អាល្លឺម៉ង់ចាប់បិទព្រំដែនជាបណ្តោះអាសន្ន ដើម្បីបង្ខំអឺរ៉ុបឲ្យរកដំណោះសា្រយរួម
បន្ទាប់ពីបានបើកទ្វារព្រំដែន ស្វាគមន៍ជនភៀសខ្លួន រាប់ម៉ឺននាក់ កាលពីសប្តាហ៍កន្លងទៅ រដ្ឋាភិបាលអាល្លឺម៉ង់ ទើបបានសម្រេច កាលពីថ្ងៃអាទិត្យទី ១៣ កញ្ញា ឲ្យបិទព្រំដែនបណ្តោះអាសន្ន រវាងអាល្លឺម៉ង់ និងអូទ្រីស ដើម្បីធ្វើការត្រួតពិនិត្យ ឲ្យបានតឹងរឹង ទៅលើការហូរចូលនៃជនភៀសខ្លួន។ តាមរយៈវិធានការថ្មីនេះ អាល្លឺម៉ង់ ចង់បន្ទោសប្រទេសសមាជិកអឺរ៉ុបផ្សេងទៀត ដែលជាព្រំដែនខាងក្រៅនៃសហភាពអឺរ៉ុប ឲ្យធ្វើកិច្ចការចុះបញ្ជីរ ក៏ដូចជាត្រួតពិនិត្យជនភៀសខ្លួន ឲ្យបានត្រឹមត្រូវ មុននឹងអនុញ្ញាតឲ្យ ជនទាំងនោះ បន្តដំណើរទៅកាន់ប្រទេសផ្សេងទៀត។ វិធានការនេះ ក៏ជាការរន្ធាន់ផងដែរ ដល់សហភាពអឺរ៉ុប ឲ្យប្រញាប់ស្វែងរកចម្លើយរួម ពីសមាជិកទាំអស់។
ចុះផ្សាយនៅថ្ងៃ៖ កែប្រែថ្ងៃទី៖
វាជាការគួរឲ្យភ្ញាក់ផ្អើលណាស់ ដែលកាលពីសប្តាហ៍មុន អាល្លឺម៉ង់ បានប្រកាសស្វាគមន៍ បើកទ្វារទទួល ជនភៀសខ្លួន ប៉ុន្តែស្រាប់តែថ្ងៃអាទិត្យម្សិលមិញ អាល្លឺម៉ង់ បែរជាប្រកាសបិទទ្វារព្រំដែនបណ្តោះអាសន្ន ដើម្បីទប់លំហូរជនភៀសខ្លួន។ ការសម្រេចចិត្តថ្មីរបស់អាល្លឺម៉ង់ ដោយបិទព្រំដែនបណ្តោះអាសន្ននេះ គឺមានហេតុផលពីរ ដែលទីមួយជាហេតុផល ដែលស្តែងចេញ ពីការលំបាកជាក់ស្តែង ហើយទីពីរ ជាហេតុផលនយោបាយ ដែលអាល្លឺម៉ង់ ចង់ពញ្ញាក់ស្មារតីប្រទេសសមាជិកសហភាពអឺរ៉ុបផ្សេងទៀត ឲ្យចូលរួមដោះស្រាយបញ្ហានេះទាំងអស់គ្នា ព្រោះអាល្លឺម៉ង់ ម្នាក់ឯង មិនអាចរ៉ាប់រងឈ្នះទេ។ ពោលគឺហេតុផលទាំងពីរ វាជាប់ទាំងទងគ្នាទៅវិញទៅមក។
អាល្លឺម៉ង់ អស់លទ្ធភាព ទទួលជនភៀសខ្លួន៖
ហេតុផលទីមួយ ដែលទាក់ទងនឹងការលំបាកជាក់ស្តែង ក្នុងការទទួលជនភៀសខ្លួន គឺមានន័យថា រដ្ឋាភិបាលអាល្លឺម៉ង់ កំពុងតែប្រឈមមុខនឹងការលំបាកខ្លាំង ដោយសារតែជនជនភៀសខ្លួន មានច្រើនពេក ហើយបន្ត នាំគ្នាមកដល់ទៀតឥតឈប់។ យើងត្រូវយល់ថា ជនភៀសខ្លួន ដែលមកដល់អាល្លឺម៉ង់ហើយ គឺលែងទៅណាទៀតហើយ គឺពួកគេចង់រស់នៅអាល្លឺម៉ង់ ដែលវាខុសពីប្រទេសដ៏ទៃ ដូចជាអ៊ីតាលី ក្រិក ហុងគ្រី ជាដើម ដែលគ្រាន់តែជាប្រទេសឆ្លងកាត់។ ដូច្នេះ បន្ទុករបស់រដ្ឋាភិបាលអាល្លឺម៉ង់ គឺធ្ងន់ធ្ងរណាស់ ក្នុងការរកកន្លែងស្នាក់នៅ និងជួយទំនុកបំរុង ជាលុយកាក់ ដល់ជនភៀសខ្លួន ទំរាំដល់ពួកគេមានការងារធ្វើ។
ឧទាហរណ៍ គ្រាន់តែក្រុង ម៉ុយនីឆ មួយ រាប់ពីដើមខែកញ្ញានេះមក មានជនភៀសខ្លួនចំនួន ៦៣០០០ ដែលបានមកដល់។ មួយបព្រិចភ្នែក ត្រូវទទួលខុសត្រូវមនុស្ស ជាង៦ម៉ឺននាក់ មិនមែនជារឿងងាយទេ ហើយអាជ្ញាធរទីក្រុងនេះ កំពុងតែបារម្ភ មិនដឹងថាអាចទ្រាំទ្របាន ដល់ពេលណាទេ។ អ្វីដែលចោទខ្លាំងទៀតនោះ គឺជនភៀសខ្លួនបន្តមកថែមទៀត។ ដូច្នេះហើយ បានជាពេលនេះ អាល្លឺម៉ង់ សម្រេចបិទ ព្រំដែនមួយរយៈ ប៉ុន្តែបិទនៅតែព្រំដែនរវាង អាល្លឺម៉ង់ និង អូទ្រីសទេ។ បើយោងតាមប្រសាសន៍ លោករដ្ឋមន្រ្តីមហាផ្ទៃអាល្លឺម៉ង់ ការបិទព្រំដែនបណ្តោះអាសន្ននេះ អាចនឹងអនុញ្ញាត ឲ្យអាជ្ញាធរ មានពេលដកដង្ហើម ហើយចាត់ចែងទទួលជនភៀសខ្លួន ដែលបានមកដល់ ឲ្យបានត្រឹមត្រូវសិន មុននឹងបន្តទទួលអ្នកមកថ្មីទៀត។
ជនអន្តោប្រវេសន៍ លាយឡំជាមួយជនភៀសខ្លួនដោយសង្រ្គាម៖
មួយវិញទៀត អាល្លម៉ង់ បានត្អូញថា ក្នុងចំណោមជនភៀសខ្លួនដែលបានមកដល់អាល្លឺម៉ង់ ថ្មីៗនេះទាំងប៉ុន្មាន គឺមិនមែនសុទ្ធតែជាជនភៀសខ្លួនរត់គេច ពីសង្រ្គាមទាំងអស់នោះទេ។ ត្រង់ចំណុចនេះ អាល្លឺម៉ង់ ចង់បន្ទោសដោយប្រយោល ទៅដល់ប្រទេសសមាជិកអឺរ៉ុប ដែលមានព្រំដែននៅជាយខាងក្រៅអឺរ៉ុប មានដូចជាអ៊ីតាលី ក្រិក ហុងគ្រីជាដើម ថាគ្មានការទទួលខុសត្រូវ មិនបានត្រួតពិនិត្យជនភៀសខ្លួន ឲ្យបានត្រឹមត្រូវ មុននឹងអនុញ្ញាតឲ្យបន្តដំណើរទៅមុខ។
បើយើងនិយាយពីការអនុវត្តច្បាប់ យើងឃើញថាចរចរណ៍ជនអន្តោប្រវេសន៍ នៅអឺរ៉ុប គឺគ្រប់គ្រងដោយ សន្ធិសញ្ញាពីរ ទីមួយគឺសន្ធិសញ្ញា ចរាចរណ៍ដោយសេរីក្នុងតំបន់ឆិនហ្គិន Schengen ប៉ុន្តែត្រូវតែមានលិខិតស្នាមស្របច្បាប់ ចេញដោយប្រទេសសមាជិកណាមួយសិន។ ហើយសន្ធិសញ្ញាទីពីរ គឺសន្ធិសញ្ញាក្រុងឌុបប្លាំង ដែលទាមទារឲ្យប្រទេសទីមួយ ដែលជនភៀសខ្លួនបានមកដល់ ត្រូវជាអ្នកចេញលិខិតស្នាម ទទួលស្គាល់ជននេះជាជនភៀសខ្លួន។ សរុបមកមានន័យថា ប្រទេសដែលនៅជាយព្រំដែនអឺរ៉ុប ទាំងអម្បាលម៉ាណ មានកាតព្វកិច្ច ត្រួតពិនិត្យ និងចេញក្រដាសស្នាមទទួលស្គាល់ជនភៀសខ្លួន មិនមែនបណ្តោយឲ្យមក ទាំងដុំលាយឡំគ្នានោះទេ។
អាល្លឺម៉ង់ ទាមទារដំណោះស្រាយរួម ពីអឺរ៉ុប៖
ហេតុផលទីពីរនេះ គឺនៅពីក្រោយការលំបាក ព្រមទាំងភាពអសកម្មរបស់ប្រទសសមាជិកផ្សេងទៀត ទាំងប៉ុន្មាន គឺអាល្លឺម៉ង់ ចង់ប្រាប់ថា គេសម្រេចបិទព្រំដែន ព្រោះគេអស់លទ្ធភាពហើយ អញ្ចឹងសូមគ្រប់គ្នា មេត្តាជួយសាមគ្គី ជួយរកដំណោះស្រាយទាំងអស់គ្នា មិនមែនឱបដៃមើលទេ។ កាលពីមុន យើងអាចយល់បានថា អាល្លឺម៉ង់ បើកព្រំដែនទទួលជនភៀសខ្លួន គឺដើម្បីធ្វើជាគំរូមួយ ដល់ប្រទេសដ៏ទៃ ប៉ុន្តែសរុប មកនៅតែមិនមានផល។ អញ្ចឹងពេលនេះ អាល្លឺម៉ង់ សម្រេចបិទទៅវិញ ដើម្បីជាការកំញើញ ឲ្យសហភាពអឺរ៉ុប រកដំណោះស្រាយរួមគ្នា។
ការប្រកាសបិទព្រំដែន បណ្តោះអាសន្ននេះ មិនមែនជាការចៃដន្យទេ គឺធ្វើឡើងនៅមុនពេលចាប់ផ្តើមប្រជុំ ថា្នក់រដ្ឋមន្ត្រីមហាផ្ទៃ នៃសមាជិកសហភាពអឺរ៉ុប ស្តីពីបញ្ហាជនភៀសខ្លួន នៅថ្ងៃចន្ទនេះតែម្តង។ អាល្លឺម៉ង់ ទាមទារឲ្យមានដំណោះស្រាយរួម ពោលគឺជាដំណោះស្រាយ ដែលអាល្លឺម៉ង់ និងសហភាពអឺរ៉ុបធ្លាប់ បានស្នើច្រើនដងមកហើយ ប៉ុន្តែគ្មាននរណាយល់ព្រម នោះគឺការកំណត់កូតា ទទួលយកជនភៀសខ្លួន ទៅតាមគ្រប់ប្រទេសសមាជិកនេះឯង។
ទាំងប្រធានាធិបតីបារាំង ទាំងរដ្ឋមន្រ្តីមហាផ្ទៃបារាំង បានប្រកាសថា គោលជំហរបារាំង គឺដូចទៅហ្នឹងគោលជំហររបស់អាល្លឺម៉ង់ ពោលគឺទាមទារឲ្យមានការបែកចែក ជនភៀសខ្លួន ទៅតាមគ្រប់ប្រទេសសមាជិក។ ក្រៅពីការបែងចែក កូតាគ្នានេះ បារាំង និងអាល្លឺម៉ង់ បានទាមទារ ឲ្យមានចំណាត់ការបន្ទាន់ ក្នុងការសហការគ្នា ដើម្បីបង្កើត ជាការិយាល័យ ចុះឈ្មោះជនភៀសខ្លួន នៅតាមបណ្តាប្រទេសព្រំដែនខាងក្រៅអឺរ៉ុប ដែលជនភៀសខ្លួន បានមកដល់មុនគេ។ ការបង្កើតការិយាល័យចុះឈ្មោះទាំងនេះ នឹងអនុញ្ញាត ឲ្យគេស្រង់ចំនួនជនភៀសខ្លួនពិតប្រាកដ ដែលរត់គេចពីសង្រ្គាម ហើយជនអន្តោប្រវេសន៍ផ្សេងទៀត ដែលបន្លំចូលមក នឹងត្រូវបញ្ជូនត្រឡប់ទៅស្រុកវិញ។
សំណើរបែងចែកកូតា ធ្វើឲ្យអឺរ៉ុបបែកបាក់សាមគ្គី៖
និយាយពីការបែងចែកកូតានេះ គឺសហភាពអឺរ៉ុប ទាមទារ ឲ្យធ្វើឡើង ទៅលើជនភៀសខ្លួនចំនួន ១៦ម៉ឺននាក់ ប៉ុន្តែមិនមែនចែកគ្នាស្មើទេ គឺបែងចែក ឲ្យសមមាត្រ ទៅតាមចំនួនប្រជាជនក្នុងស្រុក នៃប្រទេសនីមួយៗ ព្រមទាំងសមត្ថភាពសេដ្ឋកិច្ច ហើយនឹងចំនួនជនភៀសខ្លួនដែលមានស្រាប់ក្នុងប្រទេសនោះ។ ដូច្នេះតិចរឺច្រើន ប្រទេសសមាជិកទាំងអស់ ត្រូវតែទទួលជាដាច់ខាត។ លក្ខណៈចាប់បង្ខំនេះហើយ ដែលប្រទេសមួយចំនួន គេមិនព្រម។
ការប្រជុំថ្ងៃនេះ នៅមិនទាន់មានលទ្ធផលនៅឡើយទេ។ ប៉ុន្តែកន្លងមក មានប្រទេសមួយចំនួន ដែលបានបញ្ចេញពាក្យសម្តី រឹងទទឹង ប្រកែកមិនទទួលយក ការបែងចែកកូតានេះ យ៉ាងច្បាស់ៗតែម្តង។ ក្នុងនោះមានអង់គ្លេស អៀរឡង់ និងដាណឺម៉ាក។ កន្លងមកប្រទេសទាំងបីនេះ ឲ្យតែនិយាយពីបញ្ហាអន្តោប្រវេសន៍ ជនភៀសខ្លួនអីជាដើម គឺរឹងជាងគេ មិនព្រមធ្វើសម្បទានអ្វីទាំងអស់។ អង់គ្លេស បានប្រកាសព្រមទទួលយកជនភៀសខ្លួនស៊ីរី ២ម៉ឺននាក់មែន ប៉ុន្តែគេប្រកែក មិនព្រមទទួលយកគោលការណ៍កំណត់កូតា ដែលមានលក្ខណចាប់បង្ខំនេះទេ។
ក្រៅពីប្រទេសបីនេះ មានប្រទេសមួយចំនួនទៀត នៅអឺរ៉ុបកណ្តាល និងខាងកើត មានជាអាទិ៍ ហុងគ្រី រូម៉ានី ឆេក និង ស្លូវ៉ាគី ជាដើម ដែលប្រកែកញាញតែម្តង។ មានហេតុផលពីរដែលថ្នាក់ដឹកនាំក្រុមប្រទេសនៅអឺរ៉ុបខាងកើត និងអឺរ៉ុបកណ្តាល ប្រកែកបែបនេះ គឺដោយសារមតិសាធារណៈនៅតាមប្រទេសទាំងនោះ មានការរើសអើងខ្លាំងណាស់ ទៅលើជនភៀសខ្លួន ជាពិសេសគឺជនភៀសខ្លួនដែលកាន់សាសនាអ៊ីស្លាម។ គេមិនសូវខ្វល់ពីបញ្ហាមនុស្សធម៌ស្អីទេ។
មួយវិញទៀត ប្រទេសទាំងនេះ គេដឹងខ្លួនថា ប្រទេសគេមិនមែនជាគោលដៅរបស់ជនភៀសខ្លួនទេ។ ប្រទេសដែល ជនភៀសខ្លួននាំគ្នាចង់ទៅ គឺអាល្លឺម៉ង់ បារាំង ស៊ុយអ៊ែដ និងអង់គ្លេសជាដើម។ ដូច្នេះ មានរឿងអី គេមកល្ងង់ ទទួលយកកូតាបែងចែកនេះ។ ប៉ុន្តែហេតុផលនេះ វាអាត្មានិយមខ្លាំងណាស់ ព្រោះថាប្រឈមមុខនឹងស្ថានការណ៍អាសន្នបែបនេះ យើងមិនអាចយកតែរួចខ្លួន តែម្នាក់ឯងបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ