ទស្សនកិច្ចលោក ពូទីន នៅអ៊ូសបេគីស្ថាន-ប្រទេសជាដៃគូយុទ្ធសាស្ត្ររបស់រុស្ស៊ីនៅតំបន់អាស៊ីកណ្តាល
ក្នុងដំណើរទស្សនកិច្ចផ្លូវការ ដែលបានប្រព្រឹត្តទៅពេញមួយថ្ងៃម្សិលមិញ លោកប្រធានាធិបតីរុស្ស៊ី ពូទីន បានពិភាក្សាជាមួយសមភាគីអ៊ូសបេគីស្ថាន លោក Islam Karimov អំពីភាពជាដៃគូនេះ នៅតាមវិស័យបែបយ៉ាងសន្តិសុខតំបន់ យោធា ថាមពល ពាណិជ្ជកម្ម ផ្នែកប្រយុទ្ធទល់នឹងពួកជ្រុលនិយមអ៊ីស្លាម ពួកភេរវជន និង ទល់នឹងចរាចរណ៍គ្រឿងញៀនជាដើម។ ក្នុងចំណោមឯកសារចុះដោយគូភាគី គឺមានកិច្ចព្រមព្រៀងដែល លុបសឹងអស់រលីងបំណុល ដែលអ៊ូសបេគីស្ថានជំពាក់រុស្ស៊ី តាំងពីជំនាន់សហភាពសូវៀតមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
ទស្សនកិច្ចធ្វើថ្ងៃទី១០ធ្នូ ដោយលោកពូទីន នៅក្រុង តាស្កិន (Tachkent) រដ្ឋធានី អ៊ូសបេគីស្ថាន គឺឧទ្ទិសដល់ខួបគម្រប់១០ឆ្នាំ នៃសន្ធិសញ្ញាស្តីអំពីភាពជាដៃគូយុទ្ធសាស្ត្រ និង ភាពជាសម្ព័ន្ធមិត្ត រវាងរុស្ស៊ីនិង អ៊ូសបេគីស្ថាន ចុះកាលពីឆ្នាំ២០០៤។
ទស្សនកិច្ចនេះ ក៏ដើម្បីផ្ទៀងផ្ទាត់គោលជំហរ ប្រកាន់យកដោយប្រទេសទាំងពីរ ចំពោះ ការគម្រាមណាដែលសណ្ឋិតនៅពីមុខខ្លួន មានពីខាងពួកអ៊ីស្លាមជ្រុលនិយម នៅអាហ្វហ្កានីស្ថានជាដើម។ ប្រមុខរដ្ឋទាំងពីរបានថ្លែងថាកិច្ចចរចា មានលក្ខណៈស៊ីជម្រៅជាសាច់ការណ៍ ហើយជុំវិញបញ្ហាភាគច្រើនដាច់ខាត នៃស្ថានការណ៍ក្នុងលោក ទស្សនៈយល់ឃើញរបស់គូភាគី ឬមួយត្រូវគ្នាបេះបិទ ឬមួយស្រដៀងគ្នា។ ត្រូវតែពង្រីកនិងពង្រឹងភាពជាដៃគូនេះ ជាពិសេសក្នុងគ្រាឥឡូវ កាលដែលភាពតានតឹង កើតមាន នៅតាម ច្រកល្ហកប្លែកៗនៃផែនដី ដែលតម្រូវឲ្យប្រទេសទាំងពីរផ្តល់ចម្លើយរួម។
តាមសម្តីលោកប្រធានាធិបតី អ៊ូសបេគីស្ថាន ៖ គឺជាការឥតប្រយោជន៍ឡើយ បើធ្វើថ្លង់ធ្វើខ្វាក់ មិនឃើញ ភាពរួមធ្លុងមួយនៃប្រទេសទាំងពីរដែលឈរលើទំនាក់ទំនងប្រកបដោយការជឿទុកចិត្តគ្នាផ្ទាល់ នៃមេដឹកនាំរដ្ឋទាំងពីរ ដែលចាក់ឫសជាប់យូរឆ្នាំមកហើយ។
លោកពូទីនពីចំណែកខ្លួន ថ្លែងថា ទំនាក់ទំនងនយោបាយរវាងប្រទេសទាំងពីរ បន្តរីកផុសផុល នៅតាមគ្រប់ជាន់ថ្នាក់ ទាំងថ្នាក់រដ្ឋសភា ទាំងថ្នាក់រដ្ឋាភិបាល ទាំងថ្នាក់ប្រមុខរដ្ឋ តែម្តង។ ខាងផ្នែកពាណិជ្ជកម្ម លោកពូទីនបានឲ្យដឹងថា រុស្ស៊ីជាដៃគូជំនួញទី១របស់ អ៊ូសបេគីស្ថាន ដោយក្នុងឆ្នាំមុនទំហំផ្តោះប្តូរពាណិជ្ជកម្ម បានមានទឹកប្រាក់ ៥.០០០លានដុល្លារទៅហើយ ហើយទំហំនេះ នឹងបន្តកើនឡើង ដោយអ៊ូសបេគីស្ថាន ទទួលបានភ្លើងខៀវ សម្រាប់ពង្រីកការនាំចេញមកកាន់រុស្ស៊ី នូវកសិផល ជំនួសកន្លែងបណ្តាប្រទេសសហភាពអឺរ៉ុប និង ស.រ.អា. ដែលត្រូវម៉ូស្គូហាមមិនឲ្យនាំគ្រឿងបរិភោគចូលរុស្ស៊ីឡើយ ជាចម្លើយតបនឹងទណ្ឌកម្មរបស់ពួកគេទល់នឹងរុស្ស៊ី។ លោកពូទីន ក៏បានប្រកាសថា រុស្ស៊ីសម្រេចលុបអស់ ៨៦៥លានដុល្លារ បំណុលដែលអ៊ូសបេគីស្ថានជំពាក់រុស្ស៊ី តាំងពីជំនាន់សហភាពសូវៀតមក គឹនៅសល់តែ ២៥លានដុល្លារប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ