បន្ទាប់ពីបញ្ឈរជើងដោយ Fifa លោក Michel Platini និងលោក Joseph Blatter ព្រមានប្តឹងទៅតុលាការ
នៅថ្ងៃចន្ទ ទី២១ ធ្នូ លោក Michel Platini ប្រធានសហព័ន្ធកីឡាបាល់ទាត់អឺរ៉ុប និងលោក Joseph Blatter អតីតប្រធានសហព័ន្ធកីឡាបាល់ទាត់ពិភពលោកហៅកាត់ថា Fifa បានព្រមានប្តឹងទៅតុលាការអាជ្ញាកណ្តាលកីឡាប្រឆាំងនឹងការសម្រេចចិត្តរបស់គណៈកម្មការសីលធម៌របស់ Fifa។ គណៈកម្មការសីលធម៌របស់ Fifa ដែលបានសម្រេចព្យួរជើងលោក Platini និងលោក Blatter មិនឲ្យធ្វើសកម្មភាពផ្នែកកីឡាបាល់ទាត់រយៈពេល ៨ឆ្នាំ។ ទន្ទឹមគ្នានេះ លោក Michel Platini និងលោក Joseph Blatter ក៏ត្រូវបានគណៈកម្មការសីលធម៌របស់ Fifa តម្រូវឲ្យបង់ប្រាក់ពិន័យផងដែរ។
ចុះផ្សាយនៅថ្ងៃ៖
ស្តាប់ - ០២:០៩
ប្រាក់ពិន័យសម្រាប់លោក Platini គឺ ៧៤ ០០០អឺរ៉ូ រីឯសម្រាប់លោក Blatter គឺ ៤៦ ០០០អឺរ៉ូ។ អ្វីដែលតុលាការផ្ទៃក្នុងរបស់ Fifa បានចោទប្រកាន់លោក Michel Platini និងលោក Joseph Blatter មិនមានទាក់ទងនឹងរឿងអាស្រូវពុករលួយទេ តែទាក់ទងនឹងការរំលោភអំណាចដើម្បីប្រយោជន៍ផ្ទាល់ខ្លួន និងការគ្រប់គ្រងមិនស្មោះត្រង់។ ប៉ុន្មានម៉ោងក្រោយការសម្រេចចិត្តរបស់គណៈកម្មការសីលធម៌ Fifa លោក Michel Platini និងលោក Joseph Blatter ក៏បានបញ្ចេញប្រតិកម្មប្រឆាំងយ៉ាងចាស់ដៃដែរ។
នៅក្នុងសន្និសីទកាសែតមួយ លោក Blatter ដែលថ្លែងជាភាសាអង់គ្លេសផង បារាំងផង និងអេស្ប៉ាញផងបានបរិហារលើគណៈកម្មការសីលធម៌ Fifa ដែលលោកយល់ថា គ្មានសិទ្ធិអំណាចអ្វីមកកាត់ទោសលោកឡើយ និងថា លោកនឹងតស៊ូប្រយុទ្ធដើម្បីរូបលោក និងដើម្បី Fifa ដែលលោកបានបម្រើការអស់រយៈពេលជាង ៤០ឆ្នាំ។ ទន្ទឹមគ្នានេះ លោក Blatter ដែលមានអាយុ ៧៩ឆ្នាំក៏គ្រោងនឹងប្តឹងគណៈកម្មការសីលធម៌ Fifa វិញដែរ ហើយបន្តប្តឹងទៅតុលាការអាជ្ញាកណ្តាលកីឡាទៀតប្រសិនបើចាំបាច់។
ទាក់ទងនឹងលោក Michel Platini លោកបានចេញមុខបរិហារ ព្រមទាំងចាត់ទុកសេចក្តីសម្រេចចិត្តរបស់គណៈកម្មការសីលធម៌ Fifa ថាជាឆាកល្ខោននយោបាយមួយដែលបានរៀបចំទុកជាមុនដើម្បីបំផ្លាញកិត្តិយសលោក និងថា លោកនឹងប្តឹងទៅតុលាការអាជ្ញាកណ្តាលកីឡា និងតុលាការស៊ីវិលដើម្បីទាមទារសំណងជម្ងឺចិត្តដែលលោកបានទទួល។ គួរជម្រាបជូនថា ផលវិបាកដែលជះលើលោក Blatter និងលោក Platini គឺមិនដូចគ្នាទេ។ មានអាយុ ៦០ឆ្នាំ លោក Platini កំពុងសម្លឹងឃើញកៅអីប្រធានសហព័ន្ធកីឡាពិភពលោកដែលលោក Baltter បានចុះចេញដោយរឿងអាស្រូវពុករលួយ។
ថ្ងៃទី២៦ មករា ឆ្នាំ ២០១៦ ជាថ្ងៃចុងក្រោយនៃការបញ្ជូនឈ្មោះបេក្ខជនប្រធាន Fifa ទៅឲ្យគណៈកម្មការបោះឆ្នោត Fifa ហើយការបោះឆ្នោតជាផ្លូវការនឹងត្រូវរៀបចំនៅថ្ងៃទី២៦ កុម្ភៈ។ ដូច្នេះវាជារឿងបន្ទាន់បំផុតសម្រាប់លោក Michel Platini ក្នុងការលាងសំអាតរឿងអាស្រូវគ្រប់យ៉ាងនៅតុលាការ បើពុំនោះសោតទេ សុបិន្តចង់ក្លាយជាប្រធាន Fifa នឹងបន្តក្លាយជាសុបិន្តគ្មានទីបញ្ចប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ