ក្រុងមុយនិចរបស់អាល្លឺម៉ង់ លិចជន់ ដោយលំហូរជនភៀសខ្លួន
ទីក្រុងមុយនិច ជិតអស់កន្លែង សម្រាប់ទទួលជនភៀសខ្លួន។ រដ្ឋអំណាចរបស់ទីក្រុងមុយនិច ដែលស្ថិតនៅភាគខាងត្បូតរបស់អាល្លឺម៉ង់ បានប្រកាសអាសន្ន ស្រែកអំពាវនាវរកជំនួយ នៅថ្ងៃអាទិត្យ ទី ១៣កញ្ញា បន្ទាប់ពីគ្រាន់តែមួយថ្ងៃសៅរ៍ម្សិលមិញ មានជនភៀសខ្លួនជាង ១២ ០០០នាក់ បានធ្វើដំណើរសម្រុកចូលទៅក្នុងទីក្រុង។ អាជ្ញាធរមូលដ្ឋាន បាននិយាយប្រាប់ទីភ្នាក់ងារព័ត៌មានបារាំង AFPថា ទីក្រុងមុយនិច ហើយនិងបាវីយ៉ែរ តែមួយ គឺមិនអាចទទួលយកជនភៀសខ្លួនតែម្នាក់ឯងបានទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
ប្រឈមទៅនឹងការហូរចូល ដោយគំហុក ជនភៀសខ្លួន រាប់ពាន់នាក់ កាលពីថ្ងៃសៅរ៍ ទីក្រុងមុយនិច ដែលស្ថិតនៅ ភាគខាងត្បូងអាល្លឺម៉ង់ ចាប់ផ្តើមស្រែករកជំនួយ។ នៅថ្ងៃអាទិត្យនេះ អ្នកនាំពាក្យរបស់ប៉ូលិសមុយនិច និយាយថា គេនៅខ្វះកន្លែង ពី១ពាន់ ទៅ ៥ពាន់ កន្លែង សម្រាប់ទទួលជនភៀសខ្លួន។ តាមប៉ូលិស នៅថ្ងៃសៅរ៍ អ្នកស្វែងរកសិទ្ធិជ្រកកោន ជាង១ម៉ឺននាក់បានធ្វើដំណើរចូលក្រុងមុយនិច។ បើមើលទៅលើចំនួនជនភៀសខ្លួន ហូរចូល ក្រុងមុយនិច គឺជិត អស់សមត្ថភាព ដើម្បីអាចទទួលជនភៀសខ្លួន តទៅទៀតហើយ។ អាជ្ញាធរអាល្លឺម៉ង់បានលើកឡើងពីលទ្ធភាព ដាក់ជនភៀសខ្លួន ឲ្យស្នាក់នៅខាងក្រៅអគារ ដោយគ្រាន់តែផ្តល់ភួយការពារត្រជាក់តែប៉ុណ្ណោះ។
កាសែតអាល្លឺម៉ង់ នៅថ្ងៃនេះ បានចុះផ្សាយនៅក្នុងវិបសៃតិ៍របស់ខ្លួនថា មុយនិច នៅពេលនេះ ជិតធ្លាក់ចូលទៅក្នុងគ្រោះមហន្តរាយមនុស្សធម៌។ ចៅហ្វាយក្រុងមុយនិច វិញបានតវ៉ាពីការខ្វះការគាំទ្រ ឈឺឆ្អាលពីតំបន់ជុំវិញក្រុងមុយនិច។ នៅចំពោះមុខវិបត្តិ ខ្វះជំរកសម្រាប់ជនភៀសខ្លួន អាជ្ញាធរអាល្លឺម៉ង់ បានប្រែក្លាយបន្ទាយទាហាន កុងតឺណែរ និងសំពត់តង់ សម្រាប់ទទួលជនភៀសខ្លួន។ ដោយសារតែខ្វះកន្លែង អាជ្ញាធរក្រុងមុយនិច គ្រោងផងដែរ ថា នឹងយកទីតាំងស្តាត ដែលទទួលរៀបចំការប្រកួតកីឡាអូឡាំពិកឆ្នាំ ១៩៧២ មកធ្វើជាកន្លែងទទួលបណ្តោះអាសន្ន ជនភៀសខ្លួន។
ស្ថិតនៅមាត់ច្រកចូលអាល្លឺម៉ង់ មុយនិច ត្រូវទទួលជនភៀសខ្លួន ស៊ីរី និងអ៊ីរ៉ាក់ ដែលបានធ្វើដំណើរឆ្លងកាត់ប្រទេសហុងគ្រី និងអូទ្រីស។ ទោះបីជាចំនួនជនភៀសខ្លួនហូរចូល មិនសូវច្រើន នៅថ្ងៃអាទិត្យនេះ អាជ្ញាធរអាល្លឺម៉ង់បញ្ជាក់ថា គេទំនងអាចបង្វែររទេះភ្លើងដឹកជនភៀសខ្លួន ទៅភាគខាងជើង អាល្លឺម៉ង់ វិញម្តង ដោយមិនចាំបាច់ឆ្លងកាត់ក្រុងមុយនិច។ ធ្វើដូច្នេះ ដើម្បី បន្ធូរ សម្រាលបន្ទុក ក្រុងមុយនិច និងរក្សាកន្លែងខ្លះ សម្រាប់ទទួលជនភៀសខ្លួនក្រោយៗទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ