នាយករដ្ឋមន្រ្តីក្រិកប្រកាសធ្វើប្រជាមតិទៅលើផែនការជំនួយរបស់អឺរ៉ុប
នៅសល់តែ៣ថ្ងៃទៀតដល់កាលកំណត់ដែលក្រិកអាចនឹងត្រូវក្ស័យធន តែការចរចា រវាងក្រិក និងអឺរ៉ុបនៅតែបន្តជាប់គាំង។ ចំណុចខ្ទាស់ធំបំផុតនៅក្នុងការចរចានេះ គឺអឺរ៉ុបទាមទារឲ្យក្រិកធ្វើកំណែទម្រង់ធំៗមួយចំនួនជាថ្នូរនឹងការផ្តល់ជំនួយ ក៏ប៉ុន្តែ កំណែទម្រង់ខ្លះដែលអឺរ៉ុបទាមទារនេះត្រូវរដ្ឋាភិបាលក្រិកបដិសេធ។ ស្ថិតនៅក្នុងការប្រឈមមុខដាក់គ្នានេះ នាយករដ្ឋមន្រ្តីក្រិកបានប្រកាស កាលពីរំលងអធ្រាតថ្ងៃសុក្រ ឈានចូលថ្ងៃសៅរ៍នេះថា លោកនឹងរៀបចំធ្វើការបោះឆ្នោតប្រជាមតិមួយ ដើម្បីទុកឲ្យពលរដ្ឋក្រិកទូទាំងប្រទេសជាអ្នកសម្រេចថា តើសុខចិត្តទទួលជំនួយដោយមានលក្ខខណ្ឌពីអឺរ៉ុបនេះដែរឬអត់?
ចុះផ្សាយនៅថ្ងៃ៖
ស្តាប់ - ០២:១៤
ការប្រកាសរៀបចំបោះឆ្នោតប្រជាមតិ ត្រូវបានលោកអាឡិចស៊ីស ស៊ីប្រាស់ (Alexis Tsipras) ធ្វើឡើង នៅក្រោយជំនួបកំពូលអឺរ៉ុប នៅទីក្រុងព្រុចស៊ែល កាលពីយប់ថ្ងៃសុក្រ ដោយនៅក្នុងជំនួបកំពូលនោះ មេដឹកនាំប្រទេសចាយលុយអឺរ៉ូបានស្នើឡើងនូវផែនការផ្តល់ជំនួយដល់ក្រិក ជាទឹកប្រាក់ចំនួន ១២ពាន់លានអឺរ៉ូ ដោយចែកចេញជា ៤ដំណាក់កាល សម្រាប់រយៈពេល ៥ខែ ពោលគឺ ចាប់ពីដើមខែកក្កដា រហូតដល់ដំណាច់ខែវិច្ឆិកា។ ក៏ប៉ុន្តែ ជំនួយនេះមានភ្ជាប់មកជាមួយនឹងលក្ខខណ្ឌ ដែលតម្រូវឲ្យក្រិកធ្វើកំណែទម្រង់ធំៗមួយចំនួន រួមមានដូចជាការដំឡើងពន្ធលើតម្លៃបន្ថែម និងការកាត់បន្ថយលុយសោធននិវត្តន៍ ជាដើម។
នៅក្នុងសេចក្តីថ្លែងការណ៍តាមទូរទស្សន៍ នៅរំលងអធ្រាតឈានចូលថ្ងៃសៅរ៍នេះ លោកអាឡិចស៊ីស ស៊ីប្រាស់ បានរិះគន់អឺរ៉ុបថា កំពុងតែដាក់ឱសានវាទដល់ក្រិកឲ្យទទួលយកនូវផែនការផ្តល់ជំនួយ ដែលនឹងរារាំងមិនឲ្យសេដ្ឋកិច្ច និងសង្គមក្រិកអាចងើបមុខឡើងវិញរួច។ លោកនាយករដ្ឋមន្រ្តីក្រិកក៏បានលើកឡើងផងដែរថា អ្វីដែលអឺរ៉ុបស្នើឡើងនៅពេលនេះ គឺធ្វើឡើងក្នុងគោលដៅបំបាក់មុខមាត់ប្រជាជនក្រិកទាំងមូល។
នៅក្នុងន័យនេះហើយ ដែលលោកអាឡិចស៊ីស ស៊ីប្រាស់ ប្រកាសប្រគល់អំណាចឲ្យប្រជាពលរដ្ឋក្រិកជាអ្នកសម្រេចចិត្តដោយខ្លួនឯងថា តើគួរ ឬមិនគួរទទួលយកនូវសំណើរបស់អឺរ៉ុប។ ការសម្រេចចិត្តនេះនឹងត្រូវធ្វើ នៅក្នុងការបោះឆ្នោតប្រជាមតិមួយ ដែលនឹងត្រូវរៀបចំធ្វើ នៅថ្ងៃអាទិត្យ ទី៥កក្កដាខាងមុខ។
ក៏ប៉ុន្តែ ទម្រាំតែចាំលទ្ធផលប្រជាមតិនេះ ក្រិកប្រហែលជានឹងត្រូវក្ស័យធនរួចទៅហើយ ពីព្រោះថា កាលកំណត់ដែលក្រិកត្រូវសងបំណុលមូលនិធិរូបិយវត្ថុអន្តរជាតិ គឺនៅថ្ងៃទី៣០មិថុនា។ ហេតុដូច្នេះហើយបានជាលោកនាយករដ្ឋមន្រ្តីក្រិកបានប្រកាសថា លោកនឹងស្នើសុំឲ្យម្ចាស់បំណុលពន្យារពេលសងបំណុលប៉ុន្មានថ្ងៃ ដើម្បីទុកពេលឲ្យពលរដ្ឋក្រិកធ្វើការសម្រេចចិត្ត។
រហូតមកទល់នឹងពេលនេះ គេនៅមិនទាន់ឃើញមានប្រតិកម្មណាមួយនៅឡើយទេ ពីសំណាក់មូលនិធិរូបិយវត្ថុអន្តរជាតិ តបទៅនឹងការប្រកាសធ្វើប្រជាមតិរបស់ក្រិក។ ប្រទេសចាយលុយអឺរ៉ូវិញបានសម្រេចរក្សាទុកកិច្ចប្រជុំរដ្ឋមន្រ្តីក្រសួងហិរញ្ញវត្ថុជាមួយគណៈប្រតិភូក្រិក ដើម្បីព្យាយាមរកការសម្រុះសម្រួលគ្នា។ ក៏ប៉ុន្តែ មន្រ្តីជាន់ខ្ពស់នៅក្នុងតំបន់ចាយលុយអឺរ៉ូបានបង្ហើបឲ្យដឹងថា នៅក្នុងកិច្ចប្រជុំនៅថ្ងៃសៅរ៍នេះ ប្រសិនបើគេមិនអាចរកកិច្ចសម្រុះសម្រួលជាមួយក្រិកបានទេនោះ រដ្ឋមន្រ្តីក្រសួងហិរញ្ញវត្ថុនៃប្រទេសចាយលុយ ប្រហែលជានឹងត្រូវជជែកគ្នា អំពីផែនការត្រៀមទប់ទល់នឹងករណីក្រិកក្ស័យធន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ