វិបត្តិអ៊ីស្រាអែល-ប៉ាឡេស្ទីន ៖ ក្រុមប្រឹក្សាសន្តិសុខកោះប្រជុំបន្ទាន់ នៅថ្ងៃចន្ទ
ជនប៉ាឡេស្ទីនពីរនាក់បានស្លាប់នៅថ្ងៃសៅរ៍ម្សិលមិញ នៅក្នុងការប្រឈមមុខជាមួយនឹងកងកម្លាំងសន្តិសុខអ៊ីស្រាអែល នៅក្រុងហ្សេរ៉ុយសាឡិម និងនៅ ស៊ីហ្ស័កដានី។ បណ្តាជនប៉ាឡេស្ទីននៅតែបន្តស្រែកទាមទារ ឱ្យអ៊ីស្រាអែលលុបចោលវិធានការសន្តិសុខ និងដកចេញទ្វារសុវត្ថិភាពចាប់ជាតិផ្ទុះ ដែលដាក់នៅមាត់ច្រកចូលទៅកាន់ទីលានវិហារអ៊ីស្លាម។ ភាពតានតឹងនិងហិង្សាកំពុងបន្តឆាបឆេះ ... បារាំង ស៊ុយអែត និងអេហ្ស៊ីប បានស្នើកោះប្រជុំបន្ទាន់ក្រុមប្រឹក្សាសន្តិសុខអង្គការសហប្រជាជាតិ។ ប្រតិកម្មអន្តរជាតិក៏មានច្រើនឱ្យរកមធ្យោបាយបន្ធូរបន្ថយសម្ពាធ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
ហ្សេរ៉ុយសាឡិម ស៊ីហ្សកដានី តំបន់ក្រោមអាណានិគមកិច្ចអ៊ីស្រាអែល ដែលគ្មានអន្តរជាតិណាទទួលស្គាល់ កំពុងស្ថិតក្នុងភាពតានតឹងបំផុត តាំងពីជាងមួយសប្តាហ៍មកហើយ។ សម្ព័ន្ធអារ៉ាបបានបន្ទោសអ៊ីស្រាអែល ថាកំពុងប្រលែងនឹងភ្លើង ! ការប៉ះទង្គិចរវាងប៉ូលិសអ៊ីស្រាអែលនិងបាតុករប៉ាឡេស្ទីនមានរាល់ថ្ងៃ ប៉ុន្តែភាពប្រឈមក្លាយជាអំពីហិង្សា មានដល់ស្លាប់និងរបួសជាច្រើននាក់ បានផ្ទុះឡើងថ្ងៃសុក្រ និងបន្តមកទល់នឹងថ្ងៃសៅរ៍នេះទៀត។ ជនប៉ាឡេស្ទីនពីរនាក់បានស្លាប់ ដោយគ្រាប់កាំភ្លើងរបស់ប៉ូលិសអ៊ីស្រាអែល។
នៅចំពោះមុខការរីករាលដាលនេះអំពើហិង្សា ប្រទេសបារាំង អមដោយស៊ុយអែត និងអេហ្ស៊ីប បានស្នើបើកជំនួបប្រជុំបន្ទាន់ក្រុមប្រឹក្សាសន្តិសុខ នៅថ្ងៃចន្ទស្អែកនេះ ដើម្បីជជែកគ្នាឱ្យបានឆាប់ៗថាតើត្រូវធ្វើសេចក្តីអំពាវនាវបែបណាសម្រាប់បញ្ចុះកំហឹង។
ក្នុងពេលនេះ ក្រុមQuartette (សហរដ្ឋអាមេរិក រុស្ស៊ី សហភាពអឺរ៉ុប និងអង្គការសហប្រជាជាតិ) បានអំពាវនាវ ឱ្យភាគីទាំងពីរ អ៊ីស្រាអែល និងប៉ាឡេស្ទីន ប្រឹងអត់ធ្មត់ បញ្ចៀសរាល់សកម្មភាពនាំឱ្យមានញុះញង់ហិង្សា ហើយត្រូវធ្វើការរួមគ្នា ដើម្បីសម្រួលស្ថានការណ៍។ ក្រុមបួនភាគីនេះ ចង់ឃើញអ៊ីស្រាអែលនិងហ្ស័កដានី កានដៃគ្នារកដំណោះស្រាយរួម ដើម្បីសុវត្ថិភាពនិងសន្តិសុខគ្រប់ភាគី។ បើតាមសេចក្តីថ្លែងការណ៍របស់ក្រុម Quartette នាយករដ្ឋមន្ត្រីអ៊ីស្រាអែលបានធានាអះអាងថាគោរពនិងរក្សា ទីតាំងសក្តិសិទ្ធិ តាមលក្ខខន្តិកៈStatut quoហើយ។
ប៉ាឡេស្ទីនដែលបានប្រកាសផ្អាករាល់គ្រប់ទំនាក់ទំនងផ្លូវការជាមួយអ៊ីស្រាអែល ត្រូវការឱ្យរដ្ឋាភិបាលអ៊ីស្រាអែលលុបវិធានការនិងដកទ្វារសុវត្ថិភាពចាប់ជាតិផ្ទុះចេញពីទីលានក្រុងចាស់ ហ្សេរ៉ុយសាឡិម ព្រោះទង្វើបែបនេះ គឺប្រៀបដូចអ៊ីស្រាអែលចង់ក្រសោបគ្រប់គ្រងក្រុងហ្សេរ៉ុយសាឡិម។ ទីលានហ្សេរ៉ុយសាឡិម ក្រុងសក្តិសិទ្ធិ ជាទីសក្ការៈនៃសាសនាអ៊ីស្លាមផង សាសនាជ្វីហ្វផង តែស្ថិតក្រោមការគ្រប់គ្រងរបស់ហ្ស័កដានី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ