ហេតុអ្វីបានជាទីភ្នាក់ងារអវកាសណាសា បញ្ជូនរ៉ូបូទៅសិក្សាភពអង្គារ?
ចុះផ្សាយនៅថ្ងៃ៖
ស្តាប់ - ០៦:៥៨
ដូចការព្រាងទុកយានអវកាស Insight របស់ទីភ្នាក់ងារ ណាសាដែលមានផ្ទុកម៉ាស៊ីន រ៉ូបូ បានទៅចុះចត ដោយជោគជ័យ លើភពព្រះអង្គារ កាលពី ថ្ងៃចន្ទ (ម៉ោង ១៩និង ៥៣វិនានទី ម៉ោងសកល) បន្ទាប់ពី ហោះចេញពីផែនដី កាលពីខែឧសភា។ ជាមួយនឹងសម្រែកត្រេកអររបស់អ្នកវិទ្យាសាស្រ្ត ទីភ្នាក់ងារណាសាបានបញ្ចេញឲ្យឃើញរូបភាពដំបូង ដែលម៉ាស៊ីនរ៉ូបូ Insight បានថតភ្លាម នៅពេលទៅចុះចតដល់ឋានព្រះអង្គារ។
យានអវកាសរបស់ទីភ្នាក់ងារណាសា បានទៅចុះចត នៅលើភពព្រះអង្គារ កាលពីយប់ថ្ងៃចន្ទម្សិលមិញ។ បេសកកម្មមួយនេះ ត្រូវបានចាក់បញ្ចាំងផ្ទាល់ នៅកណ្តាលក្រុងញូវយ៉ក ចំណែក ប្រធានាធិបតីអាមេរិក លោកដូណាល់ ត្រាំ ក៏បានទូរស័ព្ទទៅអបអរ ក្រុមការងាររបស់ទីភ្នាក់ងារអវកាសណាសា ដែលបានលោតត្រេកអរពេញបន្ទប់ នៅក្រោយឃើញ យានអវកាស Insightបានទៅចុះចត ដោយជោគជ័យលើឋានព្រះអង្គារ។
សម្រាប់អ្នកវិទ្យាសាស្រ្តរបស់ណាសា ការទៅចុះចត ដោយជោគជ័យ ហើយអ្វីៗ ក៏ដំណើរការទៅតាមការគ្រោងទុក គឺប្រៀបបាននឹងការធូរស្រាលចិត្តមួយផ្នែកធំរបស់ទីភ្នាក់ងារណាសា។ អ្នកវិទ្យាសាស្រ្ត របស់ណាសា បានធ្វើការ ៧ឆ្នាំ ដើម្បីកសាងយានអវកាស Insight ដែលមានតម្លៃ ៩៩៣លានដុល្លារ។
យានអវកាស Insight ដែលមានទម្ងន់ ៣៦០គីឡូក្រាម និងដែលត្រូវបានបាញ់បង្ហោះចេញពីផែនដី កាលពី ថ្ងៃទី ៥ឧសភា ឆ្នាំនេះ បានទៅចុះចត នៅខែវិច្ឆិកា តាមការគន់គូរ គ្រោងទុក មុនរបស់ណាសា។ យានអវកាស Insight បានចំណាយពេលដល់៦ខែ មុននឹងហោះទៅចុះចតបានសម្រេច នៅលើភពព្រះអង្គារ ដែលស្ថិតនៅចម្ងាយ ប្រមាណ ៤៨០លានគីឡូម៉ែត្រ។
ទីភ្នាក់ងារណាសា របស់អាមេរិក ជាទីភ្នាក់ងារតែមួយ ក្នុងលោក ដែលមានសមត្ថភាពបញ្ជូន យានអវកាសរបស់ខ្លួនទៅចុះចត ដោយជោគជ័យ នៅលើឋានព្រះអង្គារ។ ត្រូវដឹងថា នៅក្នុងចំណោមបេសកកម្មបាញ់បង្ហោះយានអវកាសទៅសិក្សាភពព្រះអង្គារ ចំនួន ៤១ ក្នុងពិភពលោក ដែលមានចាប់តាំងពីឆ្នាំ ១៩៦០ បេសកកម្មចំនួន ២០រៀបចំឡើងដោយណាសា។ យានអវកាស Insight នៅថ្ងៃម្សិលមិញ ជាយានទី៨ ដែលណាសាបានបញ្ជូន ទៅចុះចត នៅភពអង្គារ។ ពោល គឺនៅ៧ឆ្នាំក្រោយ ដែល ណាសា បានបញ្ជូនទៅចុះចត ដោយជោគជ័យម្តងហើយ Curiosity កាលពីឆ្នាំ ២០១២។
នៅក្នុងបេសកកម្មលើកនេះ ណាសា បានបញ្ជូន យានអវកាសគ្មានមនុស្ស ដែលហោះលឿនជាងគ្រាប់កាំភ្លើងដល់ទៅ ៣ ៤ដង គឺក្នុងល្បឿន ជិត ២ម៉ឺនគីឡូម៉ែត្រក្នុងមួយម៉ោង និងដែលអាចធន់នឹងកំដៅ ដល់ទៅ ១៥០០អង្សា។
ក្នុងរយៈពេលតិចជាង ៧នាទី យានអវកាសបញ្ចុះល្បឿ ពី១៩ ៨០០គីឡូម៉ែត្រ មកនៅត្រឹម ៨គីឡូម៉ែត្រ ក្នុងមួយម៉ោង
នៅថ្ងៃម្សិលមិញ នៅក្នុងសន្និសីទកាសែត នៅមជ្ឈមណ្ឌល ត្រួតពិនិត្យបេសកកម្មរបស់Insigth ដែលស្ថិតនៅក្នុងមន្ទីរពិសោធន៍ Jet Propulsion ក្នុងរដ្ឋកាលីហ្វនីញ៉ា អ្នកវិទ្យាសាស្រ្តបាននិយយាថា រយៈពេលនៃការចុះចត គឺមានប្រមាណតែ ៦នាទីកន្លះតែប៉ុណ្ណោះ។ តាមការរៀបរាប់របស់អ្នកវិទ្យាសាស្រ្តណាសា នៅក្នុងពេលហោះក្នុងល្បឿនដ៏លឿនជាងគ្រាប់កាំភ្លើងទៅក្នុងបរិយាកាសរបស់ឋានព្រះអង្គារ យានអវកាស Insight ត្រូវបើកខែល ការពារភ្លើង ដែលឆេះ ដោយសារសម្ពាធបរិយាកាស។ បន្ទាប់មក នៅចម្ងាយ ប៉ុន្មានរយគីឡូម៉ែត្រ ពីភពអង្គារ យានអវកាសបានបញ្ចេញឆ័ត្រយោង ដើម្បី បញ្ចុះល្បឿន ខ្លាំងមែនទែន ពីជិត ២ម៉ឺនគីឡូម៉ែត្រ ក្នុងមួយម៉ោង មកនៅត្រឹម ៨គីឡូម៉ែត្រក្នុងមួយម៉ោងវិញ។ គឺនៅពេលបន្ថយល្បឿនេះឯង យានអវកាស ទៅតាមកម្មវិធីដើរដោយស្វ័យប្រវត្តិ បានបញ្ចេញជើងទ្រ ដើម្បី ទៅដាក់សន្សឹមៗ លើឋានព្រះអង្គារ គឺនៅមុនថតរូបមួយប៉ុស្ត បញ្ជូនមកផែនដីវិញ ដើម្បី បញ្ជាក់ថា Insight បានចុះចតដោយជោគជ័យហើយ នៅលើភពក្រហម ភពអង្គារ។
នៅថ្ងៃចន្ទ យានអវកាស Insight បានដាក់តាំងទីរ៉ូបូ ដោយសុវត្ថិភាព នៅលើភពអង្គារ និងបានចាប់បញ្ចេញផ្ទាំងសូ្របកំដៅព្រះអាទិត្យ ដើម្បីបានថាមពលទុកប្រើប្រាស់ សម្រាប់ដំណើរការរយៈពេល ១ឆ្នាំ នៅលើឋានព្រះអង្គារ ដែលស្មើនឹងរយៈពេល២ឆ្នាំ ពេលវេលារបស់ផែនដី។
Insightជាម៉ាស៊ីនពេលវេលា វិលត្រលប់ទៅសិក្សាភូមិសាស្រ្តកាលពីអតីតកាល
ខុសពីលើកមុនៗ ដែលគ្រាន់តែផ្តោតសំខាន់ ទៅលើរបៀបចុះចត ដោយគ្មានគ្រោះថ្នាក់ លើភពព្រះអង្គារ ណាសា លើកនេះ បានបញ្ជូនយានអវកាស Insight ជាមួយ ឧបករណ៍ សំខាន់ ដើម្បីសិក្សា ទាំងពីបរិយាកាស និងស្ថានភាពក្រោមដីរបស់ឋានព្រះអង្គារ។
នៅក្នុងរយៈពេល ពី ២ ទៅ៣ខែខាងមុខ រ៉ូបូរបស់យានអវកាស Insight នឹងបញ្ចេញ បោះទីតាំងឧបករណ៍ ដែលខ្លួននាំទៅជាមួយ ដូចជា ឧបករណ៍របស់បារាំង សម្រាប់ស្ទង់ ប្រមូលទិន្នន័យស្តីពីគ្រោះរញ្ជួយដី ហើយនិងលក្ខខ័ណ្ឌអាកាសធាតុ នៅលើភពព្រះអង្គារ។ ចំណែកឧបករណ៍មួយប្រភេទទៀត ដែលផលិតដោយទីភ្នាក់ងារអវកាសអាល្លឺម៉ង់ នឹងត្រូវបុកចូលទៅដី ជម្រៅ ៥ម៉ែត្រ ដើម្បីសិក្សាស្វែងយល់ថា តើក្រោមដីរបស់ភពអង្គារ ជាសារធាតុរឹង ឬក៏រាវ។
ស្វែងយល់លំអិតពីអាកាសធាតុ នៅលើភពព្រះអង្គារ ដែលនឹងអាចឲ្យគេដឹង បណ្តើរៗ នៅឆ្នាំ ក្រោយ គឺជារឿងសំខាន់ណាស់ សម្រាប់ទីភ្នាក់ងារណាសា ដែលគ្រោងនឹងបញ្ជូនមនុស្សទៅសិក្សា ពីភពព្រះអង្គារ នៅរវាងឆ្នាំ ២០៣០។ ណាសា ធ្លាប់បានរកឃើញថា សីតុណ្ហភាព នៅភពព្រះអង្គារ នៅត្រង់ខ្សែរអេក្វាទ័រ មានប្រមាណ ២០អង្សារសេ នៅពេលថ្ងៃ ប៉ុន្តែ អាកាសធាតុបានចុះត្រជាក់ខ្លាំង នៅពេលយប់ រហូតដល់ដក ៧៣អង្សារសេ។ ទិន្នន័យស្តីពីការប្រែប្រួលអាកាសធាតុនៅលើភពព្រះអង្គារនឹងជួយឲ្យណាសាអាចប្រុងប្រៀប ត្រៀម ឧបករណ៍សម្រាប់បេសកកម្មបញ្ជូនមនុស្សទៅភពព្រះអង្គារ។
បេសកកម្មទៅការសិក្សាភពក្រហម ភពអង្គារ គឺប្រៀបបាននឹងម៉ាស៊ីនដែលជួយឲ្យគេត្រលប់ទៅអតីតកាល ទៅឲ្យគេស្វែងយល់ ពីការកកើតឡើងដំបូងនៃភពព្រះអង្គារ។ បើគេដឹងតើ ភពអង្គារ បានកកើត ហើយនិងវិវឌ្ឍយ៉ាងម៉េច កាលពី៣ពាន់លានឆ្នាំមុន នោះ គេក៏អាចស្វែងយល់ដឹងពីប្រភព រូបរាងដំបូងរបស់ផែនដីយើង ដែរ។ ដោយសិក្សាទៅលើកម្រិតរញ្ជួយរបស់ភពអង្គារ អ្នកវិទ្យាសាស្រ្តសង្ឃឹមបំបែកអាថ៌កំបាំង នៃការបង្កើតភព ក្នុងប្រព័ន្ធព្រះអាទិត្យ ហើយនិងអាចឲ្យគេដឹងថា ហេតុអ្វីបានជាផែនដីអាចកកើតមានជីវិត រស់នៅបាន ក្នុងពេល ភពអង្គារក្លាយជាវាលរហោឋានដ៏ត្រជាក់ ចំណែក ភពសុក្រវិញ គឺក្តៅដុតឆេះ តែក្នុងមួយវិនាទីតែប៉ុណ្ណោះ៕
{{ scope.legend }}
© {{ scope.credits }}ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ