ភ្នាក់ងារវាយតម្លៃហានិភ័យ Fitch បញ្ចុះចំណាត់ថ្នាក់បារាំងមួយកំរិត
Fitch ភ្នាក់ងារវាយតម្លៃហានិភ័យបានសម្រេចចិត្ត នៅថ្ងៃសុក្រទី ១២ ធ្នូ ២០១៤ បញ្ចុះចំណាត់ថ្នាក់ប្រទេសបារាំង មួយកំរិត ពី ចំណាត់ថ្នាក់ល្អ AA+ មកត្រឹមAA ជាមួយនឹងទស្សនវិស័យឋេរ។ ការបញ្ចុះចំណាត់យ៉ាងដូច្នេះបញ្ជាក់យ៉ាងច្បាស់អំពីភាពទន់ខ្សោយផ្នែកសេដ្ឋកិច្ចរបស់បារាំង តែបើតាមភាសារបស់ភ្នាក់ងារ គឺបណ្តាលមក បារាំងដើរខុសផ្លូវក្នុងនយោបាយថវិកា។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងសេចក្តីថ្លែងការណ៍ ភ្នាក់ងារវាយតម្លៃហានិភ័យ Fitch បានបង្ហាញអំពីភាពធ្ងន់ធ្ងរយ៉ាងពិសេសនៃសេដ្ឋកិច្ចបារាំង។ បារាំងទន់ខ្សោយខ្លាំងមែនទែន រហូតទាល់តែមិនអាចរក្សាបានទស្សនវិស័យខាងពង្រឹងកញ្ចប់ថវិកាជាតិ និងស្ថិរភាពនៃការកាត់បន្ថយបំណុលសាធារណៈ។ បារាំងដើរខុសផ្លូវខ្លាំងក្នុងផ្នែកថវិកា ហេតុដូច្នេះហើយបានជា ភ្នាក់ងារមានលទ្ធភាពអ្វីផ្សេង ក្រៅអំពីសម្រេចបញ្ចុះចំណាត់ថ្នាក់ប្រទេសនេះ ពីAA+ មក AA ជាមួយនឹងការវាយតម្លៃនាពេលអនាគតថាបារាំងមានត្រឹមទស្សនវិស័យស្មើ។
ដើម្បីពន្យល់អំពីមូលហេតុនៃសេចក្តីសម្រេចចិត្តបែបអវិជ្ជមានចំពោះបារាំងនេះ Fitch បាន បញ្ជាក់បន្ថែមថា កំណើនសេដ្ឋកិច្ចបារាំងនៅឆ្នាំនេះ នឹងត្រូវស្ថិតនៅក្រោមមធ្យមភាគនៃកំណើនសេដ្ឋកិច្ចរបស់តំបន់អឺរ៉ូ ជាលើកទីមួយ គិតចាប់តាំងពីបួនឆ្នាំមក។
នៅក្នុងបរិបទដែលប្រាក់អឺរ៉ូធ្លាក់ថ្លៃ ប្រេងឆៅក៏ចុះថោកខ្លាំងមិនធ្លាប់មាន បារាំងនៅតែមិនអាចស្វែងរកកំណើនសេដ្ឋកិច្ចបានខ្លាំងទៀត។ ផលិតផលសរុបក្នុងស្រុករបស់បារាំងនឹងកើនឡើង០,៨%នៅឆ្នាំ២០១៥ បើប្រៀបទៅនឹងឆ្នាំ២០១៤ (០,4%)។ រដ្ឋាភិបាលបារាំងហ៊ានកាត់បន្ថយឱនភាពសាធារណៈមកត្រឹម៤,១% នៃផលិតផលសរុបក្នុងស្រុក នៅឆ្នាំ២០១៥ ដែលបើតាមការព្យាករណ៍របស់ភ្នាក់ងារ Fitch គឺមិនសមចិត្តឡើយ។ ម្យ៉ាងវិញទៀត នេះគឺជាលើកទីពីរហើយ គិតចាប់ពីឆ្នាំ២០១២មក ដែលរដ្ឋាភិបាលបារាំងបានពន្យារពេលសម្រេចកម្មវត្ថុបញ្ចុះឱនភាពថវិកាមកត្រឹម៣% តាមច្បាប់របស់អឺរ៉ុបនោះ។
រដ្ឋាភិបាលបារាំងដែលបានបញ្ចេញប្រតិកម្មភ្លាមមិនបង្អង់ បានអះអាងថានយោបាយថវិកាបារាំងកំពុងចាប់ផ្តល់ផ្លៃផ្កាហើយ ហើយនឹងបន្តផ្តល់លទ្ធផលនៃឆ្នាំបន្តបន្ទាប់ខាងមុខ។
ជាមួយនឹងទស្សនវិស័យអវិជ្ជមាន ភ្នាក់ងារ Moody's ភ្នាក់ងារបានរក្សាចំណាត់ថា្នក់បារាំងឱ្យនៅត្រឹម Aa1 ដដែល (ចំណាត់ថ្នាក់ល្អបំផុតទីពីរ) កាលពីថ្ងៃទី ១៩កញ្ញាកន្លងទៅ។ ចំណែកឯភ្នាក់ងារ Standard and Poor's បានបញ្ចុះចំណាត់ថ្នាក់បារាំងជាលើកទីមួយ កាលពីខែមករាឆ្នាំ២០១២ និងជាលើកទីពីរនៅខែវិច្ឆិកា ២០១៣ មកត្រឹម"AA"។ ភ្នាក់ងារនេះបានវាយតម្លៃបារាំងជាថ្មីឡើងវិញនៅថ្ងៃទី ១០ តុលា ២០១៤ ថាមានទស្សនវិស័យសេដ្ឋកិច្ច ធ្លាក់ពីស្មើ ទៅលេខដក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ