កាលបរិច្ឆេទសំខាន់ៗ នៅក្រោយការបោះឆ្នោតប្រធានាធិបតីបារាំង
ប្រជាជនបារាំងបានបោះឆ្នោតជ្រើសរើស លោកអេម៉ានុយអែល ម៉ាក្រុងមកពីគណបក្សEn Marche ឲ្យធ្វើជាប្រធានាធិបតី បារាំង បន្តពីលោកហ្វ្រង់ស័រ ហូឡង់។ ពិធីផ្ទេរតំណែង ប្រធានាធិបតី ការជ្រើសតាំងនាយករដ្ឋមន្រ្តី ដើម្បីបង្កើតរដ្ឋាភិបាលថ្មីនឹងត្រូវរៀបចំធ្វើយ៉ាងយូរបំផុត នៅចុងសប្តាហ៍នេះ។
ចុះផ្សាយនៅថ្ងៃ៖ កែប្រែថ្ងៃទី៖
ក្នុងនាមជាប្រធានាធិបតីជាប់ឆ្នោត លោកអេម៉ានុយអែល ម៉ាក្រុងត្រូវបានលោកប្រធានាធិបតីហូឡង់ អញ្ជើញឲ្យអមដំណើរជាមួយលោកក្នុងពិធីបុណ្យជាតិ នៅថ្ងៃទី៨ឧសភានេះ ថ្ងៃដែលបារាំងរំលឹកដល់ការដាក់អាវុធ សុំចុះចាញ់របស់អាល្លឺម៉ង់ នៅសង្រ្គាមលោកលើកទី២។
១៣ ឬ១៤ឧសភា៖ ការផ្ទេរតំណែងប្រធានាធិបតី
ពិធីផ្ទេរតំណែងប្រធានាធិបតីត្រូវគេរំពឹងថា នឹងប្រព្រឹត្តទៅ នៅថ្ងៃសៅរ៍ ឬក៏ថ្ងៃអាទិត្យចុងសប្តាហ៍នេះ ពោល គឺធ្វើឲ្យបានមុន លោកប្រធានាធិបតីហ្វ្រង់ស័រ ហូឡង់បញ្ចប់បញ្ចប់អាណត្តិ៥ឆ្នាំរបស់លោកនៅយប់អាធ្រាត្រ ថ្ងៃអាទិត្យទី ១៤ឧសភា។ ទៅតាមprotocoleរបស់វិមានប្រធានាធិបតី Elysée លោកអេម៉ានុយអែល ម៉ាក្រុង នឹងត្រូវទទួលស្វាគម ចាប់ដៃដោយលោកប្រធានាធិបតីហ្រ្វង់ស័រ ហូឡង់ នៅមុនពេលលោកហូឡង់ ឡើងរថយន្ត អមដោយទាហានការពារជាតិជាន់ខ្ពស់ ចាកចេញពីវិមានអេលីហ្សេ។
នៅថ្ងៃទី ១៥ឧសភា៖ ប្រធានាធិបតីប្រកាសឈ្មោះនាយករដ្ឋមន្រ្តី
នៅថ្ងៃចន្ទទី ១៥ ឧសភា នៅប៉ុន្មានម៉ោងក្រោយចូលកាន់តំណែងជាប្រធានាធិបតីបារាំង លោកម៉ាក្រុងត្រូវប្រកាសតែងតាំងនាយករដ្ឋមន្រ្តីថ្មី ដែលមានកាតព្វកិច្ច រៀបចំ បង្កើតរដ្ឋាភិបាល។ នៅប៉ុន្មានថ្ងៃមុននេះលោកម៉ាក្រុង បាននិយាយថា លោកបានរកឃើញហើយបុគ្គលដែលលោកនឹងជ្រើសរើសឲ្យធ្វើជានាយករដ្ឋមន្រ្តីសម្រាប់រដ្ឋាភិបាលថ្មី។ ជាមួយនឹងសមាសភាពរដ្ឋាភិបាលថ្មី នាយករដ្ឋមន្រ្តីរបស់លោកអេម៉ានុយអែល ម៉ាក្រុងមាននាទីដឹកនាំធ្វើយុទ្ធនាការឃោសនាសម្រាប់ការបោះឆ្នោត សភាមួយទៀត។ ជាទូទៅ នាយករដ្ឋមន្រ្តីដែល ប្រធានាធិបតីជ្រើសតាំងភ្លាម នៅក្រោយការផ្ទេរតំណែង អាចនឹងត្រូវផ្លាស់ប្តូរ រដ្ឋាភិបាលត្រូវរុះរើសាជាថ្មី ក្នុងករណីដែលគណបក្សរបស់លោកប្រធានាធិបតីអេម៉ានុយអែល ម៉ាក្រុងមិនអាចឈ្នះឆ្នោត ប្រមូលបានសំឡេងភាគច្រើននៅរដ្ឋសភា។
លទ្ធផលនៃការបោះឆ្នោតសភាសំខាន់ ព្រោះវានឹងអាចកំណត់ថា តើគណបក្សរបស់លោកប្រធានាធិបតីម៉ាក្រុង អាចដឹកនាំប្រទេសតែម្នាក់ឯង ឬត្រូវចាប់ដៃជាមួយគណបក្សដទៃទៀត ដើម្បីបង្កើតរដ្ឋាភិបាលចម្រុះ។ សូមបញ្ជាក់ថា ដើម្បីបានទទួលបានសំឡេងភាគច្រើនដាច់ខាត នៅរដ្ឋសភា រដ្ឋាភិបាលថ្មីរបស់លោកអេម៉ានុយអែល ម៉ាក្រុងត្រូវការមានអ្នកតំណាងរាស្រ្តរបស់បក្សខ្លួននៅរដ្ឋសភា ចំនួន ២៨៩នាក់ ក្នុងចំណោមអ្នកតំណាងរាស្រ្តសរុប ចំនួន ៥៧៧នាក់។
ពីថ្ងៃទី ១៥ ដល់ថ្ងៃទី ១៩ឧសភា
ទៅតាមកាលបរិច្ឆេទដែលបានកំណត់រួចស្រេច បេក្ខជនគ្រប់គណបក្សនយោបាយត្រូវដាក់បេក្ខភាពរបស់ខ្លួន សម្រាប់ឈរឈ្មោះនៅក្នុងការបោះឆ្នោតសភា ឲ្យបានមុនថ្ងៃទី ១៩ឧសភា។ ចាប់ពីថ្ងៃទី ២២ឧសភា គណបក្សនយោបាយអាចចាប់ផ្តើមធ្វើយុទ្ធនាការឃោសនាបោះឆ្នោត សម្រាប់ជ្រើសរើសសមាជិកសភាថ្មី ចំនួន ៥៧៧នាក់នៅរដ្ឋសភា។ ការបោះឆ្នោតសភាជុំទី១ នឹងប្រព្រឹត្តទៅនៅថ្ងៃទី ១១មិថុនា ក្នុងពេលដែលការបោះឆ្នោតជុំទី ២ ត្រូវធ្វើនៅថ្ងៃទី ១៨មិថុនា។
ថ្ងៃទី ១៩មិថុនា៖ សភានិតិកាលទី១៤ត្រូវបិទបញ្ចប់ជាផ្លូវការ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ