ក្រិករងគ្រោះភ្លើងឆេះព្រៃធ្ងន់ធ្ងរ អំពាវនាវសុំជំនួយពីប្រទេសដៃគូ
ចំនួនជនរងគ្រោះបាត់បង់ជីវិតក្នុងគ្រោះអគ្គីភ័យ បានកើនឡើងដល់៥០នាក់ និងរបួសយ៉ាងហោចណាស់១៧២នាក់ផ្សេងទៀត។ នេះបើតាមតុល្យការបណ្តោះអាសន្នរបស់រដ្ឋាភិបាល នៅព្រឹកថ្ងៃអង្គារទី ២៤ កក្កដា ! អគ្គីភ័យបាននិងកំពុងបន្តឆាបឆេះទៀត ពេញមួយយប់មិញ នៅតាមតំបន់ព្រៃក្បែររដ្ឋធានីអាថែន។ ប្រឈមនឹងគ្រោះដ៏ធ្ងន់ធ្ងរបែបនេះ រដ្ឋាភិបាលក្រិកបានធ្វើសេចក្តីអំពាវនាវសុំកម្លាំងជំនួយអឺរ៉ុប ដើម្បីការពារជនស៊ីវិល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
អគ្គីភ័យ បានផ្តើមឆាបឆេះព្រៃ ព្រមគ្នាចំនួន១៥កន្លែង នៅថ្ងៃចន្ទម្សិលមិញ ក្នុងតំបន់ប្រវត្តិសាស្ត្រនៃក្រុងអាថែន ក្នុងសន្ទុះដែលមិនអាចគ្រប់គ្រងបាន ! ផ្ទះសម្បែងជាច្រើនខ្នងត្រូវបំផ្លាញ ចរាចរណ៍ធ្វើដំណើរត្រូវរងការរំខាន និងមានការបាត់បង់ជីវិតមនុស្សជាច្រើននាក់។ សាកសពមនុស្សឆេះខ្លោច២៦នាក់ ទើបត្រូវបានរកឃើញនៅព្រឹកថ្ងៃអង្គារនេះ។ ជនរងគ្រោះទាំងនោះទំនងជារត់គេចខ្លួនទៅរកសមុទ្ទមិនទាន់។
តាំងពី និងពេញមួយយប់មិញ អាជ្ញាធរក្រិក បានប្រើគ្រប់មធ្យោបាយដើម្បីជម្លៀសប្រជាពលរដ្ឋ និងទេសចរដែលភាគច្រើនបាននាំគ្នារត់គេចពីភ្លើងឆេះព្រៃ ឆ្ពោះទៅឆ្នេរសមុទ្ទ។ នាវាល្បាត៩គ្រឿង នាវាយោធាពីរគ្រឿង និងនាវាឯងជន ព្រមទាំងឧទ្ទម្ភាគចក្រយោធាជាច្រើនគ្រឿង បានមកចូលរួមធ្វើប្រតិបត្តិការសង្គ្រោះនេះ ទន្ទឹមនឹងក្រុមពន្លត់អគ្គីភ័យជាង៦រយនាក់។
ក្រិកក៏បានបើកយន្តការអឺរ៉ុបការពារជនស៊ីវិលដើម្បីបានទទួលជំនួយពីដៃគូក្នុងសហភាព។ បន្ថែមពីអេស្ប៉ាញ និងស៊ីប អ៊ីស្រាអែល ក៏បានបញ្ជូនកម្លាំងជំនួយមកហើយដែរ។ ក្រិកក៏បានស្នើសុំជំនួយដ្រូនអាមេរិក ដើម្បីហោះឆ្វែលតាមដានក្រែងឃើញមានសកម្មភាពសង្ស័យ ទាក់ទងនឹងការឆេះព្រៃ។
ហេតុការណ៍ឆេះព្រៃនេះ បានកើតឡើងក្នុងខណៈដែលក្រិកមានអាកាសធាតុក្តៅខ្លាំង រហូតដល់ជាង៤០អង្សារ នៅទូទាំងប្រទេស នារយៈពេលប៉ុន្មានថ្ងៃចុងក្រោយនេះ។ បើតាមការិយាល័យឧតុនិយម សីតុណ្ហភាពនឹងអាចធ្លាក់ចុះបន្តិច និងមានភ្លៀង តែមិនគ្រប់គ្រាន់នឹងសម្រួលស្ថានការណ៍បានទេ។ ក្រិកធ្លាប់រងគ្រោះអគ្គីភ័យឆេះព្រៃដ៏ធ្ងន់ធ្ងរបំផុត នៅឆ្នាំ ២០០៧ ដោយបានផ្តាច់ជីវិតមនុស្សអស់ ៧៧នាក់ និងត្របាក់បំផ្លាញព្រៃអស់២៥ម៉ឺនហិចតារ។
គ្រោះអគ្គីភ័យនេះ បានជំរុញឱ្យនាយករដ្ឋមន្ត្រី អាឡិចស៊ី ស៊ីប្រាស បង្ខើចទស្សនកិច្ចនៅបូស្នី ហើយរួសរាន់ត្រលប់ចូលប្រទេសដើម្បីស្រួលតានដានប្រតិបត្តិការសង្គ្រោះ។ ចំណែកប្រធានាធិបតី ក៏បានសម្រេចលុបចោលពិធីលាងសាយភោជន៍នៅយប់នេះ ដែលជាថ្ងៃប្រារព្ធខួបប្រជាធិបតេយ្យក្រិក។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ