អូតង់ប្រតិកម្មនឹងការរំលោភដែនអាកាសតួកគី ជាសមាជិកខ្លួនដោយយន្តហោះរុស្ស៊ី
មិនមែន ជាឧប្បត្តិហេតុចៃដន្យឡើយ ដែលយន្តហោះចម្បាំងរុស្សី បានហោះ ចូលដែនអាកាសប្រទេសតួកគី ពីរថ្ងៃជាប់គ្នា។ សេចក្តីនេះថ្លែងដោយ អគ្គលេខាធិការបក្សសម្ព័ន្ធ អូតង់ ក្នុងសន្និសីទកាសែតថ្ងៃអង្គារ ទី ៦តុលា។ ប៉ុន្តែ ការបកស្រាយនេះរបស់គាត់ ត្រូវក្រុងម៉ូស្គូ ចាត់ទុក ជាលេស សម្រាប់បក្សសម្ព័ន្ធអូតង់ ផ្លុំបញ្ឆេះ “សង្គ្រាមឃោសនា “ ដើម្បី ក្លែងបំផ្លែង គោលដៅពិត នៃប្រតិបត្តិការដែលកំពុងបំពេញ ដោយកងអាកាសរុស្ស៊ី នៅស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
ថ្លែងថ្ងៃ ៦តុលា ក្នុងសន្និសីទកាសែត នៅក្រុង Bruxelles ជាទីស្តីការរបស់អូតង់ លោក អគ្គលេខាធិការបក្សសម្ព័ន្ធនេះ Jens Stoltenberg អះអាងថា “ព័ត៌មាន និង ទិន្នន័យឈ្លបយក បាន ហុចជាលេស ឲ្យខ្ញុំនិយាយថា ការរំលោភនេះមិនមែនជាឧប្បត្តិហេតុចៃដន្យឡើយ។ វា ជា ការរំលោភគួរឲ្យបារម្ភ ដ្បិតគ្រាន់តែ ក្នុង២ថ្ងៃសោះ នៃចុងសប្តាហ៍កន្លងទៅ យន្តហោះចម្បាំង រុស្ស៊ី បានបំពានដល់ទៅ២ដង ដែនអាកាសតួកគី។ ទាំង២លើកនេះ យន្តហោះរុស្ស៊ី បានស្ថិត ក្នុងដែនអាកាសតួកគី គឺយូរជាងលើកមុនៗ កាលដែលយន្តហោះរុស្ស៊ី បានបំពានដែនអាកាស ប្រទេសឯទៀតនៃទ្វីបអឺរ៉ុប។
លោកអគ្គលេខាអូតង់ ក៏គូសបញ្ជាក់ថា ការរំលោភចូលដែនអាកាសតួកគី ជាប្រទេស សមាជិក អូតង់ ដោយយន្តហោះរុស្ស៊ី បានពន្យារទៅ លើស ពី២នាទី ដូច្នេះ វាជាសក្ខីកម្ម សឲ្យឃើញថា ឧប្បត្តិហេតុទាំងពីរលើក លែងជារឿងចៃដន្យ ទៅហើយ។
លោក Stoltenberg កត់សម្គាល់ថា អូតង់ ឥតបានទទួលពីរុស្ស៊ីឡើយ នូវការពន្យល់បំភ្លឺ តើអ្វីទៅ ដែលបានកើតឡើង ក្នុងផ្ទៃមេឃតួកគី ពីព្រោះ អូតង់គ្មានខ្សែរយៈគមនាគមន៍ត្រង់ផ្ទាល់ ជាមួយ ម៉ូស្គូ។
គ្រាន់តែឮការបកស្រាយនេះ របស់អគ្គលេខាអូតង់ តំណាងអចិន្ត្រៃយ៍របស់រុស្ស៊ី ប្រចាំនៅ ទីស្តីការអូតង់ក្នុងក្រុង Bruxelles លោក Alexandre Grushko ថ្លែងថា តាមមើលទៅឧប្បត្តិហេតុ ពាក់ព័ន្ធនឹងយន្តហោះរុស្ស៊ី នៅតួកគី ត្រូវអូតង់ឆ្លៀតប្រើធ្វើជា ”សង្គ្រាមឃោសនា” ដើម្បី ក្លែង បំផ្លែង គោលដៅពិត នៃប្រតិបត្តិការដែលកងអាកាសរុស្ស៊ី កំពុងបំពេញ នៅស៊ីរី។ ក្នុងបរិបទ “សង្គ្រាម”នេះ អូតង់បានថ្លែងថា យន្តហោះរុស្ស៊ី ទម្លាក់គ្រាប់បែក មិនមែនទៅលើទីតាំងរបស់ អង្គការភេរវនិយម” រដ្ឋអ៊ីស្លាម”ឯណា។ ចំណែក លទ្ធផលនៃប្រតិបត្តិការ ធ្វើដោយ “សម្ព័ន្ធប្រឆាំង ភេរវនិយម” ដឹកនាំ ដោយស.រ.អា. គឺ “ចាក់សោរ ជារឿងសម្ងាត់៧ជាន់” មិនឲ្យនរណាដឹងទេ។
គួរនិយាយថា ទន្ទឹមនឹងរឿងរំលោភដែនអាកាសខ្លួន ដោយយន្តហោះរុស្ស៊ី ២លើកនោះ តួកគី ថ្ងៃ ៦តុលា បានផ្សាយថា មានយន្តហោះយោធា ធុន Mig-29 មួយគ្រឿងដែលគ្មានសញ្ញាសម្គាល់ ដោយប្រើរ៉ាដារ ខ្លួន អស់៤ម៉ោង និង៣០នាទីជាប់ បានបៀតបៀន រំខានដល់ការហោះល្បាត តាមព្រំដែន នៃយន្តហោះប្រដេញតួកគី ដល់ទៅ ៨គ្រឿង។ មិនតែប៉ុណ្ណោះ យន្តហោះប្រដេញ តួកគីទាំងនេះ ក៏ត្រូវបានបៀតបៀនដោយរ៉ាដារ របស់ប្រព័ន្ធការពារដែនអាកាស នៅលើដែនដី ស៊ីរី អស់ ៤ម៉ោង និង១៥នាទីដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ