ភពព្រះអង្គារ៖ យានSchiaparelli ទៅដល់ចុះចត តែបាត់ដំណឹងឈឹង
យាន Schiaparelli ដែលជាបេសកកម្មរួមរវាងអ្នកវិទ្យាសាស្ត្រអឺរ៉ុបនិងរុស្ស៊ី បានទៅចុះចត ស្រង់យកទិន្ន័យនៅលើភពព្រះអង្គារកាលពីថ្ងៃពុធ ទី១៩តុលា បន្ទាប់ពីបានហោះកាត់លំហរអាកាស អស់រយៈពេល៧ខែ។ ក៏ប៉ុន្តែក្នុងពេលនេះ អ្នកវិទ្យាសាស្ត្រកំពុងមានការព្រួយបារម្ភ ដោយសារយាននេះ បានបាត់ដំណឹងឈឹងសូន្យ មិនអាចទាក់ទងបាន ពេលដែលបានទៅដល់ភពព្រះអង្គារ។ គេកំពុងតែតាមដានស្វែងយល់ពីមូលហេតុ ដែលអាចបណ្តាលមកពីការចុះចតដោយបរាជ័យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
ទីភ្នាក់ងារស្រាវជ្រាវអវកាសអឺរ៉ុប និងរុស្ស៊ីបានសហការគ្នា បាញ់បង្ហោះយានអវកាសTGO ដែលបានផ្ទុកក្បាលយានស្រង់ទិន្ន័យឈ្មោះ Schiaparelli ទៅភពព្រះអង្គារ ដើម្បីសាកល្បងពីរបៀបចុះចតលើភពព្រះអង្គារ ប្រកបដោយសុវត្ថិភាព ។ បន្ទាប់ពីបានធ្វើដំណើរអស់រយៈពេល៧ខែ យានSchiaparelli បានផ្តាច់ខ្លួនចេញពីយានអវកាសTGO ដើម្បីបន្ទាបខ្លួនចូលទៅក្នុងបរិយាកាសរបស់ភពព្រះអង្គារ ក្នុងល្បឿន២១០០០គីឡូម៉ែត្រ ក្នុងមួយម៉ោង។ ក្រោយមកទៀត រយៈពេល៣ថ្ងៃ យានSchiaparelli បានចូលខ្លួនសំដៅចុះចតនៅលើភពព្រះអង្គារ ដោយមានជំនួយពីឧបករណ៍ចំហាយទឹកពិសេស ជួយកាត់បន្ថយល្បឿនបន្តិចម្តងៗ មុននឹងបានចុះចតនៅថ្ងៃពុធ ទី១៩ តុលា ម៉ោង៤ និង៤៨នាទីរសៀល ម៉ោងនៅប្រទេសបារាំង។
ថ្លែងប្រាប់អ្នកកាសែតពីមជ្ឈមណ្ឌលប្រតិបត្តិការអវកាសអឺរ៉ុបនៅទីក្រុង Darmstadt ប្រទេសអាល្លឺម៉ង់ លោកAndrea Accomozo នាយកបេសកកម្មអន្តរភពនៃទីភ្នាក់ងារអវកាសអឺរ៉ុប បានបញ្ជាក់ថា អ្វីៗបានដំណើរការទៅយ៉ាងស្រួលរហូតដល់នាទីចុងក្រោយ ដែលយាន Schiaparelli នេះបានបាញ់បញ្ចេញឆ័ត្រយោងដោយខ្លួនឯង រហ័សពេក លឿនជាងអ្វីដែលបានគ្រោងទុក។ ពេលនេះក្រុមអ្នកវិទ្យាសាស្ត្រកំពុងតែតាមដានយ៉ាងជាប់ជានិច្ច ដើម្បីឲ្យប្រាកដថា យាននេះនៅតែដំណើរការ រឺមួយក៏ការចុះចតបានជួបបរាជ័យទាំងស្រុង។ យ៉ាងណាក៏ដោយ ក្នុងកំឡុងពេលបន្ទាបខ្លួន យាននេះ មានដំណើរការធម្មតាទេ ដោយបានបញ្ជូនរលកសញ្ញា ចាប់បានដោយ Radiotelescope របស់ឥណ្ឌា។ អ្នកវិទ្យាសាស្ត្រ នៅមិនទាន់អស់សង្ឃឹមទាំងស្រុងទេ។
គួររំលឹកថា ការបាញ់បញ្ជូនយាន Schiaparelli ទៅភពព្រះអង្គារនេះ គឺជាការសាកល្បងលើកទីពីរហើយ សម្រាប់ទីភ្នាក់ងារអវកាសអឺរ៉ុប ដើម្បីស្វែងយល់ពីរបៀបចុះចត។ លើកទីមួយបានជួបបរាជ័យម្តងទៅហើយ កាលពី១៣ឆ្នាំមុន ដោយយានឈ្មោះ Beagel2 បច្ចេកវិទ្យារបស់អង់គ្លេស បានចុះចតលើភពព្រះអង្គារ តែបាត់ដំណឹងសូន្យ។ បេសកកម្មថ្មីនេះ គឺជាការសាកល្បងម្តងទៀត មុននឹងសម្រេចបញ្ជូនយានរ៉ូបូស្រង់ទិន្ន័យមែនទែន នៅឆ្នាំ២០២០។ រហូតមកដល់ពេលនេះ មានតែក្រុមអ្នកស្រាវជ្រាវអវកាសអាមេរិកមួយគត់ ដែលបានបញ្ជូនយានរ៉ូបូ ទៅចុះចតស្រង់ទិន្ន័យលើភពព្រះអង្គារ ប្រកបដោយជោគជ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ