ក្រុមហ៊ុនប្រេងTotal ចុះហត្ថលេខាកិច្ចព្រមព្រៀងឧស្ម័នជាមួយអ៊ីរ៉ង់ ថ្ងៃចន្ទ៣កក្កដា
ថ្ងៃចន្ទ៣កក្កដានេះ ក្រុមហ៊ុនប្រេងតូតាល់បារាំង ដឺកនាំសម្ព័ន្ធក្រុមហ៊ុនអន្តរជាតិ ដែលមានក្រុមហ៊ុនចិនដែរនោះ ត្រូវចុះហត្ថលេខាជាមួយអ៊ីរ៉ង់ លើកិច្ចព្រមព្រៀងឧស្ម័ន ដែលមានតម្លៃ៤៨០០លានដុល្លារ។ កិច្ចព្រមព្រៀងបឋមត្រូវបានចុះហត្ថលេខារួចហើយ កាលពីខែវិច្ឆិកាឆ្នាំ២០១៦។ កិច្ចព្រមព្រៀងឧស្ម័ននេះ ធ្វើអោយតូតាល់ក្លាយជាក្រុមហ៊ុនប្រេងទី១របស់លោកខាងលិច ដែលបានត្រលប់មកវិនិយោគក្នុងទឹកដីអ៊ីរ៉ង់វិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
យោងតាមកិច្ចព្រមព្រៀងឧស្ម័នតម្លៃ៤៨០០លានដុល្លារនេះ ក្នុងគំរោងវិនិយោគ ក្រុមហ៊ុនតូតាល់ ដឺកនាំសម្ព័ន្ធក្រុមហ៊ុនអន្តរជាតិ ដែលមានក្រុមហ៊ុនជាតិចិន CNPCI និងក្រុមហ៊ុនអ៊ីរ៉ង់ Petropars។ តូតាល់មានចំណែក៥០,១ភាគរយ ក្រុមហ៊ុនចិនមាន៣០ភាគរយ ហើយក្រុមហ៊ុនអ៊ីរ៉ង់វិញមានចំណែក១៩,៩ភាគរយ។
យោងតាមក្រុមហ៊ុនតូតាល់ ផលិតផលឧស្ម័នក្នុងកិច្ចព្រមព្រៀងនេះ នឹងដាក់ចូលទីផ្សារក្នុងស្រុកអ៊ីរ៉ង់ ចាប់ពីឆ្នាំ២០២១ទៅ។ តូតាល់សន្យាគោរពតាមច្បាប់ជាតិនិងអន្តរជាតិ ក្នុងពេលអនុវត្តគំរោងវិនិយោគនេះ។ តាមធម្មតាកិច្ចព្រមព្រៀងឧស្ម័ននេះ ត្រូវសម្រេចសម្រួចអោយហើយ នៅដើមឆ្នាំ២០១៧ ហើយដំណើរការផលិតអាចធ្វើក្នុងកំឡុងពេលពីជាង៣ឆ្នាំទៅ។ តែកន្លងមក តូតាល់នៅរង់ចាំសង្កេត នយោបាយអាមេរិកសិន។
ការចុះហត្ថលេខាលើកិច្ចព្រមព្រៀងប្រេងជាមួយអ៊ីរ៉ង់ ថ្ងៃចន្ទនេះ ធ្វើឡើងចំពេលលោកដូណាល់ ត្រាំ រិះគន់កិច្ចព្រមព្រៀងនុយក្លេអ៊ែរអ៊ីរ៉ង់ ដែលអ៊ីរ៉ង់ និងក្រុមប្រទេសមហាអំណាចមានអាមេរិក រុស្ស៊ី ចិន បារាំង អង់គ្លេសនិងអាល្លឺម៉ង់សម្រេចបាន ក្នុងឆ្នាំ២០១៥។ កិច្ចព្រមព្រៀងឆ្នាំ២០១៥ បានអនុញ្ញាតអោយសហគមន៍អន្តរជាតិដកទណ្ឌកម្មមួយចំណែកពីអ៊ីរ៉ង់។ ប៉ុន្តែ កន្លងមក ធនាគារធំៗនៅតែមិនសូវហ៊ានធ្វើការរកស៊ីជាមួយអ៊ីរ៉ង់ ដោយសារខ្លាចទណ្ឌកម្មអាមេរិក។ ឆ្នាំមុននេះ ព្រឹទ្ធសភាអាមេរិកបានបោះឆ្នោតច្បាប់ថ្មី ដើម្បីដាក់ទណ្ឌកម្មថ្មីៗទៀតប្រឆាំងអ៊ីរ៉ង់ ដោយសារអាមេរិកចោទថា អ៊ីរ៉ង់គាំទ្រក្រុមភេរវជនអន្តរជាតិ។ ទោះយ៉ាងនេះក្តី ច្បាប់ថ្មីអាមេរិកត្រូវឆ្លងកាត់ការពិនិត្យពីសភាតំណាងរាស្ត្រ និងការចុះហត្ថលេខាពីលោកដូណាល់ ត្រាំមួយជាន់ទៀត។
អ៊ីរ៉ង់ជាប្រទេសមានធនធានឧស្ម័នលំដាប់ទី២ក្នុងពិភពលោកបន្ទាប់ពីរុស្ស៊ី ហើយជាប់ឈ្មោះជាប្រទេសមានធនធានប្រេងលំដាប់ទី៤ក្នុងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ