រដ្ឋសភាបារាំង ផ្តល់សច្ចាប័នលើកិច្ចព្រមព្រៀងអ៊ុយក្រែន - សហភាពអឺរ៉ុប
កិច្ចព្រមព្រៀង ស្តីអំពីការភ្ជាប់ រដ្ឋអ៊ុយក្រែនទៅនឹង “លំហពាណិជ្ជកម្មសេរី” របស់សហភាពអឺរ៉ុប បានទទួលការឲ្យសច្ចាប័ន ដោយរដ្ឋសភាបារាំងគឺ ក្នុងបរិបទនៃការប្រឈមមុខដាក់គ្នា លើសមរភូមិ នៅតំបន់ខាងកើតអ៊ុយក្រែន ក្នុងបរិបទនៃភាពតានតឹងការទូត និង ក្នុងបរិបទនៃវិបត្តិសេដ្ឋកិច្ចដុនដាបទៅហើយ នៅអ៊ុយក្រែនផ្ទាល់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
ពិតជាការប្រកែក ក្នុងខែវិច្ឆិកាឆ្នាំ២០១៣ ដោយប្រធានាធិបតីអ៊ុយក្រែនមុន គឺលោក វិកទ័រ យ៉ានូកូវិច រុស្ស៊ីនិយម ពុំព្រមចុះហត្ថលេខាលើកិច្ចព្រមព្រៀងនេះ ដែលបានបង្កឲ្យមាន ផ្ទុះឡើង ជាការបះបោរយ៉ាងខ្លាំងក្លា នៅលើទីលានឯករាជ្យក្រោមឈ្មោះថា ម៉ៃដាន នៅ កណ្តាលក្រុងគៀវ និង បណ្តាលឲ្យគាត់ធ្លាក់ពីអំណាចទៅ។
ឯកសារដែល ត្រូវបានរដ្ឋសភាបារាំង ឲ្យសច្ចាប័នម្សិលមិញ គឺ ដូចគ្នានឹងកិច្ចព្រមព្រៀង ដែល មានចុះរវាងសហភាពអឺរ៉ុប និង រដ្ឋហ្ស័កហ្ស៊ី។
កិច្ចព្រមព្រៀងទាំងនេះ គឺសំដៅពង្រឹង វប្បធម៌សន្ទនា និងការផ្តោះប្តូរសេដ្ឋកិច្ច និងពាណិជ្ជកម្ម រវាងសហភាពអឺរ៉ុប និង រដ្ឋឯករាជ្យទាំងពីរ ដោយជួយបង្ខិតឲ្យចូលជិតគ្នា យ៉ាងសំខាន់ ទាំង ក្បួនខ្នាត ទាំងបទដ្ឋាន ព្រមទាំងបើកឲ្យទូលាយ សេរីកម្មនៃការប្តូរគ្នាទៅវិញទៅមក ក្នុង ក្របខ័ណ្ឌ នៃ ការភ្ជាប់ខ្លួនផ្នែកនយោបាយ និង សមាហរណកម្មផ្នែកសេដ្ឋកិច្ច ដោយប្រទេស ទាំងពីរ ទៅនឹង សហភាពអឺរ៉ុប។
ការបោះឆ្នោត ក្នុងរដ្ឋសភាបារាំង ប្រព្រឹត្តទៅ កាលដែលជម្លោះរវាងកងទ័ពអ៊ុយក្រែន និង ពួកឧទ្ទាមផ្តាច់ទឹកដីរុស្ស៊ីនិយម នៅតំបន់ខាងកើតប្រទេស ដែល តាំងពីកណ្តាលខែមេសា ឆ្នាំ ២០១៤មក បានផ្តាច់ជីវិត អ្នកស្រុក អស់ ជាង ៦.៤០០នាក់ទៅហើយ រួចនៅតែបន្តឆាបឆេះ ដដែល ទោះបីនៅក្រុងមិនស្ក៏ កាលពីខែកុម្ភៈ មានចុះបានជាកិច្ចព្រមព្រៀងស្តី អំពីការឈប់ បាញ់ក្តី។ ចំណែក សហភាពអឺរ៉ុប ដោយចោទក្រុងម៉ូស្គូ ថា មិនព្រមបំពេញ តាមឯកសារនេះ កាលពីថ្ងៃ២២ មិថុនាកន្លងទៅ បានពន្យារទណ្ឌកម្មប្រឆាំងរុស្ស៊ី កន្លះឆ្នាំទៀត រហូតដល់ចុង ខែមករា ឆ្នាំ២០១៦។
តាមមតិ ពួកអ្នកតំណាងរាស្ត្របារាំង ការឲ្យសច្ចាប័នដល់កិច្ចព្រមព្រៀងខាងលើ មិនមែនមានន័យ ថា បើកផ្លូវ ឲ្យ អ៊ុយក្រែន និង ហ្ស៊័កហ្ស៊ី ចូលដោយស្វ័យប្រវត្តិ ទៅជាសមាជិក សហភាពអឺរ៉ុប ឬ ក៏ ជាសមាជិក បក្សសម្ព័ន្ធអូតង់ សោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ