លោកបាន គីមូនព្រមានអ៊ីស្រាអែលពីការប្រើកម្លាំងច្រើនជ្រុល ទៅលើជនជាតិប៉ាឡេស្ទីន
អគ្គលេខាធិការអង្គការសហប្រជាជាតិ លោកបាន គីមូន បាន ធ្វើទស្សនកិច្ច គួរឲ្យភ្ញាក់ផ្អើលមួយ ទៅតំបន់ដើមបូព៌ា ក្នុងបំណងជួយសម្រាលភាពតានតឹង រវាងអ៊ីស្រាអែល និងប៉ាឡេស្ទីន ដែលកំពុងផ្ទុះហិង្សាដាក់គ្នា សឹងរាល់ថ្ងៃ ទាំងនៅទឹកដីអ៊ីស្រាអែល និងទឹកដីប៉ាឡេស្ទីន កាន់កាប់ដោយអ៊ីស្រាអែល។ បន្ទាប់និយាយជាមួយលោកនាយករដ្ឋមន្រ្តីអ៊ីស្រាអែល កាលពីថ្ងៃអង្គារម្សិលមិញ លោកបាន គីមូនត្រូវជួបនៅថ្ងៃនេះ ប្រមុខដឹកនាំប៉ាឡេស្ទីន មុន នឹងត្រូវរាយការណ៍ជូនក្រុមប្រឹក្សាសន្តិសុខ នៅល្ងាចថ្ងៃពុធនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
នៅក្នុងសន្និសីទកាសែត រួមគ្នា ជាមួយលោកនាយករដ្ឋមន្រ្តីអ៊ីស្រាអែល បិនចាមីន នេតានីញ៉ាហ៊ូ អគ្គលេខាធិការអង្គការសហប្រជាជាតិបានលើកឡើងពីការប្រើកម្លាំងបាយរបស់រដ្ឋាភិបាលអ៊ីស្រាអែល ដើម្បីជម្លោះជាមួយប្រជាជនប៉ាឡេស្ទីន។ “ការប្រើកម្លាំង ច្រើនជ្រុលនឹងបណ្តុះការខឹង ស្អប់ និងក្តីព្រួយបារម្ភ ដែលប្រភពធ្វើឲ្យអំពើហិង្សាកាន់តែកើនឡើង”។ នេះជាការព្រមានរបស់លោកបាន គីមូន មុននឹងនិយាយថា មធ្យោបាយតែមួយ ដើម្បីបញ្ចប់ជម្លោះ គឺមានតែតាមរយៈ ការចរចាតែប៉ុណ្ណោះ។
ការព្រមានរបស់អគ្គលេខាធិការអង្គការសហប្រជាជាតិ ហាក់មិនបានចូលត្រចៀករបស់នាយក រដ្ឋមន្រ្តីអ៊ីស្រាអែល នោះទេ។ លោកបិនចាមីន នេតានីញ៉ាហ៊ូ បាននិយាយការពារជំហររដ្ឋាភិបាលអ៊ីស្រាអែល ដោយថា រដ្ឋាភិបាលមានសិទ្ធិការពារសន្តិសុខឲ្យប្រជាពលរដ្ឋរបស់ខ្លួន។ “ដូច្នេះ អ៊ីស្រាអែលមិនបានប្រើកម្លាំងច្រើនជ្រុលហួសហេតុនោះទេ”
នៅទឹកដីប៉ាឡេស្ទីន កាន់កាប់ដោយអ៊ីស្រាអែល អំពើភេរវកម្ម ការប៉ះទង្គិច និងការវាយប្រហារគ្នាដ៏ ហិង្សា រវាងយុវជនប៉ាឡេស្ទីន ជាមួយទាហានអ៊ីស្រាអែល ហើយនិងប្រជាជនអ៊ីស្រាអែល ជ្វីហ្វនិយមជ្រុល បានកើតមានសឹងរាល់ថ្ងៃ។ តាំងពីថ្ងៃទី ១ តុលា មក ថ្ងៃដែលអ៊ីស្រាអែល និងប៉ាឡេស្ទីន ចាប់ប្រឈមមុខដាក់គ្នាជាថ្មី ដោយសារឃាតកម្មទៅលើគ្រួសារអ៊ីស្រាអែល នៅដែនដីអាណានិគមកិច្ចអ៊ីស្រាអែល ប្រជាជនអ៊ីស្រាអែល៨នាក់បានស្លាប់នៅក្នុងអំពើភេរវកម្ម ចាក់ សម្លាប់មនុស្ស បង្កដោយប្រជាជនប៉ាឡេស្ទីន។ នៅភាគីប៉ាឡេស្ទីន មនុស្ស៤៥នាក់ត្រូវបានទាហានអ៊ីស្រាអែលបាញ់សម្លាប់ ដែលនៅក្នុងនោះ មាន ជាង ២០នាក់ ជាភេរវជន។
នៅមុខនាយករដ្ឋមន្រ្តី អ៊ីស្រាអែល លោកបាន គីមូន បានសំដែងផងដែរ ពីការភ័យ ព្រួយបារម្ភ នៅពេលមេក្រុមចលនាហាម៉ាស ឬក្រុមជីហាត ស្វាគម គាំទ្រ សកម្មភាព របស់យុវជនប៉ាឡេស្ទីន ដែលបានដើរចាក់សម្លាប់ជនជាតិជ្វីហ្វ អ៊ីស្រាអែល។ នៅថ្ងៃពុធនេះ លោកបាន គីមូន ត្រូវជួបពិភាក្សាជាមួយប្រមុខដឹកនាំប៉ាឡេស្ទីន លោកមាមូដ អាបាស នៅតំបន់ស៊ីហ្សកដានី។ នៅថ្ងៃពុធដដែល បន្ទាប់ពី ជួបជាមួយតំណាងភាគីជម្លោះ ប៉ាឡេស្ទីន អ៊ីស្រាអែល លោកបាន គីមូន ត្រូវធ្វើរបាយការណ៍ជូនក្រុមប្រឹក្សាសន្តិសុខ អង្គការសហប្រជាជាតិ ដែលត្រូវកោះប្រជុំបន្ទាន់ មួយ ដើម្បីនិយាយពីភាពតានតឹង រវាងអ៊ីស្រាអែល និងប៉ាឡេស្ទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ