បារាំង៖តុលាការកាត់ទោសលោកយេរ៉ូម កាអ៊ុយហ្សាក់ឲ្យជាប់គុក ៣ឆ្នាំពីបទគេចពន្ធ
នៅក្នុងប្រទេសបារាំង លោកយេរ៉ូម កាអ៊ុយហ្សាក់ (Jérôme Cahuzac) អតីតរដ្ឋមន្រ្តីក្រសួងថវិកា និងដែលមានគណនីលួចលាក់នៅបរទេសត្រូវបានតុលាការកាត់ទោសឲ្យជាប់គុកចំនួន ៣ឆ្នាំនាថ្ងៃព្រហស្បតិ៍ ទី៨ វិច្ឆិកាពីបទគេចពន្ធ និងការលាងលុយកខ្វក់។ ក្រៅពីរូបលោកកាអ៊ុយហ្សាក់ ភរិយារបស់លោកគឺលោកស្រី Patricia ក៏ត្រូវបានតុលាការកាត់ទោសឲ្យជាប់គុកចំនួន ២ឆ្នាំពីបទចោទប្រកាន់ដូចគ្នានេះ។ តែមេធាវីម្នាក់របស់លោកកាអ៊ុយហ្សាក់បានប្រាប់ឲ្យដឹងថាពីបំណងប្តឹងឧទ្ធរណ៍របស់គូស្វាមីលោកកាអ៊ុយហ្សាក់។ តើរឿងរ៉ាវគូស្រករលោកកាអ៊ុយហ្សាក់បានកើតឡើងយ៉ាងដូចម្តេចខ្លះ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
រឿងរ៉ាវទាក់ទងនឹងគូស្រករលោកយេរ៉ូម កាអ៊ុយហ្សាក់ត្រូវបានទម្លាយដោយគេហទំព័រព័ត៌មាន Médiapart ក្នុងខែធ្នូ ឆ្នាំ ២០១២ ដែលថា លោកកាអ៊ុយហ្សាក់មានគណនីលួចលាក់នៅក្នុងប្រទេសស្វ៊ីស។ នៅពេលនោះ លោកកាអ៊ុយហ្សាក់ដែលជាគ្រូពេទ្យវះកាត់ម្នាក់ដ៏មានថ្វីដៃ និងបានចូលប្រឡូកក្នុងឆាកនយោបាយទើបទទួលបានមុខតំណែងជារដ្ឋមន្រ្តីក្រសួងថវិកាក្នុងជំនាន់លោកប្រធានាធិបតីហ្រ្វង់ស័រ ហូឡង់សព្វថ្ងៃ។ ក្នុងនាមជារដ្ឋមន្រ្តីក្រសួងថវិកា លោកកាអ៊ុយហ្សាក់បានតាំងខ្លួនជាអ្នកប្រយុទ្ធប្រឆាំងនឹងការគេចពន្ធ។
ម្តងជាពីរដង រដ្ឋមន្រ្តីរូបនេះបានចេញមុខបដិសេធយ៉ាងដាច់អហង្ការ និងច្រានចោលព័ត៌មានដែលលើកឡើងដោយ Médiapart។ តែទីបំផុតក្នុងថ្ងៃទី១៩ មីនា ឆ្នាំ ២០១៣ លោកកាអ៊ុយហ្សាក់ដែលបានទទួលគំនាបកាន់តែខ្លាំងបានយល់ព្រមលាចុះពីមុខតំណែង និងទទួលស្គាល់ការពិតនាថ្ងៃទី២ មេសា ឆ្នាំ ២០១៣ ដដែល។ លទ្ធផលនៃការស៊ើបអង្កេតបានឲ្យដឹងថា លុយដែលគូស្រករលោកកាអ៊ុយហ្សាក់លាក់នៅបរទេស ពិសេសក្នុងធនាគារប្រទេសស្វ៊ីស និងសិង្ហបុរីដើម្បីគេចពន្ធមានសរុបប្រមាណជា ៣ ៥០០ ០០០អឺរ៉ូ។
នៅចំពោះវត្តមានលោកកាអ៊ុយហ្សាក់ និងភរិយា តុលាការបានសម្រេចកាត់ទោសដាក់គុកលោកកាអ៊ុយហ្សាក់ចំនួន ៣ឆ្នាំ និងភរិយាចំនួន ២ឆ្នាំពីបទគេចពន្ធ លាងលុយកខ្វក់ និងផ្តល់ព័ត៌មានក្លែងក្លាយ។ តុលាការបានចាត់ទុកទង្វើទាំងអស់នេះជាបទល្មើសព្រហ្មទ័ណ្ឌដ៏ធ្ងន់ធ្ងរ។ ក្រោយការប្រកាសសាលក្រមរបស់តុលាការ លោកកាអ៊ុយហ្សាកអង្គុយចុះដោយឱនមុខចុះមិននិយាយស្តីអ្វីមួយម៉ាត់ឡើយ។ តែមេធាវីម្នាក់របស់លោកបានបញ្ចាក់ឲ្យដឹងពីបំណងប្តឹងឧទ្ធរណ៍របស់គូស្រករលោកកាអ៊ុយហ្សាក់។
យ៉ាងណាក៏ដោយ រឿងរ៉ាវរបស់លោកកាអ៊ុយហ្សាក់បានធ្វើឲ្យកក្រើកពិភពអ្នកនយោបាយជំនាន់លោកប្រធានាធិបតីហ្រ្វង់ស័រ ហូឡង់ ហើយការកាត់ទោសលោកកាអ៊ុយហ្សាក់ពេលនេះអាចជាការព្រមានមួយសម្រាប់អ្នកនយោបាយគេចពន្ធផ្សេងទៀត។ គួរជម្រាបជូនថា តាំងពីធ្លាយរឿងអាស្រូវគេចពន្ធលោកកាអ៊ុយហ្សាក់មក រដ្ឋាភិបាលបារាំងបានពង្រឹងវិធានការប្រឆាំងការគេចពន្ធដោយបង្កើតឡើងនូវអាជ្ញាធរជាន់ខ្ពស់ដើម្បីតម្លាភាពជីវិតមន្រ្តីសាធារណៈ និងទីភ្នាក់ងារប្រឆាំងអំពើពុករលួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ