អ៊ីស្រាអែល-ប៉ាឡេស្ទីន៖បេសកកម្មការទូតរបស់អាមេរិកដើម្បីបញ្ចប់អំពើហិង្សា
ស្ថានការណ៍កំពុងបន្តតានតឹងខ្លំាងរវាងអ៊ីស្រាអែល និងប៉ាឡេស្ទីន។ នៅព្រឹកថ្ងៃព្រហស្បតិ៍ ទី២២ តុលានេះ មានប្រជាជនប៉ាឡេស្ទីនចំនួនពីរនាក់បានដកកំបិតចាក់ប្រជាជនអ៊ីស្រាអែលម្នាក់ឲ្យរបួសធ្ងន់។ ទន្ទឹមគ្នានេះ លោកនាយករដ្ឋមន្រ្តីអ៊ីស្រាអែលបិនយ៉ាមីន នេតាន់យ៉ាហ៊ូកំពុងស្ថិតក្នុងប្រទេសអាល្លឺម៉ង់។ នៅថ្ងៃនេះ លោកនេតាន់យ៉ាហ៊ូបានជួបសន្ទនាជាមួយលោកប្រមុខការទូតអាមេរិកចន ឃ៊ែរី។ បន្ទាប់មកនៅចុងសប្តាហ៍នេះ លោកឃ៊ែរីក៏នឹងគ្រោងជួបសន្ទនាជាមួយលោកប្រធានរដ្ឋអំណាចបាឡេស្ទីនម៉ាមូត អាបាស់នៅក្នុងទីក្រុងអាម៉ាន់ ប្រទេសហ៊្សកដានីដែរ។ ជំនួបទំាងអស់នេះបានធ្វើឡើង បន្ទាប់ពីមានការជម្រុញរបស់លោកអគ្គលេខាធិការអង្គការសហប្រជាជាតិបាន គីមូនឲ្យអ៊ីស្រាអែល និងប៉ាឡេស្ទីនបញ្ចប់អំពើហិង្សា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៤៩
នៅក្នុងជំនួបអស់រយៈពេលជាច្រើនម៉ោងរវាងលោកឃ៊ែរី និងលោកនេតាន់យ៉ាហ៊ូក្នុងថ្ងៃនេះ លោកប្រមុខការទូតអាមេរិកបានទាមទារជាថ្មីម្តងទៀតឲ្យបិទបញ្ចប់អំពើហិង្សារវាងអ៊ីស្រាអែល និងប៉ាឡេស្ទីនដែលបានផ្ទុះឡើងយ៉ាងខ្លំាងក្លាតំាងពី ៣សប្តាហ៍មកដល់សព្វថ្ងៃ។ ថ្លែងនៅចំពោះមុខលោកនេតាន់យ៉ាហ៊ូ លោកឃ៊ែរីបានបញ្ជាក់ច្បាស់ៗថា វាជារឿងចំាបាច់បំផុតដែលភាគីនីមួយៗត្រូវតែបិទបញ្ចប់ការញុះញង់ និងអំពើហិង្សាគ្រប់រូបភាព ព្រមទំាងព្យាយាមស្វែងរកផ្លូវកណ្តាលមួយដែលនឹងអនុញ្ញាតឲ្យមានកុងសង់ស៊ុសរួមមួយទទួលយកបានទំាងអស់គ្នា។
ជាការឆ្លើយតបវិញ លោកនេតាន់យ៉ាហ៊ូបែរជាបានបន្តទម្លាក់កំហុសដាក់ចលនាប៉ាឡេស្ទីនហាម៉ាស់ និងចោទលោកប្រធានរដ្ឋអំណាចប៉ាឡេស្ទីនម៉ាមូដ អាបាស់ថា ជាអ្នកអុជអាលឲ្យមានអំពើហិង្សារវាងអ៊ីស្រាអែល និងប៉ាឡេស្ទីនពេលនេះ។ គួររម្លឹកជូនថា តំាងពីថ្ងៃទី១ តុលាមកម្ល៉េះដែលអំពើហិង្សារវាងសត្រូវស៊ូពូជទំាងពីរបានផ្ទុះឡើងនៅក្នុងទីក្រុងហ្សេរុយសាឡិមខាងកើតដោយបានបណ្តាលឲ្យស្លាប់ប្រជាជនអ៊ីស្រាអែលចំនួន ៨នាក់ និងប្រជាជនប៉ាឡេស្ទីនចំនួន ៤៨នាក់។
តែលោកប្រមុខការទូតអាមេរិកចន ឃ៊ែរីដែលបានជួបលោកនេតាន់យាហ៊ូចុងក្រោយកាលពីដំណាច់ខែកញ្ញាក្នុងទីក្រុងញូយ៉កនៅតែមានជំនឿថា កិច្ចសន្ទនារវាងលោក និងលោកនេតាន់យ៉ាហ៊ូថ្ងៃនេះនឹងអាចជួយជម្រុញឲ្យមានការចម្រើនទៅមុខនៅក្នុងជម្លោះរវាងអ៊ីស្រាអែល និងប៉ាឡេស្ទីនពេលនេះ។ បន្ទាប់ពីជំនួបជាមួយលោកនាយករដ្ឋមន្រ្តីអ៊ីស្រាអែលបិនយ៉ាមីន នេតាន់យ៉ាហ៊ូ លោកប្រមុខការទូតអាមេរិកចន ឃ៊ែរីក៏នឹងទៅជួបលោកប្រធានរដ្ឋអំណាចប៉ាឡេស្ទីនម៉ាមូដ អាបាស់នាចុងសប្តាហ៍នេះនៅក្នុងទីក្រុងអាម៉ាន់ ប្រទេសហ្ស៊កដានី។ បើតាមមើលទៅ លោកឃ៊ែរីក៏នឹងធ្វើសំណើដូចគ្នាទៅកាន់លោកអាបាស់ដែរ ពោលបិទបញ្ចប់រាល់អំពើហិង្សាគ្រប់រូបភាព។
លោកចន ឃ៊ែរីបន្តព្យាយាមស្វែងរកសន្តិភាពឲ្យអ៊ីស្រាអែល និងប៉ាឡេស្ទីន
ប្រហែលជាគ្មានក្តីសង្ឃឹមអ្វីធំដុំដែលត្រូវរង់ចំានៅក្នុងជំនួបរវាងលោកនាយករដ្ឋមន្រ្តីអ៊ីស្រាអែលបិនយ៉ាមីន នេតាន់យ៉ាហ៊ូ និងលោកប្រមុខការទូតអាមេរិកចន ឃ៊ែរីក្នុងទីក្រុងប៊ែរឡាំង ប្រទេសអាល្លឺម៉ង់ថ្ងៃនេះ ក៏ដូចជាគម្រោងជំនួបរវាងលោកចន ឃ៊ែរីជាមួយលោកប្រធានរដ្ឋអំណាចប៉ាឡេស្ទីនម៉ាមូដ អាបាស់នៅក្នុងទីក្រុងអាម៉ាន់ ប្រទេសហ្ស៊កដានីនាចុងសប្តាហ៍នេះទេ។ តែយ៉ាងហោចណាស់ ក៏បេសកកម្មការទូតរបស់លោកចន ឃ៊ែរីពេលនេះជាសក្ខីកម្មមួយដែលស បញ្ជាក់ឲ្យឃើញថា អាមេរិកមិនបានបោះបង់ចោល និងនៅតែព្យាយាមផ្សះផ្សាសត្រូវស៊ូពូជទំាងពីរជានិច្ច ពិសេសស្វែងរកកិច្ចព្រមព្រៀងសន្តិភាពមួយឆ្ពោះទៅបង្កើតរដ្ឋប៉ាឡេស្ទីនមួយឯករាជ្យរស់ក្បែររដ្ឋអ៊ីស្រាអែល។
គួររម្លឹកជូនថា តំាងតែពីឡើងកាន់តំណែងជាប្រមុខការទូតអាមេរិកក្នុងថ្ងៃទី១ កុម្ភៈ ឆ្នំា ២០១៣ មក លោកឃែរីធ្លាប់បានប្តេជ្ញាចិត្តថា លោកត្រូវការពេលតែ ៩ខែទេ ពោលគិតត្រឹមថ្ងៃទី២៩ មេសា ឆ្នំា ២០១៤ ដើម្បីសម្រេចឲ្យបាននូវកិច្ចព្រមព្រៀងជាមូលដ្ឋានមួយរវាងអ៊ីស្រាអែល និងប៉ាឡេស្ទីន។ កិច្ចព្រមព្រៀងជាមូលដ្ឋាននោះនឹងកំណត់ពីខ្សែបន្ទាត់នយោបាយសំខាន់ៗសម្រាប់ធ្វើជាគ្រឹះក្នុងការអនុម័តចេញនូវអនាគតកិច្ចព្រមព្រៀងសន្តិភាពជាស្ថាពរ។ កាលណោះ លោកចន ឃ៊ែរីបានធ្វើដំណើរចេញ ចូលក្នុងតំបន់ដើមបូព៌ា ពីទឹកដីអ៊ីស្រាអែលឆ្លងចូលទឹកដីប៉ាឡេស្ទីន និងពីប៉ាឡេស្ទីនឆ្លងចូលអ៊ីស្រាអែលជាច្រើនដង។
ក្រៅពីជំនួបជាលក្ខណៈត្រីភាគីអាមេរិក អ៊ីស្រាអែល ប៉ាឡេស្ទីន លោកចន ឃែរីក៏បានរៀបចំជំនួបដាច់ដោយឡែកពីគ្នាដែរ។ តែមកទល់ថ្ងៃនេះ និងក្រៅពីគ្មានកិច្ចព្រមព្រៀង ស្ថានការណ៍បែរជាកាន់តែធ្លាក់ដុនដាបខ្លំាងឡើងៗទៅវិញ។ គេពិតជាពិបាកនឹងទម្លាក់កំហុសដាក់នរណាម្នាក់ណាស់ ព្រោះភាគីទំាងពីរនៅបន្តមិនទុកចិត្តគ្នា និងហាក់ដូចជាគ្មានឆន្ទៈនយោបាយសន្តិភាពដើម្បីរស់ក្បែរគ្នា។
លោកបាន គីមូនបារម្ភពីការផ្ទុះសង្រ្គាមមហន្តរាយពិបាកគ្រប់គ្រង
អំពើហិង្សាប្រចំាថ្ងៃរវាងអ៊ីស្រាអែល និងប៉ាឡេស្ទីនរាល់ថ្ងៃនេះនឹងអាចធ្វើឲ្យស្ថានការណ៍ធ្លាក់វឹកវរកាន់តែខ្លំាងពិបាកគ្រប់គ្រង។ អ្នកដែលបានសម្តែងក្តីបារម្ភខ្លំាងជាងគេនោះ គឺលោកអគ្គលេខាធិការអង្គការសហប្រជាជាតិបាន គីមូនដែលកំពុងបន្តដំណើរទស្សនកិច្ចមួយជុំតំបន់មជ្ឈិមបូព៌ា។ នៅក្នុងជំនួបជាមួយលោកប្រមុខរដ្ឋាភិបាលអ៊ីស្រាអែលបិនយ៉ាមីន នេតាន់យ៉ាហ៊ូ និងលោកប្រធានរដ្ឋអំណាចប៉ាឡេស្ទីនម៉ាមូដ អាបាស់កាលពីថ្ងៃពុធ ទី២១ តុលា លោកបាន គីមូនបានអំពាវនាវភាគីជម្លោះទំាងពីរឲ្យចាត់វិធានការជាបន្ទាន់ដើម្បីបញ្ចប់អំពើហិង្សាដែលប្រកបដោយគ្រោះថ្នាក់ខ្លំាង។
នៅថ្ងៃនេះ លោកបាន គីមូនបានបញ្ចប់ទស្សនកិច្ចមួយជុំតំបន់មជ្ឈិមបូព៌ានៅក្នុងប្រទេសហ្ស៊កដានី។ នៅក្នុងប្រទេសហ្ស៊កដានី លោកបាន គីមូនបានចូលជួបស្តេចហ្ស៊កដានីអាប់ដាឡា ២ ដែលជាដៃគូសន្ទនាមិនអាចខ្វះបាននៅក្នុងជម្លោះអ៊ីស្រាអែល ប៉ាឡេស្ទីន។ ពីទីក្រុងអាម៉ាន់ លោកបាន គីមូនបានអំពាវនាវជាថ្មីម្តងទៀតឲ្យបញ្ចប់អំពើហិង្សាដែលលោកយល់ថា នឹងអាចបង្កឲ្យមានគ្រោះមហន្តរាយធំធេង និងផ្ទុះសង្រ្គាមខ្លំាងក្លាដែលគ្មាននរណាអាចប្រមើលមើលទុកជាមុន និងគ្រប់គ្រងបាន។ ទន្ទឹមគ្នានេះ លោកបាន គីមូនក៏បានផ្ញើសារតាមរយៈ Videoconférence ពីទីក្រុងអាម៉ាន់ទៅកាន់ក្រុមប្រឹក្សាសន្តិសុខអង្គការសហប្រជាជាតិថា លោកហាក់ដូចជាគ្មានសុទិដ្ឋិនិយមក្នុងការបញ្ចប់អំពើហិង្សារវាងប៉ាឡេស្ទីន និងអ៊ីស្រាអែលសព្វថ្ងៃដែលបានធ្លាក់ដល់ជម្រៅមួយពិបាកស្រោចស្រង់។
យ៉ាងណាក៏ដោយ ក្រុមប្រឹក្សាសន្តិសុខបើកកិច្ចប្រជុំជាបន្ទាន់នៅថ្ងៃនេះដើម្បីពិនិត្យលើស្ថានការណ៍ហិង្សារវាងប៉ាឡេស្ទីន និងអ៊ីស្រាអែល។ ចំណែកប្រទេសរុស្ស៊ីបានស្នើឲ្យបើកកិច្ចប្រជុំចតុភាគី រួមមានរុស្ស៊ី អាមេរិក សហភាពអឺរ៉ុប និងអង្គការសហប្រជាជាតិដែលទទួលបន្ទុកស្វែងរកសន្តិភាពឲ្យប៉ាឡេស្ទីន និងអ៊ីស្រាអែល។ ចតុភាគីនោះបានបង្កើតឡើងតំាងពីឆ្នំា ២០០២ តែនៅមិនទាន់អាចផ្សះផ្សារភាគីជម្លោះទំាងពីរបានទេមកទល់បច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ