តួកគី៖គណបក្សប្រឆាំងរៀបចំមហាបាតុកម្មដើម្បីភាពយុត្តិធម៌ និងប្រឆាំងអំណាចផ្តាច់ការ
នៅក្នុងប្រទេសតួកគី គណបក្សប្រឆាំងរៀបចំក្បួនមហាបាតុកម្មមួយនាយប់ថ្ងៃអាទិត្យ ទី៩ កក្កដាក្នុងទីក្រុងអ៊ីស្តង់ប៊ូល។ មហាបាតុកម្មមួយនេះរៀបចំឡើង បន្ទាប់ពីមេបក្សប្រឆាំងលោក Kemal Kiliçdaroglu ទើបបញ្ចប់ដំណើរថ្មើរជើងពីទីក្រុងអង់ការ៉ាទៅទីក្រុងអ៊ីស្តង់ប៊ូលដើម្បីបរិហារភាពអយុត្តិធម៌ក្នុងសង្គម និងប្រឆាំងរបបផ្តាច់ការរបស់លោកប្រធានាធិបតី Erdogan។ អ្វីជាការកត់សម្គាល់ មហាបាតុកម្មថ្ងៃនេះធ្វើឡើងនៅក្នុងបរិបទដែលប្រទេសកំពុងបន្តស្ថិតក្រោមការគំរាមកំហែងភេរវនិយម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
២៤ថ្ងៃ និង ៤៥០គីឡូម៉ែត្រ នេះជារយៈពេល និងចម្ងាយផ្លូវដែលមេបក្សប្រឆាំងលោក Kemal Kiliçdarogluមានអាយុ ៦៨ឆ្នាំបានដើរពីទីក្រុងអង់ការ៉ាឆ្ពោះទៅកាន់ទីក្រុងអ៊ីស្តង់ប៊ូល។ កម្មវត្ថុរបស់លោក Kemal គឺដើម្បីបរិហារលើការផ្តន្ទាទោសដាក់គុកតំណាងរាស្រ្តរបស់បក្សប្រឆាំងម្នាក់រយៈពេល ២៥ឆ្នាំក្នុងបទចោទប្រកាន់ផ្តល់ព័ត៌មានសម្ងាត់ឲ្យកាសែតប្រឆាំង។ លោក Kemal បានទៅដល់ទីក្រុងអ៊ីស្តង់ប៊ូលដោយមានហ្វូងមនុស្សហែហមទទួលជិត ៥០ ០០០នាក់ និងត្រៀមខ្លួនចូលរួមនៅក្នុងក្បួនមហាបាតុកម្មរៀបចំនៅពីមុខពន្ធនាគារដែលរូបតំណាងរាស្រ្តកំពុងជាប់ឃុំ។
តាមក្រុមអ្នករៀបចំបាតុកម្ម គឺអាចមានមនុស្សចូលរួមជាង ១លាននាក់ដែលជាតួលេខមួយដ៏ច្រើនសម្បើមមិនធ្លាប់មានទេ គិតតាំងពីក្រោយរដ្ឋប្រហារយោធាទម្លាក់លោកប្រធានាធិបតី Erdogan មិនបានសម្រេចកាលពីពាក់កណ្តាលខែកក្កដា ឆ្នាំ ២០១៦។ អ្វីជាការកត់សម្គាល់ ក្បួនមហាបាតុកម្មថ្ងៃនេះរៀបចំឡើងដដោយមានការធានាសន្តិសុខកម្រិតខ្ពស់ និងនៅក្នុងបរិបទនយោបាយមួយយ៉ាងតានតឹង ពិសេសក្នុងពេលដែលមានលេចឮព័ត៌មានថា មានការគំរាមកំហែងភេរវកម្ម និងការបង្កឲ្យមានភាពចលាចលនៅក្នុងក្បួនបាតុកម្មនោះ។
យ៉ាងណាក៏ដោយ ដំណើរថ្មើរជើងរហូតដល់គោលដៅរបស់លោក Kemal ពេលនេះ ជាសក្ខីកម្មមួយដែលបញ្ជាក់ពីជោគជ័យរបស់លោកក្នុងការបរិហារលើទង្វើអយុត្តិធម៌ និងអំណាចផ្តាច់ការរបស់រដ្ឋអំណាចតួកគីសព្វថ្ងៃ។ ទន្ទឹមគ្នានេះ បើគណបក្សប្រឆាំងអាចកែនប្រមូលបានមនុស្សសន្ធឹកសន្ធាប់ចូលរួមនៅក្នុងក្បួនបាតុកម្មយប់នេះ លោក Kemal អាចនឹងមានទឹកមាត់ប្រៃបន្ថែមទៀតដើម្បីចេញមុខតទល់នឹងមនុស្សខ្លាំងលោក Erdogan។ លោក Erdogan ដែលធ្លាប់បានចោទលោក Kemal ពីបទរួមកម្លាំងជាមួយពួកភេរវជន និងព្រមានប្តឹងលោក Kemal ទៅតុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ