លោកដូណាល់ ត្រាំផ្តើមទស្សនកិច្ចរយៈពេល ២ថ្ងៃក្នុងប្រទេសបារាំង
ចុះផ្សាយនៅថ្ងៃ៖
ស្តាប់ - ០៧:១៧
លោកប្រធានាធិបតីអាមេរិកដូណាល់ ត្រាំផ្តើមទស្សនកិច្ចរយៈពេល ២ថ្ងៃក្នុងប្រទេសបារាំងចាប់ពីថ្ងៃព្រហស្បតិ៍ ទី១៣ ដល់ថ្ងៃសុក្រ ទី១៤ កក្កដា។ វត្តមានរយៈពេល ២ថ្ងៃរបស់លោកត្រាំក្នុងទីក្រុងប៉ារីស គឺដើម្បីចូលរួមបុណ្យឯករាជ្យជាតិបារាំង ១៤ កក្កដា និងចូលរួមខួបគម្រប់ ១០០ឆ្នាំនៃការចូលរួមរបស់ទ័ពអាមេរិកនៅក្នុងសង្រ្គាមលោកលើកទី១កាលពីឆ្នាំ ១៩១៧។ ក្រៅពីការចូលរួមនៅក្នុងព្រឹត្តិការណ៍ធំទាំងពីរ លោកត្រាំក៏ត្រូវមានជំនួបមួយទល់មួយជាមួយសមភាគីបារាំងលោកអេម៉ានុយអែល ម៉ាក្រុង។ នាឱកាសនោះ មានសំណុំរឿងជាច្រើនដែលឥស្សរជនទាំងពីរគ្រោងលើកយកទៅជជែក។
លោកដូណាល់ ត្រាំបានចុះពីយន្តហោះ Air Force One នៅម៉ោង ៨ និង ៣០នាទីព្រឹកថ្ងៃទី១៣ កក្កដា ម៉ោងក្នុងប្រទេសបារាំង រួចធ្វើដំណើរឆ្ពោះទៅកាន់ស្ថានទូតអាមេរិកប្រចាំក្រុងប៉ារីសដើម្បីជួបសំណេះសំណាលជាមួយមន្រ្តីស៊ីវិល និងយោធាអាមេរិក។ នៅពេលរសៀលក្នុងថ្ងៃទី១៣ កក្កដាដដែល លោកត្រាំចូលរួមនៅក្នុងពិធីយោធារៀបចំនៅទីលាន Invalides ជាមួយសមភាគីបារាំងលោកអេម៉ានុយអែល ម៉ាក្រុងដោយមានការចូលរួមពីទ័ពអាមេរិក និងទ័ពបារាំង រួមទាំងមន្រ្តីស៊ីវិលជាច្រើនរូបផ្សេងទៀត។
បន្ទាប់មក លោកត្រាំ និងលោកម៉ាក្រុងជួបសន្ទនាមួយទល់មួយនៅក្នុងវិមានប្រធានាធិបតីបារាំងអេលីហ្សេ និងធ្វើសន្និសីទកាសែតរួមគ្នានៅក្រោយជំនួប។ បន្ទាប់មកទៀតនៅវេលាម៉ោង ៩យប់ គូស្វាមី ភរិយាលោកដូណាល់ ត្រាំ និងលោកអេម៉ានុយអែល ម៉ាក្រុងត្រូវស្រស់ស្រូបអាហាររួមគ្នានៅក្នុងភោជនីយដ្ឋានលើអាកាសស្ថិតជាន់ទី២ នៃ Tour Effel។ នៅថ្ងៃសុក្រ ទី១៤ កក្កដា លោកដូណាល់ ត្រាំ ជាភ្ញៀវកិត្តិយសចូលរួមនៅក្នុងពិធីក្បួនព្យុះហយាត្រាថ្ងៃបុណ្យជាតិបារាំង ១៤ កក្កដា។ នាឱកាសក្បួនព្យុះហយាត្រានោះ ក៏នឹងមានការរួមពីទ័ពអាមេរិកាំងចំនួន ២០០នាក់។
នេះជាលើកទី១ គិតតាំងពីឆ្នាំ ១៩៨៩ ដែលមានប្រធានាធិបតីអាមេរិកម្នាក់បានចូលរួមនៅក្នុងក្បួនព្យុះហយាត្រាបុណ្យជាតិបារាំងថ្ងៃ ១៤ កក្កដា។ រដ្ឋអំណាចបារាំងបានចាត់វិធានការសន្តិសុខតឹងរ៉ឹង និងសម្បើមអស្ចារ្យដើម្បីទទួលលោកត្រាំ។ ចរាចរណ៍មានការកកស្ទះខ្លាំង ព្រោះផ្លូវធំ តូចតាំងពីព្រលានយន្តហោះរហូតដល់ស្ថានទូតអាមេរិកត្រូវបានផ្អាកចរាចរណ៍មួយរយៈពេលធំសម្រាប់ដំណើរក្បួនរថយន្តរបស់លោកត្រាំ។ លោកត្រាំដែលធ្លាប់និយាយនៅក្រោយកើតមានភេរវកម្មក្នុងក្រុងប៉ារីសថា បារាំងជាប្រទេសប្រកបដោយគ្រោះថ្នាក់ដែលមិនគួរទៅទេ។
ជំនួបមួយទល់មួយដូណាល់ ត្រាំ អេម៉ានុយអែល ម៉ាក្រុង
ក្រៅពីចូលរួមនៅក្នុងបុណ្យជាតិបារាំងថ្ងៃ ១៤ កក្កដា និងចូលរួមខួបគម្រប់ ១០០ឆ្នាំនៃការចូលរួមរបស់ទ័ពអាមេរិកនៅក្នុងសង្រ្គាមលោកលើកទី១ កាលពីឆ្នាំ ១៩១៧ លោកត្រាំជួបលោកម៉ាក្រុងមួយទល់មួយនៅក្នុងវិមានប្រធានាធិបតីអេលីហ្សេ។ នេះមិនមែនជាជំនួបលើកដំបូងរវាងលោកត្រាំ និងលោកម៉ាក្រុងទេ នោះបើជាទោះបីជាលោកទាំងពីរទើបជាប់ឆ្នោតជាប្រធានាធិបតីសឹងតែដំណាលពេលគ្នាក៏ដោយ។ លោកត្រាំ និងលោកម៉ាក្រុងធ្លាប់បាននិយាយទូរស័ព្ទច្រើនដងជាមួយគ្នា និងធ្លាប់បានជួបគ្នាផ្ទាល់ចំនួនពីរដង ទី១ នៅក្នុងជំនួបកំពូល G៧ ក្នុងប្រទេសអ៊ីតាលីនាដំណាច់ខែឧសភា និងទី២ នៅក្នុងជំនួបកំពូល G២០ ក្នុងប្រទេសអាល្លឺម៉ង់នាដើមខែកក្កដាថ្មីៗនេះ។
នៅក្នុងជំនួបត្រាំ ម៉ាក្រុងថ្ងៃទី១៣ កក្កដា ឥស្សរជនទាំងពីរលើកយកប្រធានរឿងអន្តរជាតិជាច្រើនទៅជជែក រួមមានបញ្ហាអាកាសធាតុ វិបត្តិនៅក្នុងប្រទេសស៊ីរី នៅអ៊ុយក្រែន ឬមួយក៏បញ្ហានុយក្លេអ៊ែរកូរ៉េខាងជើង។ តែប្រធានរឿងអាទិភាពដែលមិនអាចខ្វះបានអាចមានពីរ ទី១ យុទ្ធនាការប្រយុទ្ធប្រឆាំងនឹងភេរវនិយម និងទី២ ពង្រឹង ការពារទំនាក់ទំនងទ្វេភាគីបារាំង អាមេរិក។ ជាទូទៅ យុទ្ធនាការប្រយុទ្ធប្រឆាំងនឹងភេរវនិយម និងសន្តិសុខជាសំណុំរឿងដែលអាមេរិក និងបារាំងបន្តនិយាយសម្លេងតែមួយដូចគ្នា និងជាសំណុំរឿងមួយដែលបានធ្វើឲ្យទំនាក់ទំនងរវាងក្រុងប៉ារីស និងក្រុងវ៉ាស៊ីតោនកាន់តែរឹងមាំ។
អាមេរិក និងបារាំងអាចនិយាយមិនចុះសម្រុងគ្នាលើរឿងផ្សេង តែរឿងផ្សេងហ្នឹងមិនមែនជាឧបសគ្គដែលរារាំងអាមេរិក និងបារាំងមិនឲ្យរួមសហការណ៍គ្នាក្នុងផ្នែកសន្តិសុខឡើយ ហើយវត្តមានរបស់លោកត្រាំនៅក្នុងពិធីប្រារព្ធគម្រប់ ១០០ឆ្នាំនៃការចូលរួមរបស់អាមេរិកជួយបារាំងទប់ទល់នឹងអាល្លឺម៉ង់ណាហ្សីកាលពី ១០០ឆ្នាំមុនពិតជាសក្ខីកម្មមួយមិនអាចប្រកែកបានទេ។ នៅក្នុងបទសម្ភាសន៍មួយឲ្យកាសែតបារាំងនាថ្ងៃទី១៣ កក្កដា លោកម៉ាក្រុងបានលើកឡើងពីកិច្ចសហប្រតិបត្តិការគំរូជាមួយអាមេរិកនៅក្នុងយុទ្ធនាការប្រឆាំងភេរវនិយមតាំងពីតំបន់មជ្ឈិមបូព៌ារហូតដល់ទ្វីបអាហ្រ្វិក។
លោកម៉ាក្រុងសង្ឃឹមជំនះលោកត្រាំក្នុងបញ្ហាអាកាសធាតុ
វត្តមានរបស់លោកដូណាល់ ត្រាំក្នុងប្រទេសបារាំងពេលនេះបានធ្វើឡើង ប៉ុន្មានថ្ងៃក្រោយជំនួបកំពូល G២០ ក្នុងប្រទេសអាល្លឺម៉ង់។ G២០ ដែលពិបាកនិយាយបញ្ចុះបញ្ចូលលោកត្រាំក្នុងសំណុំរឿងពីរ គឺពាណិជ្ជកម្ម និងបញ្ហាអាកាសធាតុ។ G២០ ដែលទើបបានបិទបញ្ចប់ថ្មីៗនេះបានយល់ព្រមធ្វើសម្បទានឲ្យអាមេរិកច្រើនណាស់នៅក្នុងសំណុំរឿងពាណិជ្ជកម្មអន្តរជាតិ និងបញ្ហាអាកាសធាតុដោយ G២០ សុខចិត្តទទួលយកការសម្រេចចិត្តរបស់លោកត្រាំក្នុងការដកអាមេរិកចេញពីកិច្ចព្រមព្រៀងក្រុងប៉ារីស។
តែទោះជាយ៉ាងនេះក្តី គ្រប់គ្នាកំពុងសង្ឃឹមលើលោកម៉ាក្រុងឲ្យនិយាយបញ្ចុះបញ្ចូលលោកត្រាំដោយគេយល់ថា ជាមួយនរណាមិនដឹងទេ តែបើជាមួយលោកដូណាល់ ត្រាំ អ្វីៗអាចទៅរួចទាំងអស់ ព្រោះលោកត្រាំជាប្រធានាធិបតីអាមេរិកទី១ ដែលផ្លាស់ប្តូរជំហរស្រេចតែចិត្ត ដោយគ្មានអ្នកណាម្នាក់ហ៊ានទាយទុកមុនបានទេ។ អ៊ីចឹងហើយបានជាពេលនេះ
គំនាបលើលោកត្រាំនៅក្នុងរឿងអាកាសធាតុកំពុងបន្តមានយ៉ាងផុសផុល ហើយរូបលោកម៉ាក្រុងខ្លួនឯងក៏ទើសទាល់ចិត្តចំពោះការសម្រេចរបស់លោកត្រាំដែរ។
អ៊ីចឹងហើយបានជានៅក្រោយជំនួប G២០ លោកម៉ាក្រុងធ្លាប់បានបញ្ជាក់ថា លោកនឹងបន្តលើកយកបញ្ហាអាកាសធាតុទៅនិយាយជាមួយលោកត្រាំផ្ទាល់នាពេលលោកត្រាំទៅទស្សនកិច្ចនៅប៉ារីស ពិសេសជំនះលោកត្រាំឲ្យទទួលយកកិច្ចព្រមព្រៀងក្រុងប៉ារីសឡើងវិញ។ បន្ទាប់មក លោកម៉ាក្រុងក៏បានសន្យាបើកជំនួបកំពូលថ្មីស្តីពីអាកាសធាតុនៅដើមខែធ្នូខាងមុខក្នុងក្រុងប៉ារីស។ ឃើញថា លោកម៉ាក្រុងបានដាក់គំនាបដោយប្រយោល និងដោយផ្ទាល់លើលោកត្រាំក្នុងរឿងអាកាសធាតុ។ លោកម៉ាក្រុងឆ្លៀតយកទំនាក់ទំនង និងកិច្ចសហប្រតិបត្តិល្អរវាងអាមេរិក និងបារាំងនៅក្នុងផ្នែកផ្សេងធ្វើជានុយដើម្បីបញ្ចូលលោកត្រាំឲ្យត្រឡប់ចូលរួមជាអន្តរជាតិក្នុងរឿងអាកាសធាតុ និងក៏ចង់បានការពន្យល់បំភ្លឺរបស់លោកត្រាំពីជំហរពិតប្រាកដរបស់លោកនៅក្នុងសំណុំរឿងអន្តរជាតិផ្សេងទៀតដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ