បារាំង ៖ រដ្ឋមន្ត្រីមហាផ្ទៃជាប់រឿងអាស្រូវ លាលែងចេញពីតំណែង
ក្នុងរយៈពេលមិនដល់២៤ម៉ោងផង ជោគវាសនារបស់រដ្ឋមន្ត្រីក្រសួងមហាផ្ទៃ បានក្រឡាប់ចាក់ទាំងស្រុង ! គ្រាន់តែតុលាការប្រកាសបើកអង្កេតបឋម នៅព្រឹកថ្ងៃអង្គារទី ២១មីនាភ្លាម ប្រឆាំងនឹងលោក ប្រុយណូ ឡឺរ៉ូ រដ្ឋមន្ត្រីក្រសួងមហាផ្ទៃបារាំង ដែលជាប់រឿងអាស្រូវយកកូនៗមិនទាន់ពេញមកធ្វើជាជំនួយការសភា បានប្រកាសលាលែងចេញពីតំណែងដែរ ដោយមិនបង្អង់។ ជាតំណែងដែលលោកបានទទួលកាន់កាប់បានបីខែនិង១៥ថ្ងៃ ហើយដែលធម្មតាត្រូវចប់អាណត្តិនៅមួយកន្លះទៀតប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
មានប្រវត្តិយូរអង្វែងជាមួយបក្សសង្គមនិយម និងជាមនុស្សជំនិតរបស់ប្រធានាធិបតី លោកឡឺរ៉ូ ត្រូវបង្ខំចិត្តចាកចេញពីរដ្ឋាភិបាលយ៉ាងទាន់ហន់ តែមួយខែគត់មុនការបោះឆ្នោតប្រធានាធិបតី។ នៅវេលាម៉ោង ៦ល្ងាចថ្ងៃអង្គារម្សិលមិញ បន្ទាប់ពីបានទទួលជួបដោយប្រធានាធិបតី និងនាយករដ្ឋមន្ត្រីមក លោក ប្រុយណូ ឡឺរ៉ូ ដែលបានចូលកាន់តំណែងដ៏រសើបមួយនេះ កាលពីខែធ្នូ ២០១៦ បានប្រកាសលាលែងចេញពីតំណែងភ្លាម ដើម្បីកុំឱ្យប៉ះពាល់ដល់រូបភាពរដ្ឋាភិបាល។
សម្រាប់លោក ក្នុងបរិបទនៃការគំរាមកំហែងភេរវកម្ម អ្នកមានទំនួលខុសត្រូវខ្ពស់ មិនត្រូវប្រលាក់ប្រលូសជាប់ពាក់ព័ន្ធនឹងការសង្ស័យចោទប្រកាន់អ្វីទាំងអស់។ ប៉ុន្តែលោកប្រុយណូ ឡឺរ៉ូ នៅតែអះអាងការពារខ្លួនជានិច្ច ថាលោកជាមនុស្សស្អាតស្អំ បានផ្តល់កិច្ចសន្យាការងារខ្លីៗ ឱ្យកូនៗ ក្នុងរយៈពេលកំណត់ច្បាស់លាស់ និងជាផ្លូវការ ស្របតាមការងារជាក់ស្តែងតម្រូវ។ លោកចង់សំដៅថាមិនមែនជាការបន្លំកេងយកលុយ ដូចករណីលោកហ្វីយ៉ុង បេក្ខជនប្រធានាធិបតីបក្សសាធារណរដ្ឋទេ។
សូមបញ្ជាក់ថាលោក ឡឺរ៉ូ បានជាប់អង្កេតរបស់តុលាការ ពីបទបានយកកូនៗមកធ្វើជាជំនួយការសភា ដោយកូនស្រីទាំងពីរនោះ នៅជាសិស្សនិងនិស្សិតនៅឡើយ។ រឿងអាស្រូវនេះបានផ្ទុះឡើងដោយសារការទម្លាយរបស់សារព័ត៌មាន ក្នុងខណៈដែលរឿងអាស្រូវកេងបន្លំលុយរដ្ឋ ដោយកូនប្រពន្ធមកធ្វើជាជំនួយការ របស់បេក្ខជនប្រធានាធិបតី លោកហ្វ៊ីយ៉ុង កំពុងបន្តផុសផុលនៅឡើយ។
ហេតុដូច្នេះហើយ បានជាភាគីរដ្ឋាភិបាល ចាត់ទុកការលាលែងចេញពីតំណែងនេះ ជាគំរូល្អ ! បញ្ជាក់ថាមន្ត្រីថ្នាក់ណាក៏ស្ថិតក្រោមច្បាប់ និងស្អាតស្អំ ! ម្យ៉ាងទៀត ករណីលោកឡឺរ៉ូ ក៏ដូចជាលោកហ្វីយ៉ុង ត្រូវជាប់អង្កេតនិងចោទប្រកាន់ ពីសំណាក់តុលាការពិសេស ដែលបង្កើតឡើង ដើម្បីប្រយុទ្ធប្រឆាំងនឹងអំពើពុករលួយនិងអំពើគេចពន្ធ តែមួយនេះដូចគ្នា។ ការបើកអង្កេតដ៏លឿនរហ័សប្រឆាំងនឹងលោក ឡឺរ៉ូ អាចបញ្ជាក់បានអំពីឯករាជភាពរបស់តុលាការ ថាមិនស្ថិតក្រោមគំនាបឬមិនមែនជាឧបករណ៍នយោបាយរបស់រដ្ឋាភិបាល ដូចដែលបេក្ខជនប្រធានាធិបតីបក្សសាធារណរដ្ឋ លោក ហ្វ្រង់ស័រ ហ្វីយ៉ុង ធ្លាប់ចោទប្រកាន់ឡើយ។ បក្សប្រឆាំងគ្មានហើបមាត់ធ្វើអត្ថាធិប្បាយអ្វីមួយម៉ាត់ទេ ក្នុងរឿងអាស្រូវនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ