សង្រ្គាមប៉ាកកា ជុំវិញ អតីតប្រធានាធិបតីបារាំង និងការជួញដូរថ្នាំញៀន
ចុះផ្សាយនៅថ្ងៃ៖
អតីតប្រធានាធិបតីបារាំង លោកនីកូឡា សាកូហ្ស៊ី ដែលសព្វថ្ងៃជាប្រមុខដឹកនាំបក្សប្រឆាំង និងចង់ដាក់បេក្ខភាពសម្រាប់ការបោះឆ្នោត ប្រធានាធិបតី នៅឆ្នាំ២០១៧ ធ្លាប់ស្ថិតនៅក្នុងបញ្ជីស៊ើបអង្កេតរបស់ចៅក្រម បារាំង ក្នុង សំណុំរឿងជួញដូរថ្នាំញៀន។ សង្រ្គាមប៉ាកកា នេះបានកើតមានឡើង នៅក្នុងពេលដែលតុលាការបារាំង កំពុងបើកការស៊ើបអង្កេតទៅករណីជួញដូរថ្នាំញៀន ដែលមានជនជាប់សង្ស័យ ជាង ១០នាក់ ដែលនៅក្នុងនោះ មានប្រធានក្រុមហ៊ុនហោះហើរឯកជន និង អ្នកបើកបរយន្តហោះបារាំង។
អតីតប្រធានាធិបតីបារាំង លោកនីកូឡា សាកូហ្ស៊ី ក្រេវក្រោធយ៉ាងខ្លាំង បន្ទាប់ពីកាសែតបារាំង បានចុះផ្សាយ នៅចុងសប្តាហ៍មុនថា ឈ្មោះរបស់លោកមាននៅក្នុងបញ្ជីរបស់ចៅក្រម ដែលកំពុងស៊ើបអង្កេតទៅលើករណីជួញដូរគ្រឿងញៀនរបស់អ្នកបើកបរយន្តហោះបារាំង។ តាមកាសែត បារាំង JDD ចៅក្រមធ្លាប់ដាក់ការសង្ស័យទៅលើអតីតប្រធានាធិបតីបារាំង នៅក្នុងរឿងជួញដូរថ្នាំញៀន។ ចៅក្រមកើតការសង្ស័យ ព្រោះថា យន្តហោះ ដែលជាប់ពាក់ព័ន្ធនឹងរឿងជួញដូរគ្រឿងញៀន ជាយន្តហោះ ឯកជន Jet Privé របស់ក្រុមហ៊ុនដែលលោកនីកូឡា សាកូហ្ស៊ី តែងតែជិះ ធ្វើដំណើរ ជាញឹកញយ។
សូមបញ្ជាក់ថា តុលាការបារាំង បានបើកការស៊ើបអង្កេត កាលពីឆ្នាំ ២០១៣ នៅខណៈពេលដែលអាជ្ញាធររបស់សាធារណរដ្ឋដូមីនីកបានរកឃើញ មានគ្រឿងញៀនកូកាអ៊ីន ជិត ៧០០គីឡូក្រាម នៅលើយន្តហោះឯកជន របស់ក្រុមហ៊ុនបារាំង។ អ្នកបើកបរបារាំងបួននាក់ត្រូវបានចាប់ និងជំនុំជម្រះដោយតុលាការដូមីនីក ប៉ុន្តែ អ្នកបើកបរពីរនាក់ បានគេចខ្លួន និងអាចធ្វើដំណើរមកប្រទេសបារាំង វិញ ដោយសារ មានជំនួយ អន្តរាគមន៍ពីអ្នកនយោបាយបារាំង ដែលមកពីគណបក្សស្តាំនិយមជ្រុល។ នៅក្នុងប្រទេសបារាំង អ្នកបើកបរយន្តហោះទាំងពីររូបត្រូវប្រឈមនឹងតុលាការបារាំង ដែលបើកការស៊ើបអង្កេតប្រឆាំងនឹងមនុស្សជិត១០នាក់ផ្សេងទៀត នៅក្នុងរឿងជួញដូរគ្រឿងញៀនខុសច្បាប់។
អត្ថបទអង្កេតរបស់កាសែតបារាំង JDD បានលើកឡើងថា ចៅក្រមខេត្តម៉ាសីយ ដែលទទួលបន្ទុកការស៊ើបអង្កេត ធ្លាប់បានប្រាប់ទៅប៉ូលិសឲ្យកំណត់ទីតាំងភូមិសាស្រ្ត ហើយនិងស្តាប់ការសន្ទនាតាមទូរស័ព្ទរបស់លោកនីកូឡា សាកូហ្ស៊ី នៅក្នុងចន្លោះខែមីនា ឆ្នាំ ២០១៣ និងឆ្នាំ ២០១៤។ ចៅក្រមបារាំង អាចបើកការស៊ើបអង្កេតលើលោកនីកូឡា សាកូហ្ស៊ី ក៏ដោយមកពីលោកលែងមានតំណែងជាប្រធានាធិបតីបារាំងតទៅទៀត។
ការស៊ើបអង្កេតរបស់ចៅក្រមមិនបានរកឃើញអ្វី ទេ ពោល គឺលោកនីកូឡា សាកូហ្ស៊ី គ្មានជាប់ពាក់ព័ន្ធនឹងការជួញដូរថ្នាំញៀន ដូចការសង្ស័យ។ បន្ទាប់មក ដោយមើលទៅលើក្រយៅរបស់លោកនីកូឡា សាកូហ្ស៊ី ចៅក្រមក៏បានប្តូរងាកមកស៊ើបអង្កេតលើរឿងដែលលោកនីកូឡា សាកូហ្ស៊ី អាចកេងចំណេញ ប្រយោជន៍ពីអ្នកដទៃ ដោយសារតែខ្លួនជាអ្នកនយោបាយ។
នៅចុងបញ្ចប់ ចៅក្រមដែលគ្មានរកឃើញ បន្ទុក ក៏បានបោះបង់ លែងស៊ើបអង្កេតទៅលើអតីតប្រធានាធិបតីបារាំង ក្នុងសំណុំរឿង ដែលមានឈ្មោះថា Air Cocaïne ឬការប្រើយន្តហោះ ឯកជន សម្រាប់ជួញដូរថ្នាំញៀន។
លោកនីកូឡា សាកូហ្ស៊ីលែងមានឈ្មោះក្នុងបញ្ជីស៊ើបអង្កេតរបស់ចៅក្រម ហើយរឿងរ៉ាវក៏បានកន្លងផុតទៅ តាំងពីឆ្នាំ២០១៤ មែន ប៉ុន្តែ អតីតប្រធានាធិបតីបារាំងបានចាប់ ខឹង ឆេះដុំ ដោយសារការចុះផ្សាយរបស់កាសែត។ លោកបានចាត់ទុកចំណាត់ការរបស់ចៅក្រមស៊ើបអង្កេតថា ជាការប្រមាថ រើសអើង មើលងាយកិត្តិយសរបស់លោក។ សម្រាប់អតីតប្រធានាធិបតីបារាំង ការបញ្ជាឲ្យស៊ើបអង្កេតលើរូបលោក ដែលជាប្រធានបក្សប្រឆាំង គឺមានចេញមកពីថ្នាក់ដឹកនាំកំពូលបារាំងតែម្តង។ តាមលោកនីកូឡា សាកូហ្ស៊ី មេធាវីរបស់លោកនឹងដាក់សំបុត្រទៅអាយ្យការក្រុងម៉ាសីយ៍ដើម្បីឲ្យពន្យល់បកស្រាយពីដំណើរការនិតិវិធី ដែលធ្វើឲ្យឈ្មោះរបស់លោកជាប់ក្នុងបញ្ជីស៊ើបអង្កេតរបស់ចៅក្រមនោះ។
អតីតប្រធានាធិបតី ហើយនិងតុលាការបារាំង មិនមែនជារឿងថ្មី។ ដូចពាក្យគេថា អ្នកឈ្នះ មុខខ្លាញ់ អ្នកចាញ់មុខផេះ។ គ្រាន់តែអស់តំណែងជាប្រធានាធិបតីបារាំង នៅឆ្នាំ ២០១២ លោកនីកូឡា សាកូហ្ស៊ី បានជាប់ជំពាក់វាក់វិន ជាបន្តបន្ទាប់ នឹងរឿងក្តីក្តាំរបស់តុលាការបារាំង។
បច្ចុប្បន្ននេះ តុលាការបារាំងកំពុងស៊ើបអង្កេតលើសំណុំរឿងពីរ ដែលនៅក្នុងនោះ គេសង្ស័យថា លោកនីកូឡា សាកូហ្ស៊ី បានប្រព្រឹត្តអំពើពុករលួយ នៅក្នុងពេលលោកធ្វើយុទ្ធនាការឃោសនាបោះឆ្នោត។ លោកនីកូឡា សាកូហ្ស៊ី ត្រូវបានតុលាការចោទប្រកាន់រួចហើយដែរ ពីការប្រើឥទ្ធិពលរបស់លោក ក្នុងពេលជាប្រធានាធិបតី ដើម្បីចង់ដឹងការស៊ើបអង្កេតរបស់ចៅក្រម ទៅលើសំណុំរឿង រំលោភភាពទន់ខ្សោយ របស់មហាសេដ្ឋីនី បារាំង Liliane Bettencourt ដែលអាចមានឈ្មោះរបស់លោកជាប់ពាក់ព័ន្ធ។
លោកនីកូឡា សាកូហ្ស៊ី ប្រធានបក្សប្រឆាំង ដែលចង់ត្រលប់ទៅក្លាយជាប្រធានាធិបតីបារាំងជាថ្មី កំពុងធ្វើយុទ្ធនាការឃោសនា ជាច្រើន ដើម្បី ប្រឆាំង រិះគន់រដ្ឋាភិបាល។ ក៏ប៉ុន្តែ សំណុំរឿង ក្តីក្តាំរបស់តុលាការ ដែលរុំព័ទ្ធជុំជិត លោកនីកូឡា សាកូហ្ស៊ី យ៉ាងដូច្នេះ នឹងអាចធ្វើឲ្យមហិច្ឆតារបស់សាកូហ្ស៊ីត្រូវរលាយដូចផ្សែង។
តាមអ្នកវិភាគខ្លះ អតីតប្រធានាធិបតីបារាំង កំពុងដើរគ្រប់យុទ្ធសាស្រ្ត ដើម្បីធ្វើយ៉ាងណាពន្យារពេល កុំឲ្យមានការបើកសវនការប្រឆាំងនឹងលោក នៅមុនការបោះឆ្នោតប្រធានាធិបតីឆ្នាំ ២០១៧។ ក្នុងករណីដែលគ្មានសវនការ ហើយលោកនីកូឡា សាកូហ្ស៊ី អាចជាប់ឆ្នោត ជាថ្មី ធ្វើជាប្រធានាធិបតីបារាំង នោះ ចៅក្រមបារាំងត្រូវរង់ចាំដល់ទៅ ៥ ឆ្នាំ ក្រោយ គឺឆ្នាំ ២០២២ ដើម្បី អាចត្រលប់មកចាត់ការជាថ្មី ព្រោះថា ក្នុងនាមជាប្រធានាធិបតី លោកនីកូឡា សាកូហ្ស៊ីនឹងទទួលបានអភ័យឯកសិទ្ធិ ស្របច្បាប់ ដែលសូម្បីតុលាការ មិនអាចប៉ះពាល់បាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ