អ៊ីស្រាអែល-ប៉ាឡេស្ទីន៖ចលនាហិង្សាកាន់តែកើន អំណាចផ្តាច់ការកាន់តែខ្លាំង
ដូចដែរយើងបានតាមដាន ពីរសប្តាហ៍ កន្លងមក ចលនាហិង្សារបស់យុវជនក្មេងៗប៉ាឡេស្ទីន បានកើតឡើង ឥតឈប់ឈរ។ ករណីយកកាំបិតដើរចាក់មនុស្ស បានកើតឡើងបន្ថែមទៀត ហើយយុវជនប៉ាឡេស្ទីនខ្លះ នាំគ្នាយកដំថ្ម ទៅគុបលើកងកម្លាំង អ៊ីស្រាអែល ដែលនៅយាមកាម យ៉ាងតឹងរឹងបំផុត នៅក្នុងភាគខាងកើតក្រុងហ្សេរូសាឡឹម ដែលជាតំបន់របស់ជនជាតិប៉ាឡេស្ទីន តែស្ថិតក្រោមការកាន់កាប់ របស់អ៊ីស្រាអែល។ មិនត្រឹមតែប៉ុណ្ណោះ ចំណាត់ការបង្រ្កាប ទៅលើយុវជនប៉ាឡេស្ទីនពីសំណាក់អាជ្ញាធរអ៊ីស្រាអែល ត្រូវបានគេមើលឃើញថា វាខ្លាំងជ្រុលហួសហេតុ ហើយដែលវារឹតតែ បញ្ឆេះកំហឹងរបស់ប្រជាជនប៉ាឡេស្ទីនទូទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:៣៣
វិធានការដែលខាងអាជ្ញាធរអ៊ីស្រាអែល គិតថានឹងអាចជួយស្តារស្ថានការណ៍ឡើងវិញ គឺសុទ្ធតែជាវិធានការ ដែលប្រើធម៌ក្តៅ ហើយដូចដែលយើងបានឃើញកន្លងមកហើយ គឺថាវានឹងរឹតតែជម្រុញឲ្យប្រជាជនប៉ាឡេស្ទីន ជាពិសេសយុវជនក្មេងៗហ្នឹង កាន់តែខឹងស្អប់អ៊ីស្រាអែលកាន់តែខ្លាំង។ កាលពីប៉ុន្មានថ្ងៃមុននេះ អ៊ីស្រាអែល បានដាក់ប៉ុស្តិ៍ យាមច្រកចេញចូល ទៅលើទួលបូរាណ នៅកណ្តាលក្រុងហ្សេរូសាឡឹម មិនឲ្យជនជាតិប៉ាឡេស្ទីន អាយុក្រោម៥០ឆ្នាំឡើងទៅទេ ដើម្បីការពារកុំឲ្យមានករណី យកកាំបិតទៅចាក់មនុស្សទៀត។ ឥឡូវនេះ អ៊ីស្រាអែល បានរាយកម្លាំងពេញទីក្រុងហេរូសាឡឹម ភាគខាងកើតតែម្តង ដោយបានដាក់បញ្ឈរកម្លាំងត្រួតពិនិត្យ រាល់ការចេញចូល ធ្វើដំណើរ មិនថាថ្មើរជើង ឬតាមរថយន្ត របស់ប្រជាជនប៉ាឡេស្ទីន។
សូមបញ្ជាក់ថា ក្រុងហ្សេរូសាឡឹមភាគខាងកើតនេះ គឺជាតំបន់របស់ប្រជាជនប៉ាឡេស្ទីន ក៏ប៉ុន្តែស្ថិតក្រោមការកាន់កាប់អំណាចរបស់អ៊ីស្រាអែល។ ពោលគឺវាខុសពីតំបន់ស៊ីសហ្សកដានី រឺតំបន់ហ្គាហ្សា ដែលជាតំបន់ ស្ថិតក្រោមការកាន់កាប់ របស់អាជ្ញាធរប៉ាឡេស្ទីន។ ប្រជាជនប៉ាឡេស្ទីន ដែលរស់នៅក្នុងក្រុងហ្សេរូសាឡឹម ភាគខាងកើត គឺត្រូវបានអាជ្ញាធរអ៊ីស្រាអែល ចេញលិខិតស្នាមឲ្យស្នាក់នៅ និងអាចធ្វើដំណើរចេញចូល តំបន់ផ្សេងទៀត របស់អ៊ីស្រាអែល ក៏ប៉ុន្តែពេលធ្វើដំណើរទៅណាមកណា គឺមានការលំបាកណាស់ ដោយត្រូវគេឆែកឆេរឥតឈប់។
អ៊ីស្រាអែល យកកំហឹង ទល់កំហល់៖
ក្រោយហេតុការណ៍ ហិង្សា ២សប្តាហ៍កន្លងមកនេះ ខាងអ៊ីស្រាអែល បានសង្កេតឃើញថា ៨០%នៃជនដៃដល់ រឺយុវជនក្មេងប៉ាឡេស្ទីន ដែលចូលរួមអំពើហិង្សានេះ គឺជាអ្នកដែលរស់នៅ ក្នុងតំបន់ហ្សេរូសាឡឹមភាគខាងកើតនេះតែម្តង។ អញ្ចឹងហើយ បានជាអ៊ីស្រាអែល បានបិទខ្ទប់សន្តិសុខ តំបន់នេះ។ តាមការឲ្យដឹង នាយករដ្ឋមន្ត្រីអ៊ីស្រាអែល ទើបបានបញ្ជារឲ្យមានការឆែកឆេរ កម្ទេចផ្ទះសម្បែងរបស់ក្រុមយុវជនប៉ាឡេស្ទីន ដែលគេជឿថាជាជនដៃដល់ក្នុងអំពើហិង្សា។ កម្ទេចផ្ទះហើយ ទ្រព្យសម្បត្តិទាំងអស់ នឹងត្រូវគេរឹបអូស ហើយនឹងដកហូត បណ្ណស្នាក់នៅទៀត។
សំណួរសួរថា តើវិធានការទាំងនេះ វាសមហេតុផលសមផលដែររឺទេ ក្នុងការបញ្ចប់អំពើហិង្សា? កម្ទេចផ្ទះសម្បែងរបស់ជនដៃដល់ប៉ាឡេស្ទីន ចុះក្រុមគ្រួសារគ្នា ដែលជ្រកតំបូលនេះដែរ ដែលគ្នាមិនបានដឹងអីផង ឲ្យគ្នាទៅនៅឯណា? ផ្ទុយទៅវិញ ការចាប់ឆែកឆេរ បំផ្លាញទ្រព្យសម្បត្តិ ទាំងអស់នេះ គឺវារិតតែចិញ្ចឹមកំហឹងរបស់ប្រជាជនប៉ាឡេស្ទីន ហើយជាពិសេសក្មេងៗស្ទាវៗប៉ាឡេស្ទីនតែម្តង ដែលកាន់តែអត់ទ្រាំលែងបាន ហើយនាំគ្នា ចេញទៅធ្វើអំពើហិង្សាបន្ថែមទៀត។ ស្រ្តីជនជាតិប៉ាឡេស្ទីនម្នាក់ ដែលស្រែកទ្រហោរយំ ក្នុងពេលបញ្ចុះសពកូនប្រុសគាត់ ដែលត្រូវបានប៉ូលីសអ៊ីស្រាអែល បាញ់សម្លាប់ កាលពីថ្ងៃអង្គារ បានពោលថា “ដរាបណា អ៊ីស្រាអែល នៅតែបន្តធ្វើអាណានិគមលើដែនដីប៉ាឡេស្ទីន ដរាបណាអ៊ីស្រាអែល នៅតែបំពាន ជិះជាន់ប្រជាជនប៉ាឡេស្ទីន ដរាបនោះនៅតែមានអំពើហិង្សា និង ការតស៊ូពលីជីវិត របស់បងប្អូនប៉ាឡេស្ទីន ជានិច្ច”។
សម្តីរបស់ ម៉ាមូដ អាបាស ប្រៀបដូចយកសាំង ទៅចាក់លើភ្លើង ៖
លោក ម៉ាសមូដ អាបាស ប្រមុខដឹកនាំប៉ាឡេស្ទីន បានប្រកាសនៅថ្ងៃព្រហស្បតិ៍នេះថា ចលនាបះបោរហិង្សា របស់យុវជនប៉ាឡេស្ទីន វាគឺជាសិទ្ធិស្របច្បាប់ និងដោយសន្តិវិធី របស់ប្រជាជនប៉ាឡេស្ទីន។ តើសន្តិវិធីបែបណា ដែលយកកាំបិតដើរចាក់មនុស្សស្លូតត្រង់បែបនេះ?
សម្តីនេះ វាគឺជាកំហុសនយោបាយមួយធំណាស់ សម្រាប់ថ្នាក់ដឹកនាំប៉ាឡេស្ទីន។ លោកម៉ាមូដ អាបាស នៅស្ងៀមរហូត ជិតពីរអាទិត្យហើយ ហើយទើបតែមានប្រតិកម្ម នៅពេលនេះប៉ុណ្ណោះ។ តាមការសន្និដ្ឋាន អាជ្ញាធរប៉ាឡេស្ទីន ព្យាយាមទប់ចលនាហិង្សាដែរ ព្រោះខ្លាចអ៊ីស្រាអែល ប្រើអាវុធធនធំ។ ក៏ប៉ុន្តែតាមមើលទៅ គឺហាមមិនឈ្នះ ព្រោះថាក្រុមយុវជនប៉ាឡេស្ទីន មិនស្តាប់ ហើយមានបណ្តាញ Facebook ជួយជំរុញគ្នាទៀត។ អញ្ចឹងហើយ បានជាពេលនេះ លោក ម៉ាមូដ អាបាស ងៀកមកនិយាយកាន់ជើងចលនាហិង្សាទៅវិញ ព្រោះខ្លាចស្រួលមិនស្រួល ចលនាហិង្សានេះ នឹងរាលដាលមករកអាជ្ញាធរប៉ាឡេស្ទីនខ្លួនឯងវិញ ព្រោះធ្វើអីមិនកើត បណ្តោយឲ្យអ៊ីស្រាអែលធ្វើបាបប្រជាជន។
ក្នុងសម្តី លោក ម៉ាសមូដ អាបាស គាត់អត់មានថ្កោលទោស សកម្មភាពយកកាំបិត ដើរចាក់មនុស្សរបស់ក្រុមយុវជនប៉ាឡេស្ទីនទេ ផ្ទុយទៅវិញលោកថា នេះជាសិទ្ធិការពារខ្លួន ដោយសន្តិវិធីរបស់ប៉ាឡេស្ទីន។ បើយើងវិភាគទៅ យើងយល់ថា មូលហេតុដែលជម្រុញឲ្យយុវជនទាំងនេះ ចេញធ្វើអំពើហិង្សា គឺដោយសារពួកគេ អត់ទ្រាំលែងបាននឹងអំពើឈ្លានពាន ជិះជាន់របស់អ៊ីស្រាអែល។ ក៏ប៉ុន្តែ យកកាំបិត ដើរចាក់ ប្រជាជនអ៊ីស្រាអែល ស្លូតត្រង់ ដែលគ្នាមិនដឹងអីសោះ ក៏វាមិនត្រឹមត្រូវដែរ។ សម្តីរបស់ ប្រមុខដឹកនាំប៉ាឡេស្ទីន គឺវាមិនខុសពីយក សាំងទៅចាក់បន្ថែមលើភ្លើងទេ។
អ៊ីស្រាអែល ប្រើកម្លាំងបង្រា្កបជ្រុលហួសហេតុ បាញ់សម្លាប់ទាំងអស់ ឲ្យតែគេសង្ស័យ៖
ខាងអ៊ីស្រាអែលវិញ គេអាងកម្លាំង។ កាន់តែមានចលនាហិង្សា គេកាន់តែរឹតបន្តិងកម្លាំង ប្រើធម៌ក្តៅ។ ទាក់ទិន និងការប្រើកម្លាំងនេះ មានអង្គការការពារសិទ្ធិមនុស្សនានា បានបរិហារពីចំណាត់ការ ជ្រុលហួសហេតុ ដែលមិនសមមាត្រ ទៅនឹងស្ថានភាពជាក់ស្តែង របស់អាជ្ញាធរអ៊ីស្រាអែល។ មានករណីបាញ់សម្លាប់ទៅលើយុវជនប៉ាឡេស្ទីន ប៉ុន្មានថ្ងៃចុងក្រោយនេះ ដែលគេសង្ស័យថា ក្រុមប៉ូលីសអ៊ីស្រាអែល បានធ្វើការបាញ់សម្លាប់ ភ្លាមៗ ដោយមិនមានសាកល្បងចាប់ខ្លួន ជាមុនទេ។ ពោលគឺ ឲ្យតែគេសង្ស័យ ថាមនុស្សនោះ មើលទំនងថា អាចបង្កគ្រោះថ្នាក់ គេបាញ់សម្លាប់តែម្តង។
អ្នកនាំពាក្យអាជ្ញាធរប៉ាឡេស្ទីន ក៏បានបរិហារពីការប្រើកម្លាំងជ្រុលហួសហេតុ របស់អ៊ីស្រាអែលនេះដែរ។ គេបានអះអាងថា ប៉ាឡេស្ទីន នឹងធ្វើពាក្យបណ្តឹងមួយ ទៅតុលាការ ព្រហ្មទណ្ឌអន្តរជាតិ ដើម្បីឲ្យនាយករដ្ឋមន្តី្រ អ៊ីស្រាអែល ទទួលខុសត្រូវ លើការប្រើកម្លាំងសម្លាប់ លើជនជាតិប៉ាឡេស្ទីន។ ការបាញ់សម្លាប់បង្រ្កាបក្រុមយុវជនប៉ាឡេស្ទីននេះ កន្លងមកខាងអ៊ីស្រាអែល គេអះអាង ថាគេធ្វើត្រឹមត្រូវ ហើយឲ្យតែមានខាងប៉ូលីសបាញ់សម្លាប់បានម្តងៗ គឺមានមេកើយគេ អបអរសរសើរ។ ប៉ុន្តែគេមិនដែលខ្វល់ថា អ្នកដែលត្រូវគេសម្លាប់នោះ ជាជនដៃដល់មែនរឺមិនមែន ទេ។ ហើយតើកាលៈទេសៈជាក់ស្តែងនោះ វាតម្រូវឲ្យប៉ូលីស ត្រូវតែបាញ់សម្លាប់លើជនសង្ស័យ មែនរឺយ៉ាងណានោះទេ។
សរុបទៅ គេសង្ស័យថា ប៉ូលីសអ៊ីស្រាអែល បានទទួលបញ្ជារ ឲ្យបាញ់សម្លាប់ទាំងអស់ ដោយឥតរើសមុខ ឲ្យតែសង្ស័យ។ ត្រង់បញ្ហានេះ លោក បាន គីមូន អគ្គលេខាធិការអង្គការសហប្រជាជាតិ ក៏បានមានប្រតិកម្មផងដែរ ដោយលោក បានទាមទារ ឲ្យមានការស៊ើបអង្កេតឲ្យបានច្បាស់។
អន្តរាគមន៍របស់កងរក្សាសន្តិសុខអង្គការសហប្រជាជាតិ?
តាមព័ត៌មានចុងក្រោយនេះ ក្រុមប្រទេសអារ៉ាប់ កំពុងតែរៀបចំស្នើទៅ អង្គការសហប្រជាជាតិ ឲ្យបញ្ជូនកងកម្លាំងមួកខៀវ របស់អង្គការសហប្រជាជាតិ ឲ្យទៅរក្សាសន្តិសុខ នៅតំបន់ហ្សេរូសាឡឹមខាងកើត។ វាអាចជាដំណោះស្រាយបណ្តោះអាសន្នមួយដែរ ដែលមានកងកម្លាំងកណ្តាលមួយ ចូលទៅរក្សាសន្តិសុខ ដើម្បីកុំឲ្យអាជ្ញាធរអ៊ីស្រាអែល ប្រើកម្លាំងកៀបសង្កត់ដោយផ្ទាល់ ទៅលើប្រជាជនប៉ាឡេស្ទីន នៅតំបន់ហ្សេរូសាឡឹមខាងកើត។ ក៏ប៉ុន្តែយើងសួរថា តើវាអាចទៅរួចទេ សំណើរនេះ? ចំលើយគឺថា វារាងពិបាកបន្តិច។
បើចង់បញ្ជូនកងកម្លាំងរក្សាសន្តិសុខរបស់អង្គការសហប្រជាជាតិទៅ ទីមួយត្រូវតែមានការស្ម័គ្រចិត្ត ពីភាគីទាំងសងខាង គឺអ៊ីស្រាអែល និង ប៉ាឡេស្ទីន។ កន្លងមក តាំងពីដើម អ៊ីស្រាអែល បដិសេធដាច់អហង្កា តែម្តង រឿងបញ្ជូនកងទ័ពមួកខៀវ ទៅដោះស្រាយបញ្ហានៅស្រុកគេ។ អញ្ចឹងគឺ វាមិនអាចទៅរួចទេ។ ក្នុងករណីមួយទៀត គឺទាល់តែក្រុមប្រឹក្សាអចិន្ត្រៃយ៍ អង្គការសហប្រជាជាតិ ជាអ្នកសម្រេចចាប់បង្ខំ បញ្ជូនទ័ពទៅ។ ប៉ុន្តែក្នុងករណីនេះ គឺទាល់តែកុំឲ្យមានប្រទេសណាមួយ បោះឆ្នោតវេតូឲ្យសោះ បានធ្វើបាន។ ត្រង់នេះ គឺគេមិនសង្ឃឹមថា អាមេរិក នឹងបោះឆ្នោតគាំទ្រទេ បើទោះបីជា មួយរយៈចុងក្រោយនេះ អាមេរិក ដូចជាអន់ចិត្តនឹងអ៊ីស្រាអែលបន្តិចមែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ