របាយការណ៍៖ ជម្លោះប្រដាប់អាវុធថយ នៅក្នុងពិភពលោក ប៉ុន្តែ ជនរងគ្រោះមានច្រើនជាងមុន
ជម្លោះប្រដាប់អាវុធ នៅក្នុងពិភពលោកបានថយចុះ គួរឲ្យកត់សំគាល់នៅឆ្នាំ ២០១៤ ប៉ុន្តែ ចំនួនជនរងគ្រោះ ស្លាប់ដោយសង្រ្គាម វិញបានកើនឡើង ដល់ទៅ ៦០ភាគរយ នៅក្នុងរយៈពេល២ឆ្នាំចុងក្រោយនេះ។ នេះបើតាមរបាយការណ៍របស់វិទ្យាស្ថាន អន្តរជាតិដើម្បី សិក្សាយុទ្ធសាស្រ្ត ដែលមានមូលដ្ឋាន ក្នុងទីក្រុងឡុងដ៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
នៅក្នុងរបាយការណ៍ប្រចាំឆ្នាំ ចេញផ្សាយ កាលពីថ្ងៃពុធ វិទ្យាស្ថានអន្តរជាតិដើម្បីសិក្សាយុទ្ធសាស្រ្តផ្តោតសំខាន់ទៅលើប្រភពដើមចម និងប្រភេទជម្លោះប្រដាប់អាវុធ នៅក្នុងពិភពលោកដែលមានដូចជាសង្រ្គាមស៊ីវិល ឬការប្រយុទ្ធជាមួយឧទ្ទាមបះបោរ។ ជារួម នៅឆ្នាំ២០១៤ជម្លោះប្រដាប់អាវុធ នៅទូទាំងពិភពលោកបានថយចុះ មកនៅត្រឹមចំនួន ៤២។ ថយចុះ ប្រមាណ មួយភាគបី បើប្រៀបធៀបទៅនឹងឆ្នាំ ២០០៨។
តាមរបាយការណ៍ គេរាប់ឃើញចំនួនជម្លោះប្រដាប់អាវុធថយចុះ បន្ទាប់ពីក្រុមឧទ្ទាមដូចជានៅប្រទេសហ្វីលីពីន កូឡុំប៊ី ជាដើមបានផ្អាកការប្រយុទ្ធ និងផ្តើមចរចាសន្តិភាពជាមួយរដ្ឋាភិបាល។ ជម្លោះប្រដាប់អាវុធថយចុះ ប៉ុន្តែ ផ្ទុយទៅវិញ វាមានលក្ខណៈសាហាវ និងបង្កឲ្យមានមនុស្សស្លាប់ច្រើនជាងមុន។ ចំនួនជនរងគ្រោះស្លាប់ដោយសារជម្លោះប្រដាប់អាវុធបានកើនឡើងពី៥ម៉ឺន ៦ពាន់នាក់ នៅឆ្នាំ ២០០៨ ទៅដល់១សែន ៨ម៉ឺននាក់ នៅឆ្នាំ១០១៤ គឺកើនឡើង ដល់ទៅ ៣ដង។
ចំនួនមនុស្សស្លាប់ដោយសារសង្រ្គាមកើនឡើង ដោយសារតែសង្រ្គាមស៊ីវិលផ្ទុះ នៅស៊ីរី ដែលបានសម្លាប់មនុស្សសរុប ២សែននាក់ ចាប់តាំងពីឆ្នាំ ២០១១។ ការប្រយុទ្ធគ្នាជាច្រើនក្រុម នៅស៊ីរីបានសម្លាប់មនុស្សដល់ទៅ ៧ម៉ឺននាក់ តែនៅក្នុងឆ្នាំ ២០១៤ រហូតធ្វើឲ្យស៊ីរី ជាប់ចំណាត់លេខ១ នាំមុខអ៊ីរ៉ាក់ និងម៉ិចស៊ិកដែលជាប់ ចំណាត់ថ្នាក់ទី៣ ដោយសារសង្រ្គាមរវាងក្រុមជួញដូរគ្រឿងញៀន ដែលសម្លាប់មនុស្សប្រមាណ១ម៉ឺន ៥ពាន់។
តាមលោក Nigel Inkster អ្នកជំនាញខាងផ្នែកគំរាមកំហែងអន្តរប្រទេសនៅវិទ្យាស្ថានអន្តរជាតិដើម្បីសិក្សាយុទ្ធសាស្រ្ត ជម្លោះប្រដាប់អាវុធថយចុះ ប៉ុន្តែ ចំនួនជនរងគ្រោះវិញបានកើនឡើងច្រើន ដោយសារ ការប្រយុទ្ធគ្នា រវាងភាគីជម្លោះ មានលក្ខណៈកាន់តែហិង្សា ហើយការប្រយុទ្ធគ្នាទៀតសោត កើតឡើង កាន់តែច្រើន នៅតាមទីប្រជុំជន ក្នុងទីក្រុង។ សកម្មភាពសម្លាប់មនុស្ស យ៉ាងឃោឃៅរបស់ក្រុមជីហាតនៃអង្គការរដ្ឋអ៊ីស្លាម នៅប្រទេសស៊ីរី និងអ៊ីរ៉ាក់ ជាមូលហេតុចំបងមួយដែលធ្វើឲ្យជនរងគ្រោះជាប្រជាជនស៊ីវិលស្លាប់បាត់បង់ជីវិតច្រើនជាងមុន នោះបើទោះបីជាជម្លោះប្រដាប់អាវុធថយចុះ ក្នុងពិភពលោកក្តី។
របាយការណ៍របស់វិទ្យាស្ថាន សង្កត់ធ្ងន់ផងដែរថា ជម្លោះប្រដាប់អាវុធនៅឆ្នាំ ២០១៤ ចូលរួមចំណែក ធ្វើឲ្យចំនួនប្រជាជនរត់ភៀសខ្លួនពីផ្ទះសម្បែងមានកាន់តែច្រើន។ អង្គការសហប្រជាជាតិបានចេញរបាយការណ៍កាលពីឆ្នាំមុន ដែលបង្ហាញថា ចំនួនជនភៀសខ្លួននៅក្នុងពិភពលោក នៅឆ្នាំ ២០១៣បានកើនឡើងច្រើនជាង ៥០លាននាក់។ នេះជាលើកទី១ ចាប់តាំងពីចប់សង្រ្គាមលោកលើកទី ២ដែលចំនួនជនភៀសខ្លួន បានកើនឡើងច្រើនជាង៥០លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ