បារាំងនឹងបញ្ជូនទីប្រឹក្សាយោធាទៅអ៊ីរ៉ាក់
ក្រោយ រងភេរវកម្មកណ្តាលក្រុងប៉ារីស រដ្ឋាភិបាលបារាំងបានចាត់វិធានការជាបន្តបន្ទាប់ ប្រយុទ្ធប្រឆាំងនឹងក្រុមជីហាតភេរវនិយម ទាំងនៅក្នុង និងក្រៅប្រទេស។ នៅថ្ងៃព្រហស្បតិ៍ ថ្ងៃបើកកិច្ចប្រជុំសម្ព័ន្ធអន្តរជាតិ ដើម្បីប្រយុទ្ធប្រឆាំងនឹងមួយក្រុមជីហាត នៃអង្គការរដ្ឋអ៊ីស្លាម នៅទីក្រុងឡុងដ៍ ក្រសួងការពារជាតិបារាំងបានប្រកាសថា បារាំងនឹងបញ្ជូនទីប្រឹក្សាយោធាជាង ២០នាក់ទៅប្រទេសអ៊ីរ៉ាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
នៅក្នុងជំនួបជាមួយអ្នកកាសែត អ្នកនាំពាក្យរបស់ក្រសួងការពារជាតិបារាំង វីរសេនីយ៍ Gilles Jaronបានថ្លែងថា នៅប៉ុន្មានថ្ងៃខាងមុខ មន្រ្តីយោធាបារំាងនឹងចេញដំណើរទៅទីក្រុងបាកដាដ ទៅធ្វើជាអ្នកប្រឹក្សាផ្តល់យោបល់ ឲ្យកងពលមួយរបស់អ៊ីរ៉ាក់។
ទីប្រឹក្សាបារាំងជាង២០នាក់នឹងធ្វើការជាមួយមេបញ្ជាការកងពល ដើម្បីរៀបចំផែនការ និងត្រៀមយុទ្ធសាស្រ្តនៅមុនប្រតិបត្តិការយោធា ដែលកងទ័ពអ៊ីរ៉ាក់ត្រូវធ្វើ ដើម្បីប្រយុទ្ធប្រឆាំងនឹងក្រុមជីហាត នៃអង្គការរដ្ឋអ៊ីស្លាមនៅក្នុងសមរភូមិ។ តាមអ្នកនាំពាក្យខាងលើ វត្តមានរបស់ទីប្រឹក្សាយោធាបារាំងនៅអ៊ីរ៉ាក់ ធ្វើឡើងដើម្បីជួយគាំទ្រផ្នែកយុទ្ធសាស្រ្តដល់មេដឹកនាំយោធាអ៊ីរ៉ាក់ ប៉ុន្តែ មិនមែនមានន័យថា ទាហានបារាំងចូលរួមប្រយុទ្ធដោយផ្ទាល់ ប្រឆាំងនឹងក្រុមជីហាតនៅ អ៊ីរ៉ាក់ទេ។
ទីក្រុងប៉ារីសមានការប្រុងប្រយ័ត្ន មិនសូវជាបញ្ចេញព័ត៌មានច្រើនទាក់ទងនឹងវត្តមានទ័ពជើងគោក នៅក្នុងទឹកដីអ៊ីរ៉ាក់ទេ។ រហូតមកដល់ពេលនេះ គេដឹងថា បារាំងមានកងកម្លាំងពិសេសឈរជើងតិចជាង១០០នាក់ នៅក្នុងទឹកដីអ៊ីរ៉ាក់។ បារាំងធ្លាប់បានបញ្ជូនអ្នកជំនាញយោធារបស់ខ្លួនជាង១០នាក់ ឲ្យទៅបណ្តុះបណ្តាលទាហានគួដ អ៊ីរ៉ាក់ ឲ្យចេះប្រើកាំភ្លើងយន្ត នៅក្នុងតំបន់Erbil។
ចាប់តាំងពីខែកញ្ញាឆ្នាំមុន យន្តហោះចម្បាំងបារាំងបានចូលរួមជាមួយយន្តហោះសម្ព័ន្ធអន្តរជាតិដឹកនាំដោយអាមេរិក ដើម្បីវាយប្រហារទៅលើក្រុមជីហាត នៃអង្គការរដ្ឋអ៊ីស្លាម នៅក្នុងទឹកដីអ៊ីរ៉ាក់ ប៉ុន្តែ មិនបានបន្តចូលទៅក្នុងទឹកដីស៊ីរី ដូចអាមេរិកទេ។ កាលពីថ្ងៃអង្គារ ចូលដល់ថ្ងៃពុធ យន្តហោះចម្បាំងដែលបារាំងមាន១៥ គ្រឿង នៅមូលដ្ឋានទ័ព ក្នុងហ្សកដានី និងអេមីរ៉ា អារ៉ាប់រួម បានចូលរួមជាមួយយន្តហោះរបស់សម្ព័ន្ធអន្តរជាតិ វាយប្រហារលើគោលដៅសំខាន់ៗរបស់ក្រុមជីហាតនៃអង្គការរដ្ឋអ៊ីស្លាមក្នុងទឹកដីអ៊ីរ៉ាក់។ នៅក្រោយអំពើភេរវកម្មក្នុងក្រុងប៉ារីស រដ្ឋាភិបាលបារាំងបានសម្រេចបញ្ជូននាវា ចម្បាំង Charles de Gaulle ទៅសមុទ្រពែរ្ស៍។ Charles de Gaulleដែលផ្ទុកដោយយន្តហោះទំនើបៗ ទាន់សម័យបំផុត នឹងទៅដល់តំបន់ក្បែរអ៊ីរ៉ាក់ នាខែកុម្ភៈ និងអាចផ្តល់ជំនួយបន្ថែមដល់យន្តហោះចម្បាំងបារាំង ក្នុងការវាយប្រហារទៅលើក្រុមជីហាត ក្នុងទឹកដីអ៊ីរ៉ាក់។
និយាយពី ទាហានបារាំងនេះដែរ រដ្ឋមន្រ្តីក្រសួងការពារជាតិបារាំងបានបញ្ជាក់កាលពីថ្ងៃពុធ ព័ត៌មានរបស់វិទ្យុបារាំងអន្តរជាតិ RFIដែលថា មានអតីតទាហានបារាំងប្រមាណ១០នាក់ កំពុងប្រយុទ្ធកៀកស្មាជាមួយក្រុមជីហាត នៃអង្គការរដ្ឋអ៊ីស្លាម នៅក្នុងទឹកដីស៊ីរី។ អតីតទាហានបារាំង ទាំងនោះដែលមានជំនាញតាំងពីការលោតឆ័ត្រយោង បានចូលកាន់សាសនាអ៊ីស្លាម និងកំពុងចូលរួមបណ្តុះបណ្តាលសកម្មប្រយុទ្ធជីហាត ឲ្យចេះប្រើកាំភ្លើង។ គេបារម្ភថា អតីតទាហានបារាំងទាំងនោះ អាចផ្តល់ព័ត៌មានសម្ងាត់របស់យោធាបារាំង ជាពិសេសតិចនិច យុទ្ធសាស្រ្តប្រយុទ្ធរបស់កងទ័ពបារាំង។ តាមលោករដ្ឋមន្រ្តី វាជារឿងកម្រ ប៉ុន្តែ ក្រសួងនឹងពង្រឹងប្រព័ន្ធគ្រប់គ្រងផ្ទៃក្នុងកងទ័ពបារាំង ដើម្បីជៀសវាងកុំឲ្យមាន ដង្កូវចេញពីសាច់ ដូចករណីទាហានអាមេរិកាំងម្នាក់ ដែលជាបណ្តាញរបស់អាល់កៃដា និងបានបាញ់សម្លាប់មិត្តរបស់ខ្លួន ជាង១០នាក់ ដែលត្រូវចេញដំណើរទៅធ្វើសង្រ្គាមនៅអាហ្វហ្កានីស្ថាន កាលពីឆ្នាំ ២០០៩កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ