តើគេអាចទប់ស្កាត់ពួកជីហាតនៃអង្គការរដ្ឋអ៊ីស្លាមកុំឲ្យរើសចូលសមាជិកថ្មីបានយ៉ាងម៉េច?
ចុះផ្សាយនៅថ្ងៃ៖
ស្តាប់ - ០៨:០៥
រដ្ឋមន្រ្តីការបរទេសរបស់ប្រទេសចំនួន ២១ ដែលជាសមាជិក សម្ព័ន្ធអន្តរជាតិប្រយុទ្ធប្រឆាំងនឹងក្រុមជីហាតនៃអង្គការរដ្ឋអ៊ីស្លាម ត្រូវជួបប្រជុំគ្នា នៅថ្ងៃព្រហស្បតិ៍ទី ២២ មករា នៅក្នុងទីក្រុងឡុងដ៍។ ការរិះរកមធ្យោបាយដើម្បីទប់ស្កាត់កុំឲ្យក្រុមជីហាតនៃអង្គការរដ្ឋអ៊ីស្លាមរើសបញ្ចូលសមាជិកថ្មី ក៏ជាប្រធានបទសំខាន់មួយ ដែលប្រមុខការបរទេសរបស់អាមេរិក អង់គ្លេស បារាំង និងប្រទេសសម្ព័ន្ធមិត្តដទៃទៀត រួមទាំងប្រទេសអារ៉ាប់ ផង ត្រូវលើកយកទៅជជែក នៅក្នុងកិច្ចប្រជុំក្នុងទីក្រុងឡុងដ៍។
កាលពីថ្ងៃទី ៣ខែធ្នូ ឆ្នាំមុន សម្ព័ន្ធអន្តរជាតិបានរៀបចំកិច្ចប្រជុំដូចគ្នានេះ នៅទីស្នាក់ការកណ្តាលរបស់អង្គការអូតង់ ក្នុងទីក្រុងព្រុចស៊ែល ប្រទេសបែលហ្ស៊ិក។ ដូចនៅក្នុងកិច្ចប្រជុំ នៅទីស្នាក់ការកណ្តាលរបស់អង្គការអូតង់ ប្រទេសចូលរួមនៅក្នុងកិច្ចប្រជុំថ្ងៃ នៅថ្ងៃព្រហស្បតិ៍នេះ នឹងបូកសរុបលើប្រតិបត្តិការយោធាដែលសម្ព័ន្ធអន្តរជាតិ បានធ្វើកន្លងមក។ កិច្ចប្រជុំនឹងផ្តោតផងដែរទៅលើ វិធានការដើម្បីកាត់ផ្តាច់ប្រភពហិរញ្ញវត្ថុ និងប្រព័ន្ធផ្សព្វផ្សាយអូសទាញ របស់ក្រុមជីហាត នៃអង្គការរដ្ឋអ៊ីស្លាម។
កិច្ចប្រជុំនៅទីក្រុងឡុងដ៍ ត្រូវបានរៀបចំជាថ្មី ដើម្បីឆ្លើយតបទៅនឹងព្រឹត្តិការណ៍ថ្មីៗចុងក្រោយនេះ ដូចជាភេរវកម្ម សម្លាប់មនុស្ស១៧នាក់ នៅបារាំង ភេរវកម្មសម្លាប់មនុស្សនៅហាងកាហ្វេ ក្នុងប្រទេសអូស្ត្រាលី ឬភេរវកម្មសម្លាប់សិស្សសាលាប៉ាគីស្ថានជាដើម។ ថ្មីៗនេះទៀត បន្ទាប់ពីវាយទប់ស្កាត់ជាមុនបណ្តាញភេរវនិយមជីហាត នៅបែលហ្សិក និងនៅអាល្លឺម៉ង់ អឺរ៉ុបនៅតែព្រួយបារម្ភខ្លាចមានការវាយប្រហាររបស់ពួកជីហាត នៅពេលខាងមុខ។
ម្យ៉ាងទៀត កិច្ចប្រជុំលើកនេះត្រូវបានដឹកនាំដោយរដ្ឋមន្រ្តីការបរទេសអង់គ្លេស និងប្រមុខការទូតអាមេរិក លោកចន ឃេរី បន្ទាប់ពីមានជំនួបជាផ្លូវរវាងនាយករដ្ឋមន្រ្តីអង់គ្លេស និងលោកប្រធានាធិបតីអាមេរិក បារ៉ាក់ អូបាម៉ា សប្តាហ៍មុន។
ក្រៅតែពីប្រតិបត្តិការយោធាដើម្បី វាយប្រហារទៅលើក្រុមជីហាត នៃអង្គការរដ្ឋអ៊ីស្លាម នៅស៊ីរី និងនៅអ៊ីរ៉ាក់ គេសង្ឃឹមថា សមាជិករបស់សម្ព័ន្ធអន្តរជាតិនឹងអនុម័តគាំទ្រឲ្យមានប្រតិបត្តិការស៊ីវិលមួយទៀត ពោលគឺការចែករំលែកព័ត៌មានរវាងប្រទេសសមាជិក ដើម្បីទប់ស្កាត់កុំឲ្យក្រុមជីហាតអាចបញ្ចុះបញ្ចូលរើសជនបរទេស ឲ្យទៅចូលរួមនៅក្នុងចលនារបស់ខ្លួននៅទឹកដីស៊ីរី ឬនៅអ៊ីរ៉ាក់។
រកមធ្យោបាយដើម្បីទប់ស្កាត់កុំឲ្យក្រុមជីហាតនៃអង្គការរដ្ឋអ៊ីស្លាម អាចរើសសមាជិកថ្មី
តាមគណៈកម្មការរបស់ក្រុមប្រឹក្សាសន្តិសុខនៃអង្គការសហប្រជាជាតិ មានជនបរទេសប្រមាណ១ម៉ឺន ៥ពាន់នាក់ មកពីប្រទេសចំនួន ៨០ កំពុងចូលរួម ប្រយុទ្ធក្នុងក្រុមជីហាត នៅប្រទេសស៊ីរី និងអ៊ីរ៉ាក់។
ក្រុមជីហាតនៃអង្គការរដ្ឋអ៊ីស្លាម ដែលទើបចេញមុខមាត់ ខ្លាំងនៅឆ្នាំ ២០១៤ បានប្រើទាំងយុទ្ធសាស្រ្តផ្លូវចិត្ត និងទឹកប្រាក់ដើម្បីអូសទាញជនបរទេសជីហាតរាប់ពាន់នាក់ ជាពិសេសពីអឺរ៉ុប ឲ្យទៅចូលរួមជាមួយខ្លួន នៅស៊ីរី។ សហរដ្ឋអាមេរិក និងប្រទេសសម្ព័ន្ធអន្តរជាតិទទួលស្គាល់ថា អ៊ីនធ័រនែត ជាពិសេសបណ្តាញសង្គមដូចជាFacebook ត្រូវបានពួកភេរវនិយមប្រើយ៉ាងមានប្រសិទ្ធិភាពដើម្បីរើសមនុស្សឲ្យចូលជាសមាជិកចលនារបស់ខ្លួន។
កន្លងមក នៅលើអ៊ីនធ័រនែត ក្រុមជីហាត នៃអង្គការរដ្ឋអ៊ីស្លាម បានប្រើរូបភាពវីដេអូរដែលបង្ហាញការកាត់កប្រហារជីវិតចំណាប់ខ្មាំងអាមេរិក និងអង់គ្លេស។ តាមអ្នកជំនាញ រូបភាពវីដេអូរបានផ្តល់សារយ៉ាងមានប្រសិទ្ធិភាពទៅលើក្រុមយុវជនបរទេស ដែលកំពុងស្វែងរកអត្តសញ្ញាណផ្ទាល់ខ្លួន។ ម្យ៉ាងទៀត ខុសពីក្រុមភេរវជនផ្សេងទៀត ក្រុមជីហាតឆ្លាត មានយុទ្ធសាស្រ្តអូសទាញមនុស្ស និងរចនាសម្ព័ន្ធដឹកនាំ ច្បាស់លាស់។ នៅក្នុងរូបភាពវីដេអូបង្ហាញការប្រហារជីវិតចំនាប់ខ្មាំង ក្រុមជីហាត នៃអង្គការរដ្ឋអ៊ីស្លាមបានប្រើរូបភាពយុវជនបរទេស ដូចជាបារាំង ឬអង់គ្លេស ដែលកាន់អាវុធចូលរួមជាមួយក្រុមខ្លួន។ យុវជននៅអឺរ៉ុបភាគច្រើន ដែលមិនសូវបានទទួលការអប់រំ ឬកំពុងជួបបញ្ហា គ្មានការងារធ្វើ នៅក្នុងប្រទេសកំណើតរបស់ខ្លួន យល់ថា ជនជាតិរបស់ខ្លួនបានទៅចូលរួម ជាមួយក្រុមជីហាត។ ពួកគេមានជីវិតគ្រាន់បើ គឺយ៉ាងហោចបានចូលរួមប្រយុទ្ធក្នុងបុព្វហេតុសាសនាអ៊ីស្លាម។ ដោយយល់ដូច្នេះហើយ ក្រុមយុវជនអឺរ៉ុបជាច្រើនរយនាក់ បានចាកចេញ ជាបន្តបន្ទាប់ ទៅចូលរួមជាមួយចលនាជីហាត តាមរយៈបណ្តាញរើសមនុស្ស ដែលគេរកឃើញថា មានមូលដ្ឋានធំ នៅប្រទេសបែលហ្ស៊ិក។
មធ្យោបាយសំខាន់ដើម្បីរារាំងកុំឲ្យក្រុមជីហាតរើសជនបរទេសតទៅមុខទៀត និងដើម្បីជៀសវាងកុំឲ្យក្រុមនេះ ត្រលប់មកធ្វើភេរវកម្មនៅទឹកដីកំណើតវិញ នោះ អាមេរិក និងប្រទេសសម្ព័ន្ធមិត្តបានគិតគូរវាយប្រហារការផ្សព្វផ្សាយអ៊ីនធ័រនែតរបស់ក្រុមជីហាត។ តាមអាមេរិក ប្រតិបត្តិការវាយប្រហារតាមជើងអាកាស ជាង១០០០បានទប់ស្កាត់ក្រុមជីហាតកុំឲ្យពង្រីកដែនគ្រប់គ្រងរបស់ខ្លួន និងបានបំបាក់ទឹកចិត្តជនបរទេស ដែលឃើញជនបរទេសដទៃទៀត ស្លាប់នៅក្នុងការវាយប្រហាររបស់យន្តហោះសម្ព័ន្ធអន្តរជាតិ។
លោកចន ឃេរី នៅមុនឡើងយន្តហោះទៅទីក្រុងឡុងដ៍បាននិយាយថា វាជាដំណឹងល្អដែលប្រទេសចំនួន១៧បានធ្វើការយ៉ាងសកម្មដើម្បីពង្រឹងច្បាប់ ដើម្បីដាក់ពិន័យអ្នកដែលចង់ចេញទៅប្រយុទ្ធជាមួយពួកជីហាត នៅស៊ីរី។ អង់គ្លេសផ្ទាល់ ទើបបានចុះកិច្ចព្រមព្រៀងជាមួយតួកគី ក្នុងការផ្លាស់ប្តូរបញ្ជីឈ្មោះរបស់អ្នកដំណើររវាងប្រទេសទាំងពីរ។ ធ្វើដូច្នេះ គឺអង់គ្លេសអាចដឹងបានជាមុន ឈ្មោះមនុស្សដែលគេសង្ស័យថា នឹងទៅស៊ីរី ដើម្បីចូលរួមជាមួយក្រុមជីហាត។
ពូកជីហាតនៃអង្គការរដ្ឋអ៊ីស្លាម មានលុយច្រើនបានមកពីការលក់ប្រេង ការយកពន្ធពីប្រជាជនដែលរស់នៅក្នុងតំបន់កាន់កាប់របស់ខ្លួន និងការចាប់ជំរិត។ ជាក់ស្តែង កាលពីថ្ងៃអង្គារ ក្រុមជីហាតបានគំរាមប្រហារជីវិតប្រជាជនជប៉ុន២នាក់ បើរដ្ឋាភិបាលជប៉ុនមិនបង់ប្រាក់២០០លានដុល្លារ ដើម្បីជាថ្នូរលោះនោះទេ។ ជប៉ុន កាលពីថ្ងៃម្សិលមិញ បានអំពាវនាវសុំឲ្យសម្ព័ន្ធមិត្តជាពិសេសអាមេរិក និងបារាំង ជួយអន្តរាគមដើម្បីរំដោះជនជាតិទាំងពីរនាក់របស់ខ្លួន។
នៅថ្ងៃនេះ ជប៉ុនមិនបានចូលរួមនៅក្នុងកិច្ចប្រជុំមែន ប៉ុន្តែ កាលពីថ្ងៃម្សិលមិញ រដ្ឋមន្រ្តីការពារជាតិជប៉ុនបានស្ថិតនៅប្រទេសអង់គ្លេស ដើម្បីអំពាវនាវឲ្យគេជួយអន្តរាគម ដើម្បីរំដោះចំណាប់ខ្មាំងជប៉ុនទាំងពីរនាក់ពីដៃរបស់ក្រុមជីហាត។ តាមរដ្ឋមន្រ្តីការពារជាតិជប៉ុន សម្ព័ន្ធមិត្តជាច្រើនបានត្រឹមប្រាប់ជប៉ុនកុំឲ្យបង់ប្រាក់លោះទៅឲ្យក្រុមជីហាតឲ្យសោះ។ ជប៉ុនដែលព្យាយាមសាងមុខមាត់នៅលើឆាកអន្តរជាតិ ទើបបានសន្យាផ្តល់ប្រាក់២០០លានដុល្លារ ដល់ប្រតិបត្តិការប្រយុទ្ធប្រឆាំងនឹងក្រុមភេរវនិយម។
ក្រុមជីហាតជីហាតវិញ ព្រមានប្រហារជីវិតជនជាតិជប៉ុន ពីររូប ជាថ្នូរនឹងប្រាក់២០០លានដុល្លារ នឹងសងសឹកជប៉ុនដែលជួយផ្តល់ប្រាក់ដល់ប្រតិបត្តិការរបស់សម្ព័ន្ធអន្តរជាតិ ដែលពេលនេះ កំពុងវាយប្រហារទៅលើអង្គការរដ្ឋអ៊ីស្លាមនៅស៊ីរី។
សូមបញ្ជាក់ថា នៅក្នុងអតីតកាល ជប៉ុនធ្លាប់បង់លុយទៅឲ្យក្រុមចាប់ជំរិត ដើម្បីរំដោះជីវិតចំណាប់ខ្មាំងជនជាតិរបស់ខ្លួន។ អ្នកនាំពាក្យរបស់រដ្ឋាភិបាលជប៉ុនវិញ បានព្យាយាមមិនឆ្លើយសំណួររបស់អ្នកកាសែត ដែលសួរថា តើជប៉ុននឹងបង់ ឬមិនបង់លុយទៅឲ្យក្រុមជីហាត។ នៅក្រោយសារវីដេអូទាមទារប្រាក់២០០លានដុល្លារពីក្រុមជីហាត រដ្ឋាភិបាលជប៉ុនបានប្រកាសថា ខ្លួនមិនចុះញ៉មនឹងការគំរាមរបស់ក្រុមជីហាត។ គឺអាចមានន័យថា ជប៉ុននឹងមិនឲ្យលុយទៅក្រុមជីហាតទេ។ ប៉ុន្តែ កាលពីថ្ងៃពុធម្សិលមិញ នាយករដ្ឋមន្រ្តីជប៉ុនហាក់បានប្តូរជំហរផ្ទុយមកវិញ ដោយបានប្រកាសថា រដ្ឋាភិបាលនឹងធ្វើគ្រប់មធ្យោបាយដើម្បីអាចរំដោះជនជាតិរបស់ខ្លួនពីដៃក្រុមជីហាត។ ទៅតាមការគំរាមរបស់ក្រុមជីហាត រដ្ឋាភិបាលជប៉ុនមានពេលដល់រសៀលថ្ងៃសុក្រស្អែក ដើម្បីបង់ប្រាក់ ២០០លានដុល្លារ រំលោះយកជនជាតិរបស់ខ្លួន មកវិញ។ តាមកាសែតជប៉ុនជាច្រើន ដោយមើលទៅបរិបទបច្ចុប្បន្ន នោះគឺជនជាតិជប៉ុនបានធ្វើដំណើរទៅកាន់តំបន់គ្រោះថ្នាក់ ស៊ីរី បើទោះបីជាការព្រមានហាមឃាត់ពីរដ្ឋាភិបាល ជាមុន ដូច្នេះ រដ្ឋាភិបាលជប៉ុនអាចនឹងមិនបង់ប្រាក់ទៅឲ្យក្រុមជីហាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ