អង្គការអូតង់នឹងប្រជុំនិយាយអំពីប្រតិបត្តិការយោធារបស់តួកគីនៅស៊ីរីនិងអ៊ីរ៉ាក់
បក្សសម្ព័ន្ធអូតង់បើកកិច្ចប្រជុំនៅថ្ងៃអង្គារនេះ ទៅតាមសំណើរបស់តួកគី ដែលជាប្រទេសសមាជិក។ ការស្នើឲ្យកោះប្រជុំអូតង់ ត្រូវបានធ្វើឡើង នៅក្រោយពេលដែលតួកគីបានសម្រេចបើកធ្វើប្រតិបត្តិការយោធាវាយប្រហារទៅលើក្រុមជីហាតរដ្ឋអ៊ីស្លាម ក៏ដូចជា ទីតាំងរបស់ពួកឧទ្ទាមគួឌីស្ថាន នៅក្នុងប្រទេសស៊ីរី និងអ៊ីរ៉ាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
អង្គការអូតង់បានឲ្យដឹង នៅក្នុងសេចក្តីថ្លែងការណ៍របស់ខ្លួនថា តួកគីបានស្នើឲ្យបើកកិច្ចប្រជុំថ្នាក់អគ្គរដ្ឋទូតប្រទេសសមាជិកនៅថ្ងៃអង្គារនេះ គឺដើម្បីជជែកអំពីបញ្ហាសន្តិសុខនៅក្នុងប្រទេសតួកគី ក្រោយពីមានការវាយប្រហាភេរវកម្មជាបន្តបន្ទាប់ កាលពីសប្តាហ៍មុន និងដើម្បីជូនដំណឹងអូតង់ អំពីវិធានការដែលរដ្ឋាភិបាលតួកគីកំពុងដាក់ចេញ។
គួរបញ្ជាក់ថា យោងតាមសន្ធិសញ្ញាអូតង់ ប្រទេសជាសមាជិកណាមួយក៏ដោយអាចកោះប្រជុំសមាជិកទាំង ២៨ប្រទេសបានគ្រប់ពេល ឲ្យតែប្រទេសនោះយល់ថា បូរណភាពទឹកដី ឯករាជ្យ និងសន្តិសុខរបស់ខ្លួនកំពុងទទួលរងនូវការគំរាមកំហែងពីខាងក្រៅ។
ដូច្នេះ ការណ៍ដែលតួកគីកោះប្រជុំអូតង់នៅថ្ងៃអង្គារនេះ គឺបានន័យថា រដ្ឋាភិបាលតួកគីយល់ឃើញថាសន្តិសុខរបស់តួកគី កំពុងទទួលរងនូវការគំរាមកកំហែងពីសំណាក់ក្រុមជីហាតរដ្ឋអ៊ីស្លាម និងក្រុមឧទ្ទាមគួឌីស្ថាន។
ទោះជាយ៉ាងណាក៏ដោយ តួកគីមិនបានស្នើសុំជំនួយផ្នែកយោធាពីអូតង់ ដើម្បីជួយក្នុងយុទ្ធនាការវាយប្រហារទៅលើក្រុមជីហាតរដ្ឋអ៊ីស្លាម និងក្រុមឧទ្ទាមគួឌីស្ថាន។ នេះបើយោងតាមការអះអាងរបស់លោក Jens Stoltenberg អគ្គលេខាធិការអង្គការអូតង់។
លោក Jens Stoltenberg ក៏បានលើកឡើងផងដែរថា អូតង់គាំទ្រយ៉ាងពេញទំហឹងចំពោះប្រតិបត្តិការយោធារបស់តួកគីទៅលើក្រុមជីហាតរដ្ឋអ៊ីស្លាម។ ក៏ប៉ុន្តែ ក្នុងពេលជាមួយគ្នា លោកអគ្គលេខាធិការអូតង់បានបង្ហាញនូវក្តីបារម្ភថា ការវាយប្រហារទៅលើពួកឧទ្ទាមគួឌីស្ថាន អាចនឹងធ្វើឲ្យជម្លោះ រវាងកងកម្លាំងតួកគី និងកម្លាំងឧទ្ទាម PKK ដែលស្ងប់ស្ងាត់ជិត២ឆ្នាំមកហើយនេះ នឹងត្រូវឆាបឆេះឡើងវិញ ហើយកិច្ចខិតខំប្រឹងប្រែងក្នុងការស្វែងរកដំណោះស្រាយជម្លោះតាមផ្លូវនយោបាយ អស់រយៈពេលជាច្រើនឆ្នាំកន្លងទៅនេះ អាចនឹងត្រូវរលាយសាបសូន្យអស់ទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ