វិបត្តិជនភៀសខ្លួននៅអឺរ៉ុបកំពុងស្តែងចេញឃើញវិបត្តិ Schengen…
ចុះផ្សាយនៅថ្ងៃ៖
ស្តាប់ - ០៤:៤០
វិបត្តិជនភៀសខ្លួន នៅអឺរ៉ុបប្រៀបបាននឹងដំបូលផ្ទះលិចទឹក។ បិទខ្ទប់កន្លែង លិចហូរចូលកន្លែងមួយទៀត។ ករណីជនភៀសខ្លួន ហូរចូលក្នុងទឹកដី អឺរ៉ុប ក៏ដូចគ្នាដូច្នេះដែរ។ បន្ទាប់ពីរដ្ឋាភិបាលហុងគ្រីបិទទាំងស្រុង ព្រំដែន តាមរយៈការសាងសង់របងលួសបន្លា និងជញ្ជាំងខ្ពស់ ជនភៀសខ្លួន មានប្រភពមកពីតំបន់ដើមបូព៌ា បែរមុខព្រួញ សំដៅទឹកដីក្រូអាស៊ីវិញម្តង។ ក្រូអាស៊ីដែលជាសមាជិកសហភាពអឺរ៉ុប ប៉ុន្តែ មិនស្ថិតនៅក្នុងតំបន់ Schengen បានប្រកាសរួចហើយថា នឹងជួយសម្រួល ការធ្វើដំណើរឆ្លងកាត់របស់ជនភៀសខ្លួនទាំងនោះ ដែលមានទិសដៅតែមួយ គឺចង់ទៅរស់នៅប្រទេសអឺរ៉ុបខាងជើង ដែលនៅក្នុងនោះ មានស៊ុយអែត និងអាល្លឺម៉ង់ជាដើម។ អាល្លឺម៉ង់វិញ ដែលបានប្រកាសត្រៀមទទួលជនភៀសខ្លួន ប្រមាណ ៨សែននាក់ នៅឆ្នាំនេះ ទើបតែប្រកាស កាលពីថ្ងៃចន្ទ ការដាក់ឲ្យត្រួតពិនិត្យឡើងវិញ លើរាល់ដំណើរចេញចូល តាមព្រំដែន បារាំង និងអាល្លឺម៉ង់។ ការសាងសង់ ជញ្ជាំងព្រំដែន និង ការត្រួតពិនិត្យព្រំដែន រវាងប្រទេសអឺរ៉ុប កំពុងគំរាមកំហែង វត្តមានកិច្ចព្រមព្រៀង Schengen ដែលធ្លាប់ជាមោទនភាពសម្រេចបានរបស់អឺរ៉ុប។ តើ កិច្ចព្រមព្រៀងSchengen ជាអ្វី?
Schengen ជាកិច្ចព្រមព្រៀងដែលនិយាយពីការលុបចោលការត្រួតពិនិត្យ នៅតាមព្រំដែន។។ កិច្ចព្រមព្រៀងនេះត្រូវបានចុះហត្ថលេខា ដំបូងនៅឆ្នាំ ១៩៨៥ ដោយ ប្រទេសបី គឺប៊ែលហ្សិក ហូឡង់ និងលុចសំបួរ ដែលធ្លាប់សម្រួល រួចហើយ ការធ្វើដំណើរដោយសេរីរវាងគ្នា។ នៅឆ្នាំ នោះ អាល្លឺម៉ង់ខាងលិច និងបារាំងបានចូលរួម ក្នុងកិច្ចព្រមព្រៀង Schengen ដែលកសាងឡើង ដើម្បី សម្រួលចរាចរណ៍ទំនិញ និងការធ្វើដំណើររបស់មនុស្ស របស់ប្រទេសហត្ថលេខី។ ជាមួយគ្នានោះ ប្រទេសចុះហត្ថលេខី ត្រូវយល់ព្រម ពង្រឹងការត្រួតពិនិត្យនៅតាមព្រំដែនជាមួយប្រទេសដែលមិនបានចុះហត្ថលេខាលើកិច្ចព្រមព្រៀង Schengen។
កិច្ចព្រមព្រៀង Schengen បានចូលជាធរមាន ជាផ្លូវការ នៅឆ្នាំ ១៩៩៥ គឺដំណាលគ្នានឹងការបង្កើតប្រាក់អឺរ៉ូ។ លើកលែងតែអង់គ្លេស និងអៀរឡង់ មានប្រទេសចំនួន ២៦ បានចូលជាសមាជិករបស់លំហរ Schengen (២២ប្រទេសជាសមាជិកសហភាពអឺរ៉ុប (ន័រវេស អ៊ីស្លង់ ស្វីស និងលិចតិនស្តាញ)។ អាចនិយាយម្យ៉ាងថា អ្នកណាម្នាក់ដែលបានទទួលទិដ្ឋាការ ឲ្យចូលទៅក្នុងប្រទេសសមាជិក របស់កិច្ចព្រមព្រៀង Schengen នឹងអាចធ្វើដំណើរដោយសេរី ដោយមិនចាំបាច់លិខិតឆ្លងដែន ឬរងការត្រួតពិនិត្យ នៅព្រំដែន ទៅកាន់ប្រទេសច្រើនទៀត ដែលស្ថិតនៅក្នុងលំហរ Schengen ដែលនៅក្នុងនោះ មាន២៦ប្រទេស។
កិច្ចព្រមព្រៀង Schengen គឺជាសរសរទ្រូងដ៏រឹងមាំ និងជាមោទនភាពដ៏ខ្លាំងបំផុតរបស់អឺរ៉ុប។ កិច្ចព្រមព្រៀង បានផ្លាស់ប្តូរជីវិតរស់នៅប្រចាំថ្ងៃរបស់ប្រជាជនរបស់ប្រទេសសមាជិក Schengen ជាពិសេស គឺអ្នករស់នៅតាមព្រំដែនដែលតែងតែចេញចូលទៅធ្វើការនៅក្នុងប្រទេសជិតខាងរបស់ខ្លួន។ ឧទាហរណ៍ជាក់ស្តែងមួយ គឺគ្រាន់តែមួយព្រឹកថ្ងៃពុធ មានជនជាតិបារាំង ៣សែននាក់ បានឆ្លងព្រំដែន ទៅធ្វើការ ក្នុងប្រទេស ក្នុងលំហរ Schengen ដោយមិនចាំបាច់ ប្រើលិខិតឆ្លងដែន ឬត្រូវតម្រង់ជួរ នៅប៉ុស្តច្រកត្រួតពិនិត្យព្រំដែន។
កិច្ចព្រមព្រៀង Schengenផ្តល់អត្ថប្រយោជន៍ច្រើនសម្រាប់សេដ្ឋកិច្ចអឺរ៉ុប។ ប៉ុន្តែ ប្រព័ន្ធ Schengenតែងតែចុះខ្សោយ នៅក្នុងពេលអឺរ៉ុបជួបវិបត្តិ។ ឧទាហរណ៍ ការខ្លាច អំពើភេរវកម្មដែលបានផ្ទុះឡើង នៅក្នុងបណ្តាប្រទេសមួយចំនួនរបស់អឺរ៉ុប ហើយនិងវិបត្តិហូរចូលជនអន្តោប្រវេសន៍ និងជនភៀសខ្លួន ទៅក្នុងទឹកដីអឺរ៉ុប។ ប្រឈមនឹងលំហូរចូលជនភៀសខ្លួន ដូចទឹកបាក់ទំនប់ អាល្លឺម៉ង់ប្រកាសកាលពីថ្ងៃចន្ទ វិធានការត្រួតពិនិត្យ នៅតាមព្រំដែន ជាមួយបារាំង។ ដោយដាក់ឲ្យមានការត្រួតពិនិត្យឡើងវិញ នៅតាមព្រំដែន ជាមួយ ប្រទេសដែលចុះហត្ថលេខី Schengen ដូចជាបារាំង អាល្លឺម៉ង់ កំពុងដើរផ្ទុយនឹងគោលការណ៍របស់ Schengen។ ប៉ុន្តែ ក្នុងការពិតជាក់ស្តែង អាល្លឺម៉ង់ មានសិទ្ធិស្របច្បាប់ដើម្បីធ្វើវា ព្រោះថា ចំណុចមួយ នៅក្នុងកិច្ចព្រមព្រៀង បានបើកផ្លូវអនុញ្ញាតឲ្យប្រទេសសមាជិកបង្កើតឡើងវិញ ការត្រួតពិនិត្យ នៅតាមព្រំដែន នៅក្នុងរយៈពេលកំណត់មួយ និងក្នុងហេតុផល សណ្តាប់ធ្នាប់ផ្ទៃក្នុង និងសន្តិសុខជាតិ។ ដោយដាក់ឲ្យដំណើរការឡើងវិញ ការត្រួតពិនិត្យ នៅតាមព្រំដែន រដ្ឋាភិបាលអាល្លឺម៉ង់ អាចទទួលផលប្រយោជន៍ពីរ គឺទីមួយ ទប់ កុំឲ្យជនភៀសខ្លួន ហូរដោយគំហុក ចូលអាល្លឺម៉ង់ (ក្នុងរយៈពេលមួយខែ ជនភៀសខ្លួន ៦ម៉ឺននាក់ ធ្វើដំណើរចូលប្រទេសអាល្លឺម៉ង់) និងទី២ អាល្លឺម៉ង់ ចង់ ប្រើវាជាសារព្រមានដល់ប្រទេសសមាជិកអឺរ៉ុបដទៃទៀត ដែលជាសមាជិករបស់ Schengen ប៉ុន្តែ មិនព្រមទទួលចែករំលែក យកជនភៀសខ្លួន។
ចំណាត់ការរបស់អាល្លឺម៉ង់បានជះឥទ្ធិពលភ្លាមៗទៅលើប្រទេសអឺរ៉ុបផ្សេងទៀត គឺមិនខុសពីល្បែងដូមីណូនោះទេ។ នៅអឺរ៉ុប អាល្លឺម៉ង់ជាប្រទេសគំរូគ្រប់វិស័យ។ នៅពេលអាល្លឺម៉ង់ប្រកាសទទួលយកជនភៀសខ្លួន ដល់៨សែននាក់ ប្រទេសនៅអឺរ៉ុបមួយចំនួនក៏សាមគ្គី ចង់ទទួលយកជនភៀសខ្លួន។ ប៉ុន្តែ នៅពេលអាល្លឺម៉ង់ ពង្រឹងការត្រួតពិនិត្យនៅព្រំដែន ប្រទេសផ្សេងទៀត ក៏ចង់ធ្វើតាម។ ជាក់ស្តែង បន្ទាប់ពី ការប្រកាសរបស់អាល្លឺម៉ង់ អូទ្រីស ដែលនៅជាប់ព្រំដែនអាល្លឺម៉ង់ ហើយនិងប្រទេស ស្លូវ៉ាគី ក៏បានបង្កើនការត្រួតពិនិត្យអត្តសញ្ញាណរបស់អ្នកដំណើរ នៅតាមព្រំដែន។ គណៈកម្មការអឺរ៉ុបបានបញ្ជាក់ថា អូទ្រីសបានជូនដំណឹងថា គេចាប់ផ្តើមតាំងពីថ្ងៃអង្គារ ការត្រួតពិនិត្យនៅតាមព្រំដែនអូទ្រីស ដែលជាប់ជាមួយប្រទេសហុងគ្រី អ៊ីតាលី ស្លូវ៉ាគី និងស្លូវ៉ានី។
ប៉ូឡូញ និងហូឡង់ក៏កំពុងពិចារណាចង់ចាត់វិធានការត្រួតពិនិត្យដូចគ្នាដែរ។ ហុងគ្រី វិញ ដែលជាហត្ថលេខីរបស់លំហរ Schengen បានរងការរិះគន់រួចទៅហើយ ដោយសារតែបានសាងសង់របង ជញ្ជាំង នៅព្រំដែនជាមួយប្រទេសស៊ែរប៊ី និងមានគម្រោងចង់សាងសង់លួសបន្លានៅព្រំដែនជាមួយប្រទេសរូម៉ានីមួយទៀត។ ដើម្បីទប់ស្កាត់ បំបាក់ទឹកចិត្តជនភៀសខ្លួនកុំឲ្យធ្វើដំណើរចូលហុងគ្រី រដ្ឋាភិបាលអភិរក្សនិយម ហុងគ្រីនៅបានប្រកាសថា នៅថ្ងៃអង្គារ គេបានចាប់ឃុំមនុស្សជាង ៣០០នាក់ដែលបានកាត់លួសបន្លា ឆ្លងព្រំដែនដោយខុសច្បាប់ ចូលក្នុងទឹកដីហុងគ្រី។ យោងទៅតាមច្បាប់ថ្មី ស្តី ពីជនអន្តោប្រវេសន៍ ពួកគេទាំងនោះ នឹងប្រឈមនឹងការជាប់ទោស ពី៣ ទៅ៥ឆ្នាំ។ គេបារម្ភថា វិធានការរបស់រដ្ឋាភិបាលរបស់ប្រទេសសមាជិកអឺរ៉ុប ដើម្បីដោះស្រាយវិបត្តិជនភៀសខ្លួន មិនត្រឹមតែគំរាមកំហែង អនាគតប្រព័ន្ធ Schengen របស់អឺរ៉ុបតែប៉ុណ្ណោះទេ ប៉ុន្តែ វាស្តែងចេញឲ្យឃើញផងដែរ នយោបាយអាត្មានិយម ដែលតាមពិត មិនមែនជាស្មារតីដើមរបស់អឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ