វិបត្តិអ៊ុយក្រែន៖កិច្ចប្រជុំក្នុងទីក្រុងប៉ារីសបានអំពាវនាវឲ្យគោរពរាល់កិច្ចព្រមព្រៀងទីក្រុងមីនស្កិ៍
នៅរសៀលថ្ងៃអង្គារ ទី២៤ កុម្ភៈ ប្រមុខការទូតនៃប្រទេសបារំាង អាល្លឺម៉ង់ អ៊ុយក្រែន និងរុស្ស៊ីបានជួបជជែកគ្នាពីវិបត្តិអ៊ុយក្រែននៅក្នុងទីក្រុងប៉ារីស ប្រទេសបារំាង។ បន្ទាប់ពីបានជួបប្រជុំគ្នាអស់រយៈពេល ៣ម៉ោងមក អង្គប្រជុំបានចេញសេចក្តីថ្លែងការណ៍រួមមួយដោយបានអំពាវនាវឲ្យភាគីជម្លោះគោរពឲ្យបានត្រឹមត្រូវនូវរាល់កិច្ចព្រមព្រៀងដែលបានចុះហត្ថលេខាក្នុងទីក្រុងមីនស្កិ៍ ប្រទេសបេឡារុសកន្លងទៅ។ ការអំពាវនាវពេលនេះបានធ្វើឡើង ចំពេលដែលការវាយប្រហារគ្នាកំពុងបន្តមានរវាងទ័ពអ៊ុយក្រែន និងពួកឧទ្ទាមទាមទារផ្តាច់ទឹកដី។
ចុះផ្សាយនៅថ្ងៃ៖
ស្តាប់ - ០២:០៨
សេចក្តីថ្លែងការណ៍នៅក្រោយកិច្ចប្រជុំបានអានដោយលោកប្រមុខការទូតបារំាង Laurent Fabius នៅចំពោះមុខក្រុមអ្នកកាសែត។ កិច្ចប្រជុំបានអំពាវនាវជាសារធារណៈឲ្យភាគីជម្លោះគោរពឲ្យខានតែបាននូវរាល់កិច្ចព្រមព្រៀងដែលបានចុះហត្ថលេខាក្នុងទីក្រុងមីនស្កិ៍ ប្រទេសបេឡារុសនាពេលកន្លងទៅ ពិសេសកិច្ចព្រមព្រៀងទីក្រុងមីនស្កិ៍លើកទី២ ដែលទើបបានចុះហត្ថលេខាកាលពីថ្ងៃទី១២ កុម្ភៈថ្មីៗនេះ។ ការគោរពកិច្ចព្រមព្រៀងទីក្រុងមីនស្កិ៍ដោយចាប់ផ្តើមដំបូងពីបទឈប់បាញ់ និងការដកអាវុធធន់ធ្ងន់ចេញពីខ្សែបន្ទាត់ជម្លោះ។ ទន្ទឹមគ្នានេះ កិច្ចប្រជុំក៏បានស្នើឲ្យពង្រឹងបេសកកម្មឃ្លំាមើលពិសេសរបស់អង្គការដើម្បីសន្តិសុខ និងកិច្ចសហប្រតិបត្តិការអឺរ៉ុបហៅកាត់ថា OSCE ពិសេសគឺពន្យារពេលបេសកកម្មរបស់ OSCE ជាមួយនឹងការបន្ថែមសមាជិក សម្ភារៈ និងថវិកា។
មួយវិញទៀត និងដើម្បីអាចធានាសុវត្ថិភាព និងសន្តិសុខរបស់បេសកកម្មរបស់ OSCE បាន កិច្ចប្រជុំបានស្នើដល់ភាគីជម្លោះឲ្យជួយសម្រួលការងារ ព្រមទំាងរួមសហការណ៍ឲ្យបានពេញទំហឹងជាមួយបុគ្គលិករបស់ OSCE ពិសេសផ្ទៀងផ្ទាត់លើការដកអាវុធធន់ធ្ងន់ចេញពីខ្សែបន្ទាត់ជម្លោះ។ បើតាមមន្រ្តីការទូតជាន់ខ្ពស់អ៊ុយក្រែនមួយរូបឲ្យដឹងថា ពីដំបូងឡើយ ភាគីរុស្ស៊ីមិនចង់ចូលរួមក្នុងជំនួបទីក្រុងប៉ារីសថ្ងៃនេះទេ តែដោយមានគំនាបខ្លំាងពីបស្ចិមលោកទើបបានរុស្ស៊ីសុទ្ធចិត្តចូលរួម។ សូមជម្រាបជូនថា អ៊ុយក្រែន និងបស្ចិមលោកបានចង្អុលមុខរុស្ស៊ីពីបទបានគំាទ្រពួកឧទ្ទាមទាមទារផ្តាច់ទឹកដីប្រឆំាងរដ្ឋាភិបាលទីក្រុងគៀវ តែទីក្រុងម៉ូស្គូតែងតែបដិសេធជានិច្ច។
គួររម្លឹកឡើងវិញថា ទីក្រុងគៀវ និងក្រុមឧទ្ទាមបានចុះហត្ថលេខាលើកិច្ចព្រមព្រៀងសន្តិភាពដែលគេហៅថា កិច្ចព្រមព្រៀងទីក្រុងមីនស្កិ៍លើកទី២ កាលពីថ្ងៃទី១២ កុម្ភៈកន្លងទៅ នៅក្រោយកិច្ចប្រជុំក្រោមអន្តរការីមកពីប្រទេសបារំាង អាល្លឺម៉ង់ និងរុស្ស៊ី។ កិច្ចព្រមព្រៀងដែលមានចែងតំាងពីបទឈប់បាញ់ដែលចូលជាធរមានតំាងពីថ្ងៃទី១៥ កុម្ភៈរហូតដល់ការដកអាវុធធន់ធ្ងន់ចេញពីខ្សែបន្ទាត់ជម្លោះ។ តែមកដល់ម៉ោងនេះ ការប្រយុទ្ធគ្នាកំពុងបន្ត ដោយមានស្លាប់ទាហានអ៊ុយក្រែនម្នាក់ក្នុងថ្ងៃទី២៤ កុម្ភៈ និងមានរបួស ៧នាក់ក្នុងរយៈពេល ២៤ម៉ោងចុងក្រោយនេះ។ បើគិតក្នុងរយៈពេល៦ខែ ជម្លោះបានបណ្តាលឲ្យស្លាប់មនុស្សជិត ៦ ០០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ