អតីតរដ្ឋមន្ត្រីក្រសួងមហាផ្ទៃសម័យលោកនីកូឡា សាកូហ្ស៊ីត្រូវបានប៉ូលិសឃាត់ខ្លួនជាថ្មី
ជាមនុស្សជំនិត របស់អតីតប្រធានាធិបតីបារាំង លោក នីកូឡា សាកូហ្ស៊ី និងជាអតីតរដ្ឋមន្ត្រីក្រសួងមហាផ្ទៃ លោក ក្លូត ហ្គេអង់ (Claude Guéant) ត្រូវបានប៉ូលិស បន្តឃាត់ខ្លួនសួរចម្លើយ រយៈពេល២៤ម៉ោងបន្ថែមទៀត ក្នុងបទសង្ស័យមានពាក់ព័ន្ធនឹងការទទួលលុយដោយខុសច្បាប់ពីមេដឹកនាំលីប៊ី កាដាហ្វ៊ី ដើម្បីចាយវាយក្នុងពេលឃោសនាបោះឆ្នោតប្រធានាធិបតីកាលពីឆ្នាំ២០០៧។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ដៃស្តាំរបស់លោក នីកូឡា សាកូហ្ស៊ី អតីតប្រធានាធិបតីបារាំង ត្រូវបានប៉ូលិសឃាត់ខ្លួនយកមកសួរចម្លើយតាំងពីព្រហាមថ្ងៃសុក្រទី ៦មីនា។ លោក ក្លូតហ្គេអង់ អាចនឹងត្រូវឃាត់ទុកក្នុងប៉ុស្តិ៍ប៉ូលិស ពីរថ្ងៃទៀត មុនត្រូវដោះលែងវិញឬបញ្ជូនសំណុំរឿងទៅចៅក្រមស៊ើបអង្កេត។
អតីតរដ្ឋមន្ត្រីក្រសួងមហាផ្ទៃ (មេប៉ូលិស) ត្រូវឆ្លើយបំភ្លឺប៉ូលិសអំពីប្រភពលុយ៥០ម៉ឺនអឺរ៉ូ ដែលលោកបានទទួលពីបរទេស ចូលក្នុងគណនី កាលពីខែមីនា ២០០៨។
លោកហ្គេអង់ តាំងពីដំបូងភ្លាមថា លុយនេះបានមកពី ការលក់ផ្ទាំងគំនូរ ទៅឱ្យមេធាវីម្នាក់ជាមិត្តនៅអាស៊ី។ ប៉ុន្តែបញ្ហានៅត្រង់ថា ផ្ទាំងគំនូរជាស្នាដៃវិចិត្រករជាតិហូឡង់ មានតម្លៃពិតត្រឹមជាងមួយម៉ឺនអឺរ៉ូតែប៉ុណ្ណោះ។ ហើយម្យ៉ាងទៀត លោកអតីតរដ្ឋមន្ត្រីមានបណ្ណអនុញ្ញាតិឱ្យលក់ដូរគំនូរទៅបរទេស តែតាមការពិតលោកមិនបានទាំងសុំសិទ្ធិលក់ពីក្រសួងវប្បធម៌ ដូចមានចែងក្នុងច្បាប់ទេ។ ហេតុដូច្នេះហើយបានជាក្រុមអ្នកអង្កេតសង្ស័យថា ការលក់ដូរនេះ គ្រាន់តែជាប្រើអស័យដ្ឋានធនាគារដើម្បីបិទបាំងការទទួលខុសច្បាប់តែប៉ុណ្ណោះ។
បទចោទប្រកាន់សង្ស័យអំពីការទទួលលុយខុសច្បាប់ ពីមេដឹកនាំលីប៊ីកាដាហ្វ៊ី សម្រាប់ចាយវាយឃោសនាបោះឆ្នោតឆ្នាំ២០០៧ឱ្យបេក្ខជនប្រធានាធិបតីនីកូឡាសាកូហ្ស៊ី ត្រូវបានគាស់កកាយឡើងនៅអំឡុងពេលឃោសនាបោះឆ្នោតជុំទីពីរ ឆ្នាំ២០១២។ ប្រភពសារព័ត៌មានដ៏ល្បីមួយរបស់បារាំងបានផ្សព្វផ្សាយកិច្ចព្រមព្រៀងរវាងអតីតមេដឹកនាំលីប៊ីកាដាហ្វ៊ី និងលោកនីកូឡាសាកូហ្សី។ តែអតីតប្រធានាធិបតីបារាំងរូបនេះ បដិសេធនិងថាជាឯកសារក្លែងក្លាយ។ យ៉ាងណាក៏ដោយ ក៏ផ្តើមអង្កេតតាំងពីខែមេសាឆ្នាំ២០១៣មក ពីបទ “ពុករលួយសកម្មនិងអសកម្ម” និងប្រើឥទ្ធិពល។
នេះគឺជាលើកទីបីហើយ ដែលអតីតរដ្ឋមន្ត្រីក្រសួងមហាផ្ទៃ ត្រូវប៉ូលិសឃាត់ខ្លួនសួរចម្លើយដូច្នេះ។ លើកទីមួយ នៅចុងឆ្នាំ២០១៣ បន្ទាប់ពីរកឃើញប្រភពចំណូលគួរឱ្យសង្ស័យ ជាប្រាក់សុទ្ធ នៅពេលកាន់តំណែងជារដ្ឋមន្ត្រី និងលើកទីពីរនៅខែឧសភា២០១៤ ក្នុងសំណុំរឿងធ្វើជាអាជ្ញាកណ្តាលកាត់ក្តីឱ្យពាណិជ្ជករបារាំងBernard TapieនិងធនាគារCrédit Lyonnais៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ