បេក្ខជនប្រធានាធិបតីបារាំង លោក ហ្វ្រង់ស័រ ហ្វីយ៉ុង ជាប់រឿងអាស្រូវកេងលុយរដ្ឋ
លោកហ្វ្រង់ស័រ ហ្វីយ៉ុង អតីតនាយករដ្ឋមន្ត្រីបារាំង និងជាបេក្ខជនប្រធានាធិបតីនៃបក្សសាធារណរដ្ឋ ដែលគ្រប់គ្នារំពឹងថាមានវាសនាខ្ពស់អាចជាប់ជាប្រធានាធិបតីនៅខែឧសភាខាងមុន កំពុងជួបរឿងអាស្រូវកេងលុយរដ្ឋកាន់តែធ្ងន់ធ្ងរឡើងៗ។ សារព័ត៌មាន Le Canard Enchainé បានទម្លាយជាបន្តបន្ទាប់ថា កូនៗនិងភរិយារបស់លោកហ្វីយ៉ុង បានទទួលប្រាក់ខែរដ្ឋប្រមាណជាង ១លានអឺរ៉ូ ក្នុងនាមជាជំនួយការឪពុក និងស្វាមី កាលនៅជាសមាជិកសភា។ តើការយកប្រពន្ធកូន មកធ្វើជាជំនួយការជាទង្វើខុសច្បាប់ឬ ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
យកប្រពន្ធកូនមកធ្វើជាជំនួយការមិនមែនជាការខុសច្បាប់ទេ ប៉ុន្តែតើប្រពន្ធនិងកូនៗទាំងនោះពិតជាបានបំពេញការងារដោយជាក់ស្តែង ឬគ្រាន់តែមានឈ្មោះដើម្បីបានប្រាក់ខែ ?! ព្រោះបើតាមការសាកសួររបស់ប៉ូលិសប្រយុទ្ធប្រឆាំងនឹងអំពើពុករលួយ នៅក្នុងក្របខ័ណ្ឌនៃការអង្កេតបឋម ទៅកាន់ជំនួយការម្នាក់ទៀត ដែលត្រូវធ្វើការជាមួយលោកស្រីហ្វីយ៉ុង បានអះអាងថាស្គាល់លោកស្រីហ្វីយ៉ុងត្រឹមជាភរិយានាយករដ្ឋមន្ត្រី មិនដែលដឹងសោះថាលោកស្រីមានតួនាទីជាជំនួយការសភា។
ម្សិលមិញ ក្រុមអង្កេតបានចុះទៅឆែកឆេរនៅសភា ដើម្បីសាកល្បងស្វែងរកភស្តុតាងផ្សេងបញ្ជាក់អំពីការងារពិតៗរបស់លោកស្រីហ្វីយ៉ុង (ដែលមិនមែនត្រឹមវិក័យបណ្ណប្រាក់បៀវត្សរ៍ឡើយ)។ លោក ហ្វ្រង់ស័រ ហ្វីយ៉ុង និងលោកស្រី ប៉េណេឡុប ហ្វីយ៉ុង ក៏ត្រូវបានប៉ូលិសអង្កេតសាកសួរ ដាច់ដោយឡែកពីគ្នា រួចមកហើយដែរ កាលពីថ្ងៃចន្ទទី៣០មករា។
បើតាមសារព័ត៌មានLe Canard Enchainé លោកស្រីប៉េណេឡុប ហ្វីយ៉ុង បានចាប់ផ្តើមការងារជំនួយការរបស់ស្វាមី និងរបស់សមាជិកសភាជំនួស នៅពេលលោកហ្វីយ៉ុងចូលក្នុងរដ្ឋាភិបាល ពីឆ្នាំ១៩៨៨ដល់ឆ្នាំ២០០៧ ដោយបានទទួលប្រាក់បៀវត្សរ៍ សរុបប្រមាណ ៨៣ម៉ឺនអឺរ៉ូ។ លោកស្រីក៏បានទទួលប្រាក់ខែ១០ម៉ឺនអឺរ៉ូ សម្រាប់ការងារនៅទស្សនាវដ្តី La Revue des deux mondes ពីខែឧសភា ឆ្នាំ២០១២ ដល់ខែធ្នូឆ្នាំ២០១៣ ដែលលោកស្រីទំនងជាបានសរសេរអត្ថបទប៉ុន្មានអក្សរប៉ុណ្ណោះផង។
ជាងនេះទៅទៀត បើតាមប្រភពសារព័ត៌មានLe Canard Enchainé ដដែល ដែលចេញផ្សាយនៅថ្ងៃពុធទី១កុម្ភៈតែម្តង បានទម្លុះរឿងអាស្រូវកាន់តែខ្លាំងបន្ថែមទៀត ដោយបានអះអាងថា លោកហ្វីយ៉ុង ក៏បានធ្លាប់ផ្តល់ការងារជាជំនួយការព្រឹទ្ធសភា នៅរវាងពីឆ្នាំ២០០៥ដល់ឆ្នាំ២០០៧ ដល់កូនស្រី និងកូនប្រុសរបស់លោក ដែលកំពុងនៅសិក្សានៅឡើយ មិនមែនមានសញ្ញាប័ត្រជាមេធាវី ដូចដែលលោកហ្វីយ៉ុងបានអះអាងការពារខ្លួននោះទេ។
តាំងពីមានលេចធ្លាយរឿងអាស្រូវលោកស្រី ប៉េណេឡុប ហ្វីយ៉ុង ស៊ីប្រាក់ខែជាជំនួយការស្វាមីមក បេក្ខជនប្រធានាធិបតីបក្សសាធារណរដ្ឋ បានខិតខំបន្តយុទ្ធនាការឃោសនាបោះឆ្នោត ដោយបញ្ចេញគ្រប់អំណះអំណាង ដើម្បីការពារខ្លួន ប៉ុន្តែរាល់ពាក្យដែលគ្រលាស់ចេញមក តែងអាចផ្ទាន់បានទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ