មេចារកិច្ចអាមេរិកនិងមេក្រុមហាម៉ាសជួបចរចាជាថ្មីនៅអេហ្ស៊ីបដើម្បីរកបទឈប់បាញ់នៅហ្កាហ្សា
ប្រទេសអេហ្ស៊ីប បានបញ្ជាក់ថាគណៈប្រតិភូក្រុមហាម៉ាស បានមកដល់រដ្ឋធានីគែរ នៅថ្ងៃសៅរ៍ ទី៤ឧសភា ដើម្បីពិភាក្សាចំពោះសំណើចរចា ដែលអ៊ីស្រាអែលបានសម្រេចយល់ព្រម។ ចំណែកសហរដ្ឋអាមេរិកសម្ព័ន្ធមិត្តអ៊ីស្រាអែល គឺតំណាងដោយប្រធានក្រុមចារកិច្ចស៊ីអាយអេ ដែលបានអញ្ជើញទៅដល់ប្រទេសអេហ្ស៊ីប តាំងតែពីល្ងាចថ្ងៃសុក្រមកម្ល៉េះ។ ជាមួយគ្នានេះដែរ ប្រមុខទូតអាមេរិក លោក អង់តូនី ប្ល៊ីងកិន បានថ្លែងក្នុងវេទិកាមួយ នៅរដ្ឋអារីហ្សូណា ថា លើកនេះ សំណើនិងការសន្យាព្រមព្រៀងរបស់អ៊ីស្រាអែល ល្អខ្លាំងណាស់។
ចុះផ្សាយនៅថ្ងៃ៖
ស្តាប់ - ០២:២៤
ក្នុងជម្លោះសង្គ្រាមនៅហ្កាហ្សា អន្តរការីក្នុងការចរចាបទឈប់បាញ់រវាងអ៊ីស្រាអែលនិងក្រុមហាម៉ាស មាន៣ប្រទេសសំខាន់ គឺអេហ្ស៊ីប កាតារ និងសហរដ្ឋអាមេរិក។ បន្ទាប់ពីចរចាមិនបានសម្រេចជាច្រើនដងនៅកាតាររួចមក ពេលនេះ គេប្តូរកន្លែងទៅអេហ្ស៊ីបម្តង។ ប្រភពពីអេហ្ស៊ីបបានបញ្ជាក់នៅថ្ងៃសៅរ៍ ថា លោក Khalil al-Hayya មេធំទី២របស់ក្រុមហាម៉ាស ដែលកាន់ក្តាប់កិច្ចការផ្នែកនយោបាយរបស់ចលនាអ៊ីស្លាមប៉ាឡេស្ទីន បានចេញដំណើរមកដល់ក្រុងគែរ។ ក្រុងគែរ ជាទីដែល លោក William Burns មេក្រុមចារកិច្ចអាមេរិក ស៊ីអាយអេ មានវត្តមានរង់ចាំស្រេច តាំងពីល្ងាចថ្ងៃសុក្រ។
ប្រភពស្និទ្ធនឹងក្រុមប្រទេសសម្របសម្រួលក្នុងការចរចាគ្នាគ្រានេះ បានឲ្យដឹងថា ក្នុងកិច្ចពិភាក្សាកាលពីសប្តាហ៍មុន ភាគីអ៊ីស្រាអែល បានយល់ព្រមចំពោះសំណើដោះដូរចំណាប់ខ្មាំងអ៊ីស្រាអែល យ៉ាងហោច ជាង ៤០នាក់ ជាថ្នូរនឹងអ្នកទោសប៉ាឡេស្ទីន ក្នុងចំនួនប្រហាក់ប្រហែលគ្នា ដែលកំពុងជាប់ឃុំនៅពន្ធធនាគារអ៊ីស្រាអែល។ ចំណុចទី១ទៀត អ៊ីស្រាអែលយល់ព្រមឈប់បាញ់មួយរយៈ ហើយនិង អនុញ្ញាតឲ្យធ្វើចរាចរផ្លាស់ទី នៅប៉ែកខាងជើង និងខាងត្បូងតំបន់ហ្កាហ្សា។ មិនតែប៉ុណ្ណោះ អ៊ីស្រាអែល ក៏សន្យាថានឹងដកកងទ័ពចេញមួយចំនួនផង។
ប្រមុខទូតអាមេរិក លោក អង់តូនី ប្ល៊ីងកិន ដែលបានទៅបញ្ចុះបញ្ចូលអ៊ីស្រាអែល ក្នុងសប្តាហ៍នេះ បានប្រកាសថា សំណើនិងការសន្យារបស់អ៊ីស្រាអែល ល្អខ្លាំង និងបង្ហាញពីសន្តានចិត្តល្អ របស់អ៊ីស្រាអែល។ រដ្ឋមន្រ្តីក្រសួងការបរទេសអាមេរិក ថែមទាំងព្រលយពាក្យដែរថា គឺមានតែក្រុមប្រដាប់អាវុធហាម៉ាសតែមួយប៉ុណ្ណោះ ដែលជាបញ្ហាលំបាកជាឧបសគ្គចំពោះពលរដ្ឋប៉ាឡេស្ទីន និងឧបសគ្គចំពោះកិច្ចព្រមព្រៀងឈប់បាញ់នៅហ្កាហ្សា។
កាលពីថ្ងៃព្រហស្បតិ៍ នាយករដ្ឋមន្រ្តីអ៊ីស្រាអែល លោក បេនចាមិន នេតាន់យ៉ាហ៊ូ បានព្រមានបន្ថែមទៀតថានឹងប្រើគ្រប់មធ្យោបាយដែលចាំបាច់ ដើម្បីវាយផ្តាច់យកជ័យជម្នះ និងផ្ចាញ់គូសត្រូវឲ្យបាន រួមទាំងសត្រូវនៅតំបន់រ៉ាហ្វាហ៍ ផង។ សម្តីដូច្នេះត្រូវ ក្រុមហាម៉ាស វាយបកទៅវិញនៅថ្ងៃសុក្រ ដោយចាត់ទុកលោក នេតាន់យ៉ាហ៊ូ ថាកំពុងតែចង់បំផ្លាញការខិតខំប្រឹងប្រែងចរចាគ្នាឲ្យឈានទៅរកបទឈប់បាញ់ ហើយនិងនាំឲ្យមានមន្ទិលសង្ស័យចំពោះកិច្ចព្រមព្រៀងដោះដូរចំណាប់ខ្មាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ