តួកគីចោទថា មានយន្តហោះចម្បាំងរុស្ស៊ី បានហោះចូលដែនអាកាសតួកគី
យន្តហោះចម្បាំងរុស្ស៊ីមួយគ្រឿង បានរំលោភចូលដែនអាកាសតួកគី នៅក្បែរព្រំដែនស៊ីរី កាលពីថ្ងៃអាទិត្យ ទី៤ តុលា លុះទាល់តែបង្ខំកងទ័ពតួកគី ឲ្យបញ្ជូនយន្តហោះប្រដេញ ២គ្រឿងធុន F-16 ទៅបណ្តេញ យន្តហោះរុស្ស៊ីនោះ ចេញទៅ។ ដំណឹងនេះ ត្រូវបានប្រកាស ព្រឹកថ្ងៃចន្ទនេះ ដោយ ក្រសួងការបរទេសតួកគី។ ពិតជាក្នុងប្រតិបត្តិការវាយប្រហារ ទៅលើ ទីតាំងក្រុមភេរវជននៃអង្គការ ”រដ្ឋអ៊ីស្លាម” នៅប៉ែកខាងជើងស៊ីរី ដែលបណ្តាលឲ្យមាន ឧប្បត្តិហេតុនេះ កើតឡើង។
ចុះផ្សាយនៅថ្ងៃ៖
ស្តាប់ - ០២:០៥
សេចក្តីជូនដំណឹងរបស់ក្រសួងការបរទេសតួកគី លើកឡើងថា ដោយមកពីឧប្បត្តិហេតុនេះ អគ្គរដ្ឋទូតរុស្ស៊ី នៅតួកគី លោក Andrei Karlov ត្រូវបាន កោះអញ្ជើញ ដោយអាជ្ញាធរ តួកគី ដែលសំដែងការតវ៉ាប្តូរប្តេជ្ញទៅកាន់រូបគាត់។ ហើយតាមរយៈ រូបគាត់ តួកគីសុំរុស្ស៊ី ឲ្យឈប់ប្រព្រឹត្ត ការជ្រៀតចូលបែបនេះទៀត ពុំនោះសោតទេ ភាគីរុស្ស៊ីនឹងរងនាទីទទួលខុសត្រូវ ចំពោះ ឧប្បត្តិហេតុ មិនជាក្តីប្រាថ្នា ដែលអាចកើតមានឡើង។
ចំណែក លោកប្រមុខការទូតតួកគី Feridum Siniroglu បានភ្ជាប់ខ្សែរទូរស័ព្ទ ជាបន្ទាន់ ហើយបាន ជម្រាប សមភាគីរុស្ស៊ី លោក Serguei Lavrov អំពីគោលជំហរនេះរបស់រដ្ឋាភិបាលតួកគី។
អំពីតុល្យាការនៃការវាយប្រហារទៅលើទីតាំង ពពួកក្រុមភេរវជននៃអង្គការ ”រដ្ឋអ៊ីស្លាម” នៅលើដែនដីស៊ីរី ដែលកងអាកាសរុស្ស៊ី ធ្វើតាំង ពីថ្ងៃ ៣០កញ្ញាមក ក្រសួងការពារជាតិរុស្ស៊ី បានឲ្យដឹង ថា ក្នុង៥ថ្ងៃកន្លងទៅ យន្តហោះចម្បាំងរុស្ស៊ី បានចេញប្រតិបត្តិការ ជាង ៨០លើកហើយ ដោយ បានបំផ្លាញ ទីតាំងពួកភេរវជន អស់ជាង ៦០កន្លែង ក្នុងនោះ មានប៉ុស្តបញ្ជាការជាច្រើនន្លែង របស់ពួកនោះ , មានជំរំ ខាងបង្វឹកបង្ហាត់ ពួកភេរវជន , មានឃ្លាំងស្តុកអាវុធ និងស្បៀង ,មាន រោងជាង ខាងផលិតរំសេវ និងគ្រឿងផ្ទុះ។ល។ លុះទាល់តែបន្សោយមែនទែន សក្តានុពល ប្រយុទ្ធ របស់ពួកគេ។
ក្រសួងការពារជាតិលម្អិតថា ការវាយប្រហារត្រូវយន្តហោះរុស្ស៊ីធ្វើ លុះក្រោយ ពីទទួលបាន យ៉ាងច្បាស់ ពីកន្លែងស្ថិតនៅ នៃទីដៅដែលត្រូវវាយប្រហារ ដែលមិននាំឲ្យ ប៉ះពាល់ដល់សំណង់ ស៊ីវិលឡើយ។ មិនតែប៉ុណ្ណោះ គ្រាប់បែកបញ្ជា ដែលយន្តហោះរុស្ស៊ី ទម្លាក់ពីកំពស់ ជាង ៥.០០០ ម៉ែត្រ គឺរមែងធ្លាក់ត្រូវចំទីដៅ ក្នុងកម្រិតខ្ពស់ អាចលំអៀង យ៉ាងច្រើន ណាស់ ត្រឹម ៥ម៉ែត្រប៉ុណ្ណោះ។ ម្លោះហើយបានជា មានពួកភេរវជន ប្រមាណ ៧០០នាក់ហើយ បានដាក់អាវុធសុំចុះចូល មកខាងកងទ័ពរដ្ឋាភិបាលស៊ីរី។ ពួកទាហានស៊ីឈ្នួល ៦០០នាក់ ដែលច្បាំង នៅខាងក្រុមភេរវជន បានធ្លាក់ក្នុងភាពស្លន់ស្លោ កំពុងរកច្រកចេញទៅទ្វីបអឺរ៉ុប។
រុស្ស៊ីគូសបញ្ជាក់ថា ការវាយប្រហារនោះមិនគ្រាន់តែនឹងបន្ត ទៅប៉ុណ្ណោះទេ តែក៏នឹងមានកម្រិត កាន់តែខ្លាំងឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ