អ្នកវិនិយោគកាន់តែច្រើនបែរខ្នងដាក់ថាមពលបានមកពីធ្យូងថ្ម
ស្ថាប័ន ក្រុមហ៊ុនជាង៥០០ ក្នុងពិភពលោកបានប្រកាសបដិសេធមិនវិនិយោគលើវិស័យថាមពលធ្យូងថ្ម។ តួលេខដ៏គួរឲ្យលើកទឹកចិត្តនេះ ត្រូវបានអង្គការបរិស្ថានអន្តរជាតិ ឈ្មោះ ៣៥០ ប្រកាស នៅថ្ងៃពុធទី ២ធ្នូ ថ្ងៃបើកទី៣ នៃសន្និសីទរបស់អង្គការសហប្រជាជាតិ ស្តីពីអាកាសធាតុ ដែលកំពុងបើកធ្វើនៅទីក្រុងប៉ារីស។
ចុះផ្សាយនៅថ្ងៃ៖
ចំនួនសកលវិទ្យាល័យ ក្រុមហ៊ុន និងរដ្ឋាភិបាលដែលបានសម្រេចលះបង់ចោលគម្រោងវិនិយោគទៅលើថាមពលធ្យូងថ្មបានកើនឡើងជាបន្តបន្ទាប់។ នៅក្នុងរបាយការណ៍របស់អង្គការបរិស្ថានអន្តរជាតិ ៣៥០ ស្ថាប័នជាង ៥០០ ដែលតំណាងឲ្យមូលធន ៣ពាន់ ៤រយ ពាន់លានដុល្លារ បានប្រកាសលែងវិនិយោគលើថាមពលធ្យូងថ្ម និង បែរទៅរកវិនិយោគលើថាមពលមិនចេះរីងស្ងួត ដែលមិនប៉ះពាល់ដល់បរិស្ថានទៅវិញ។ សម្រាប់ហូដា បារ៉ាកា មន្រ្តីព័ត៌មានរបស់អង្គការ ៣៥០ នេះជាដំណឹងល្អ នៅពេលដែលក្រុមហ៊ុនមានទុនរាប់លានដុល្លារ លែងវិនិយោគតទៅទៀតលើថាមពលធ្យូងថ្ម ដែលគ្មានអនាគត និងដែលជាអ្នកទទួលខុសត្រូវឲ្យមានឧស្ម័នកាបូនិក ឧស្ម័នផ្ទះកញ្ចក់ ដែលជាមូលហេតុធ្វើផែនដីឡើងកំដៅ និងប្រែប្រួលអាកាសធាតុ។
ហូដា បារ៉ាកា៖ “យុទ្ធនាការរបស់យើងចាប់ផ្តើមតាំងពីឆ្នាំ ២០១២ ប៉ុន្តែទើបតែទទួលផលគួរឲ្យកត់សំគាល់នៅប៉ុន្មានសប្តាហ៍ចុងក្រោយនេះ។ ជាក់ស្តែង កាលពីខែកញ្ញា យើងរកឃើញថា មានទឹកប្រាក់ប្រមាណ ២ពាន់ ៦រយ ពាន់លានដុល្លារ ដែលគេបែរលែងយកទៅវិនិយោគលើថាមពលធ្យូងថ្ម។ ប៉ុន្មានសប្តាហ៍ក្រោយមក តួលេខនេះបានលោតខ្ពស់មែនទែន ពី២ពាន់ ៦រយ ពាន់លានដុល្លារ ទៅដល់៣ពាន់ ៤រយ ពាន់លានដុល្លារ។ ហេតុអ្វីបានជាដូច្នេះ? ខ្ញុំគិតថា មនុស្សជាច្រើននៅក្នុងពិភពលោកយល់ដឹងពីភាពចាំបាច់ និងបន្ទាន់ ក្នុងការផ្លាស់ប្តូររបៀបប្រើប្រាស់ថាមពលដែលចេញមកពីធ្យូងថ្ម។ យើងទាំងអស់គ្នាយល់ស្របថា មានការប្រែប្រួលអាកាសធាតុ ហើយធ្យូងថ្មជាប្រភពបញ្ចេញឧស្ម័នកាបូនិក ដែលជាឧស្ម័នផ្ទះកញ្ចក់។ ម្យ៉ាងទៀត ក៏មានផងដែរទស្សនវិស័យហិរញ្ញវត្ថុ។ គេមើលឃើញថា ទីផ្សារថាមពលពិភពលោកមានការផ្លាស់ប្តូរ ខុសពីមុន។ ធ្យូងថ្មមិនអាចមានជីវិតអមតៈ គឺនឹងអស់នៅថ្ងៃណាមួយមិនខាន។ ដូច្នេះ គេមិនអាចរំពឹងយកផលសេដ្ឋកិច្ចពីវា ជារៀងរហូតនោះទេ គឺមិនដូចកាលពីប៉ុន្មានឆ្នាំមុននោះទេ។ ក្រុមហ៊ុនជាច្រើនយល់ថា មិនមែនជាការឆ្លាតវៃទេ ដែលគេវិនិយោគទៅលើធ្យូងថ្ម ដែលកាន់តែហោចទៅៗនោះ។ និន្នាការក្នុងពិភពលោកកំពុងប្រែប្រួល មានងាករេ បែរពីធ្យូងថ្ម ទៅរកថាមពលមិនចេះរីងស្ងួតដូចជាពន្លឺព្រះអាទិត្យ។ ដូច្នេះគេនៅរង់ចាំតែមេដឹកនាំពិភពលោកប៉ុណ្ណោះដែលត្រូវធ្វើនយោបាយឲ្យទាន់សភាពការណ៍។”
របាយការណ៍ស្តីពីការបែរខ្នងរបស់ក្រុមហ៊ុនវិនិយោគ ទៅលើវិស័យថាមពលធ្យូងថ្ម ត្រូវបានចេញផ្សាយ នៅថ្ងៃទី ៣នៃសន្និសីទអន្តរជាតិស្តីពីអាកាសធាតុ ក្នុងទីក្រុងប៉ារីស។ តាមមន្រ្តីព័ត៌មានរបស់អង្គការ៣៥០ វាជាមធ្យោបាយ មួយសម្រាប់ដាក់សំពាធលើរដ្ឋាភិបាល ឲ្យពន្លឿនការចរចា ឲ្យបានសម្រេច ពោលគឺបង្កើតកិច្ចព្រមព្រៀង ដែលនៅក្នុងនោះ គេយល់ព្រមកាត់បន្ថយការបញ្ចេញឧស្ម័នកាបូនិក ដើម្បីទប់ទល់កុំឲ្យផែនដីឡើងកំដៅច្រើនជាង ២អង្សារសេ ចាប់ពីពេលនេះ ដល់ដំណាច់សតវត្សរ៍ ទី ២១។
មិនមែនគ្រប់គ្នាសុទ្ធតែមានសីលធម៌ សុខចិត្តលះបង់ចោលផលប្រយោជន៍សេដ្ឋកិច្ចរបស់ខ្លួន ដែលពឹងផ្អែកលើថាមពលធ្យូងថ្មនោះទេ។ តាមរបាយការណ៍ដាច់ដោយឡែកមួយទៀត របស់អង្គការមិត្តនៃផែនដី Friends of Earth ធនាគារ មានប្រាក់មហាសាលជាច្រើន នៅអាមេរិក ស្វ៊ីស ជាដើម នៅតែបន្តផ្តល់ប្រាក់កម្ចីដល់គម្រោងវិនិយោគទៅលើធ្យូងថ្ម ជាជាងថាមពលមិនចេះរីងស្ងួត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ