FIFA៖តុលាការអាមេរិក ចេញរបាយការណ៍សារភាពរបស់ ស្ហាក់ ប្លាហ្ស៊ែរ រឿងពុករលួយ
ពីរថ្ងៃបន្ទាប់់ពីលោក ប្លាធឺរប្រធានសម្ព័ន្ធបាល់ទាត់FIFA បានលាលែងចេញពីតំណែង តុលាការអាមេរិក បានបញ្ចេញជាសាធារណៈ នូវឯកសារសារភាពរបស់ លោក ស្ហាក់ ប្លាហ្ស៊ែរ ពីសកម្មភាពពុករលួយ ស៊ីសំណូក របស់សមាជិកក្រុមប្រឹក្សាប្រតិបត្តិរបស់ FIFA។ ការសារភាពទាំងនេះហើយ ដែលនាំឲ្យឈានទៅដល់ ការចាប់ខ្លួន ថ្នាក់ដឹកនាំរបស់FIFA ចំនួន១៤នាក់ នៅទីក្រុងហ្ស៊ុយរីឆ កាលពីពេលថ្មីៗនេះ។ លោក ប្លាធឺរ អតីតប្រធានFIFA ក៏មិនប្រាកដថានឹងរួចខ្លួនដែរ បើទោះជាលោកបានលាលែងពីតំណែងក៏ដោយ។
ចុះផ្សាយនៅថ្ងៃ៖
ស្តាប់ - ០២:១០
លោក ស្ហាក់ ប្លាហ្សែរ អតីសមាជិកម្នាក់ ក្នុងក្រុមប្រឹក្សាប្រតិបត្តិរបស់ FIFA ហើយក៏ធ្លាប់ជា អតីតអគ្គលេខាធិកាសម្ព័ន្ធបាល់ទាត់អាមេរិកខាងជើង និងអាមេរិកកណ្តាល ត្រូវបានក្រុម FBI ធ្វើការចាប់ខ្លួនបាន និងចោទប្រកាន់ពីបទ ស៊ីសំណូក លាងលុយក្រខ្វក់ និងគេចពន្ធរដ្ឋ។ លោក ប្លាស្សែរ បានសារភាពទាំងស្រុង ហើយបានសន្យាសហការ ជាមួយអាជ្ញាធរ អាមេរិក ដើម្បីចាប់មនុស្សផ្សេងទៀត។ ជាលទ្ធផល លោក ប្លាហ្សែរ អាចនឹងទទួលបានការបន្ធូរបន្ថយទោស ចំនួនពាក់កណ្តាល។
ដោយសារការសហការនេះហើយ ទើបតុលាការអាមេរិក បានប្រមូល ភស្តុតាងជាច្រើន ដើម្បីដាក់បន្ទុកមនុស្ស១៤នាក់ដែលសុទ្ធសឹងជាមនុស្សមានអំណាចក្នុង FIFA។ នៅថ្ងៃព្រហស្បតិ៍ទី ៤មិថុនានេះ តុលាការអាមេរិក ទើបបានបញ្ចេញជាសាធារណៈ នូវឯកសារសារភាពរបស់ លោក ប្លាហ្ស៊ែរ ដែលបានធ្វើឡើងកាលពីឆ្នាំ២០១៣។
តាមរយៈឯកសារនេះ លោក ប្លាហ្ស៊ែរ បានសារភាព លោកព្រមទាំងសមាជិកក្រុមប្រឹក្សាប្រតិបត្តិរបស់FIFA ជាច្រើននាក់ផ្សេងទៀត មានទម្លាប់ទទួលលុយសំណូក ជាច្រើនលើក។ ជាឧទាហរណ៍ ដូចជាការជ្រើសរើសប្រទេស ឲ្យរៀបចំបាល់ទាត់ពិភពលោកនៅឆ្នាំ១៩៩៨ ដែលប្រទេសម៉ារ៉ុក បានសូកគណៈប្រតិភូFIFA ដើម្បីឲ្យបោះឆ្នោតគាំទ្រម៉ារ៉ុក។ តែទីបំផុត FIFA បានសម្រេចប្រគល់ទៅឲ្យបារាំង។
ដូចគ្នាដែរ ការបោះឆ្នោត ប្រគល់ការរៀបចំបាល់ទាត់ពិភពលោកឆ្នាំ២០១០ នៅអាហ្វ្រិកខាងត្បូង ក៏មានប្រឡាក់ប្រឡូស នឹងអំពើស៊ីសំណូកដែរ ដែលអាហ្វ្រិកខាងត្បូងបានចំណាយប្រាក់ចំនួន១០លានដុល្លារដើម្បីសូកសមាជិកFIFA។ ក្រៅពីការស៊ីសំណូក ក្នុងការបោះឆ្នោតជ្រើសរើសប្រទេស ដែលរៀបចំការប្រកួតបាល់ទាត់ពិភពលោក លោក ប្លាហ្ស៊ែរ បានសារភាពផងដែរថា លោកនឹងសមាជិកដ៏ទៃទៀត តែងតែទទួលសំណូកមិនដែលខាន ក្នុងការសម្រេចប្រគល់សិទ្ធិផ្សព្វផ្សាយរូបភាពបន្តផ្ទាល់ នៃការប្រកួតបាល់ទាត់ពិភពលោក ទៅឲ្យក្រុមហ៊ុនឯកជននានា។
ការបញ្ចេញឯកសារសារភាពជាសាធារណៈនេះ ត្រូវបានគេមើលឃើញថា តុលាការអាមេរិក ចង់បញ្ជាក់ឲ្យបានច្បាស់ទៅដល់មតិសាធារណៈថា FIFA គឺជាសំបុកដែលខាងក្នុងរលួយ ពោរពេញដោយដង្កូវ ដែលមនុស្សអ្នកមានអំណាចនៅខាងក្នុងនោះ ធ្វើអ្វីបានតាមតែចិត្ត។ អ្នកនាំពាក្យ FBI សង្ឃឹមថាមនុស្សទាំង១៤នាក់ ដែលកំពុងតែជាប់ចោទនេះ នឹងព្រមសហការ ដើម្បីឈានទៅចាប់មនុស្សផ្សេងៗទៀត។
ដោយឡែក លោក សេប ប្លាធឺរ ប្រធានFIFA ដែលទើបតែលាលែងពីតំណែង ក៏ជិតដល់ថ្ងៃអន្សាលផងដែរ។ កាសែតញូយ៉កថាមស៍ បានរាយការណ៍ថា លោក ប្លាធឺរ ក៏កំពុងស្ថិតនៅក្នុងបទចោទប្រកាន់របស់តុលាការដែរ។ ទូរទស្សន៍ ABC ក៏បានផ្សព្វផ្សាយផងដែរ ថាពេលនេះ ការស៊ើបអង្កេតដោយផ្ទាល់ កំពុងតែធ្វើឡើងលើរូបលោក ប្លាធឺរ និងដៃស្តាំរបស់គាត់ម្នាក់ទៀតឈ្មោះ ហ្សេរ៉ូម វ៉ាល់ខឺ។ ប៉ូលីសអន្តរជាតិ Interpol ក៏បានចេញសំណៅ តាមចាប់មនុស្សមួយចំនួនទៀត ដែលជាប់ពាក់ព័ន្ធ ក្នុងរឿងអាស្រូវពុករលួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ