ប្រទេសរូម៉ានីធ្វើប្រធានផ្លាស់វេនក្រុមប្រឹក្សាអឺរ៉ុបនៅក្នុងបរិបទជម្លោះរវាងគ្នា
ចាប់ពីថ្ងៃទី១ មករា ប្រទេសរូម៉ានីឡើងអង្គុយកៅអីប្រធានផ្លាស់វេនក្រុមប្រឹក្សាអឺរ៉ុបរយៈពេល ៦ខែ។ វត្តមានរូម៉ានីជាប្រធានផ្លាស់វេនអឺរ៉ុបពេលនេះបានកើតមានឡើងនៅបរិបទតានតឹងខ្លាំងរវាងរដ្ឋាភិបាលទីក្រុងប៊ុយការ៉េស និងរដ្ឋអំណាចអឺរ៉ុបក្នុងទីក្រុងព្រុចសែល។ អ្វីដែលសហភាពអឺរ៉ុបបន្តមិនសប្បាយចិត្តចំពោះរូម៉ានី គឺការដែលសមាជិកអឺរ៉ុបមួយនេះបានធ្វើកំណែទម្រង់ប្រព័ន្ធតុលាការរបស់ខ្លួន។ ទន្ទឹមគ្នានេះ សហភាពអឺរ៉ុបក៏កំពុងបារម្ភខ្លាំងពីការប្រេះឆាផ្ទៃក្នុងនៅក្នុងអំណាចនីតិប្រតិបត្តិរូម៉ានីដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
សង្រ្គាមប៉ាកកាដែលកំពុងអូសបន្លាយរវាងសហភាពអឺរ៉ុប និងប្រទេសរូម៉ានីពេលនេះនាំឲ្យគេនឹកឃើញដល់ការប្រទាញប្រទង់ដូចគ្នារវាងប្រទេសប៉ូឡូញ សហភាពអឺរ៉ុប និងរវាងប្រទេសហុងគ្រី សហភាពអឺរ៉ុប។ នៅក្នុងខែវិច្ឆិកាឆ្នាំ ២០១៨ សភាអឺរ៉ុបបានអនុម័តសេចក្តីសម្រេចមួយដោយទាមទាររដ្ឋាភិបាលនៃប្រទេសរូម៉ានីកុំឲ្យជាន់ឈ្លីនីតិរដ្ឋតាមរយៈកំណែទម្រង់លើប្រព័ន្ធតុលាការរបស់ខ្លួន។ កំណែទម្រង់ដែលសហភាពអឺរ៉ុបយល់ថា ជាការគំរាមកំហែងលើយុទ្ធនាការប្រឆាំងអំពើពុករលួយ និងលើឯករាជ្យភាពរបស់ក្រុមចៅក្រម។
ទោះជាយ៉ាងនេះក្តី របបក្រុងប៊ុយការ៉េសហាក់មិនបានយកត្រចៀកស្តាប់ និងថែមទាំងត្រៀមរៀបចំច្បាប់លើកលែងទោសមួយឲ្យបានឆាប់ដើម្បីជួយស្រង់ថ្នាក់ដឹកនាំនយោបាយដែលកំពុងស្ថិតក្នុងផ្ទាំងស៊ីបតុលាការ ពិសេសមនុស្សខ្លាំងនៅរូម៉ានីលោក Liviu Dragnea ដែលបច្ចុប្បន្នជាប្រធានគណបក្សសង្គមប្រជាធិបតេយ្យ និងជាប្រធានសភា។ តែជាមួយនឹងការកាត់ទោសច្រើនដងនៅក្នុងសំណុំរឿងផ្សេងៗគ្នា លោក Liviu ដែលធ្លាប់កាន់តំណែងរដ្ឋមន្រ្តីច្រើនដងមិនអាចទទួលតំណែងនាយករដ្ឋមន្រ្តីបានឡើយ។
ប៉ុន្តែទន្ទឹមគ្នានេះ គណបក្សរបស់លោក Liviu ដែលកំពុងកាន់អំណាចនៅរូម៉ានីក៏មិនញញើតនឹងចេញមុខប្រឆាំងសហភាពអឺរ៉ុបដោយចាត់ទុកអឺរ៉ុបជាសហគមន៍វិសមធម៌ដែលបានបដិសេធលើសិទ្ធិបញ្ចេញមតិរបស់ពលរដ្ឋរូម៉ានី។ ក្រៅពីបារម្ភលើកំណែទម្រង់ប្រព័ន្ធតុលាការ សហភាពអឺរ៉ុបក៏កំពុងកង្វល់លើភាពបែកបាក់ផ្ទៃក្នុងនៅក្នុងអំណាចនីតិប្រតិបត្តិរូម៉ានីដែរ។ ប្រធានក្រុមកណ្តាលស្តាំនិយមដែលមានសម្លេងភាគតិចក្នុងសភាបានប៉ះសំដីខ្លាំងៗច្រើនដងទល់នឹងក្រុមតំណាងសម្លេងភាគច្រើន។
បើតាមមើលទៅក្នុងពេលដែលប្រទេសរូម៉ានីធ្វើជាប្រធានផ្លាស់វេនក្រុមប្រឹក្សាអឺរ៉ុប នីតិវិធីដាក់ទណ្ឌកម្មលើប្រទេសប៉ូឡូញ និងហុងគ្រីក្នុងបទបំពានលើឯករាជ្យភាពតុលាការប្រហែលជាមិនត្រូវដាក់បញ្ចូលនៅក្នុងរបៀបវារៈនៃកិច្ចប្រជុំអឺរ៉ុបទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ