាន់ថ្មី lលោក ហ្វ្រង់ស័រ ប៉ារ័ង François Baroin ។
ក្នុងពេលទូករៀបលិចបែបនេះ ម្នាក់ៗបានចាប់ផ្តើមគិតអំពីប្រយោជន៍ផ្ទាល់ខ្លួន។ លោក ហ្វ្រង់ស័រ ហ្វីយ៉ុង បានកោះហៅសមាជិកសភារបស់គណបក្សទាំងអស់មកជួបប្រជុំគ្នាដោយបិទទ្វារនៅទីស្នាក់ការ ដើម្បីសាកល្បងប្រមូលផ្តុំកម្លាំង ជុំវិញលោកដដែល និងជំរុញឱ្យសមាជិកបក្សអត់ធ្មត់ឱ្យបាន១៥ថ្ងៃទល់នឹងរលកសារព័ត៌មានដ៏ពុះកញ្ជ្រោល។ ប៉ុន្តែស្ថានការណ៍ពេលនេះហាក់លែងអំណោយផលហើយ។ បក្សស្តាំនិយមដែលមានជំហរជាអ្នកឈ្នះនៅក្នុងការបោះឆ្នោតប្រធានាធិបតីឆ្នាំ២០១៧ កំពុងប្រឹងទប់ដង្ហើម ដូចរង់ចាំមើលថ្ងៃបោះឆ្នោតដែលមិនអាចចាញ់ បើតាមក្បួន តែចុងក្រោយបែរជាបក្សដែលមិនអាចយកឈ្នះបានទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ