ការស្ទង់មតិ៖ ក្រោយភេរវកម្ម គណបក្សប្រឆាំងបារាំងរឹតតែមានប្រជាប្រិយ
ប្រជាជនបារាំង នៅថ្ងៃអាទិត្យទី ៦ធ្នូ ត្រូវទៅបោះឆ្នោត ជ្រើសរើសក្រុមប្រឹក្សាថ្នាក់តំបន់។ នៅបីសប្តាហ៍ក្រោយទីក្រុងប៉ារីសរងការវាយប្រហារភេរវកម្ម ដែលសម្លាប់មនុស្ស ១៣០នាក់ ការបោះឆ្នោតថ្នាក់តំបន់ នៅថ្ងៃនេះ ត្រូវគេចាត់ទុកជាការតេស្ត វាយតម្លៃប្រជាប្រិយភាពរបស់គណបក្សកាន់អំណាច ដែលបានដាក់ប្រទេសក្នុងស្ថានភាពប្រកាសអាសន្ន ក្នុងរយៈពេល៣ខែ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ការបោះឆ្នោតថ្នាក់តំបន់ នៅប្រទេសបារាំង ធ្វើឡើងក្នុងបរិយាកាស មួយ ដែលប្រទេសត្រូវដាក់ឲ្យស្ថិតនៅ ក្នុងស្ថានភាពប្រកាសអាសន្ន។ នៅក្រោយភេរវកម្មដែលវាយប្រហារក្រុងប៉ារីស កាលពីបីសប្តាហ៍មុន សន្តិសុខត្រូវបានរឹតបន្តឹងយ៉ាងខ្លាំង ជាមួយនឹងការពង្រាយប៉ូលិស ទាហាននៅតាមការិយាល័យបោះឆ្នោត។ នៅក្នុងការបោះឆ្នោតថ្នាក់តំបន់ជុំទី១ នៅថ្ងៃអាទិត្យនេះ ប្រជាជនបារាំង ប្រមាណ ៤៤ លាន៦សែននាក់ ត្រូវទៅបោះឆ្នោតជ្រើសរើសតំណាងក្រុមប្រឹក្សាថ្នាក់តំបន់ និងដែនដី សរុបប្រមាណ១៩០០នាក់ នៅទូទាំងប្រទេស។
នៅប្រទេសបារាំង ការបោះឆ្នោតថ្នាក់តំបន់មានសារៈសំខាន់ ព្រោះថា ក្រុមប្រឹក្សាថ្នាក់តំបន់ដែលនឹងត្រូវជ្រើសរើសចេញពីការបោះឆ្នោតលើកនេះ នឹងមានសិទ្ធិគ្រប់គ្រងថវិកាក្នុងតំបន់របស់ខ្លួន។ ដោយមិនចាំបាច់ឆ្លងកាត់ សុំការអនុញ្ញាតិពីរដ្ឋាភិបាល ក្រុមប្រឹក្សាថ្នាក់តំបន់មានអំណាចសម្រេចទៅលើការអភិវឌ្ឍន៍សេដ្ឋកិច្ច ផ្លូវគមនាគមន៍ ការអប់រំ ហើយ និងការវិនិយោគ។
នៅមុនការបោះឆ្នោត ការស្ទង់មតិបានបង្ហាញរួចហើយថា គណបក្សប្រឆាំង ធំជាងគេរបស់បារាំង ហើយនិងគណបក្សស្តាំនិយមជ្រុលនឹងឈ្នះលើគណបក្សឆ្វេងនិយម ដែលជាគណបក្សរបស់លោកប្រធានាធិបតី។ តាមការស្ទង់មតិ គណបក្សស្តាំនិយមជ្រុល ដែលជាគណបក្សប្រឆាំងជនអន្តោប្រវេសន៍ និងប្រឆាំង អឺរ៉ុបនឹងទទួលបានសំឡេងគាំទ្រប្រមាណ២៧ភាគរយ។ ចំណែកគណបក្សប្រឆាំង របស់លោកអតីតប្រធានាធិបតីបារាំង នីកូឡា សាកូហ្សី ក៏នឹងអាចទទួលបានសំឡេងនាំមុខគេ គឺប្រមាណ៣០ភាគរយ បើប្រៀបធៀបនឹងគណបក្សកាន់អំណាចសង្គមនិយម នឹងបាត់បង់សំឡេង មកនៅត្រឹម ២២ភាគរយ។
ចំណាត់ការរបស់រដ្ឋាភិបាលក្នុងការប្រយុទ្ធប្រឆាំងនឹងក្រុមភេរវនិយម នៅក្រោយប៉ារីសរងវាយប្រហារដោយភេរវកម្មបានធ្វើឲ្យកូដប្រជាប្រិយភាពរបស់លោកហ្វ្រង់ស័រ ហូឡង់ ប្រធានាធិបតីបារាំង ឡើងខ្លាំងមែនទែន។ ប៉ុន្តែ កូដប្រជាប្រិយភាពរបស់លោកប្រធានាធិបតីនឹងមិនអាចជួយយឹតយោងគណបក្សកាន់អំណាចរបស់លោក ឲ្យអាចទទួលជ័យជំនះនៅក្នុងការបោះឆ្នោតថ្នាក់តំបន់លើកនេះ។
តាមការស្ទង់មតិ គណបក្សស្តាំនិយមជ្រុលរបស់គ្រួសារLe Penអាចទទួលបានការគាំទ្រច្រើន បន្ទាប់ពីថ្នាក់ដឹកនាំរបស់គណបក្សនេះបាននិយាយបញ្ចុះបញ្ចូលជនជាតិបារាំង ឲ្យឃើញ ពីការគំរាមកំហែងនៃនយោបាយជនអន្តោប្រវេសន៍របស់រដ្ឋាភិបាលសព្វថ្ងៃនេះ។ បើសិនគណបក្សស្តាំនិយមជ្រុលទទួលជ័យជំនះនៅក្នុងការបោះឆ្នោត លើកនេះ ដណ្តើមបានតំបន់មួយចំនួន (ក្នុងចំណោម តំបន់សរុប ចំនួន ១៣នៅប្រទេសបារាំង) យកមកគ្រប់គ្រង នោះ គណបក្សស្តាំនិយមជ្រុល ដែលប្រឆាំងអឺរ៉ុប និងប្រឆាំងជនអន្តោប្រវេសន៍ជាពិសេសអ្នកកាន់សាសនាអ៊ីស្លាម ក្នុងប្រទេសបារាំង នឹងមានកម្លាំងបន្ថែម ដើម្បីចូលរួមប្រកួតប្រជែងដណ្តើមអំណាច នៅក្នុងការបោះឆ្នោតប្រធានាធិបតីបារាំង នៅឆ្នាំ ២០១៧ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ