អំពើហិង្សារវាងអ៊ីស្រាអែល-ប៉ាឡេស្ទីន កំពុងក្លាយជាជម្លោះសាសនា ?
អំពើហិង្សារវាងប៉ាឡេស្ទីននិងអ៊ីស្រាអែល បានធូរស្បើយទេ។ នៅថ្ងៃនេះ ជនជាតិប៉ាឡេស្ទីន យ៉ាងហោច៥នាក់ត្រូវបានសម្លាប់ បន្ទាប់ពីបានប៉ុនប៉ងប្រើកាំបិតចាក់សម្លាប់អ៊ីស្រាអែល បីករណី។ ម្សិលមិញ ទីសក្ការៈរបស់ជនជាតិជីហ្វ ត្រូវដុតបំផ្លាញ។ វិបត្តិអ៊ីស្រាអែល-ប៉ាឡេស្ទីនហាក់កំពុងរាលដាលដល់របត់ថ្មី មានទម្រង់ជាជម្លោះសាសនាកាន់ខ្លាំងឡើងៗ ដែលគួរឱ្យព្រួយបារម្ភពីគ្រប់មជ្ឈដ្ឋាន។ ក្រុមប្រឹក្សាសន្តិសុខអង្គការសហប្រជាជាតិដែលបានបើកប្រជុំជាបន្ទាន់ នៅយប់មិញ បានថ្កោលទោសការវាយប្រហារមណ្ឌលសាសនា និងបានអំពាវនាវឱ្យអ៊ីស្រាអែល និងប៉ាឡេស្ទីន ចេះអត់ធ្មត់។ ក្រុមប្រឹក្សាសន្តិសុខនឹងជួបប្រជុំគ្នាជាថ្មីទៀតនៅសប្តាហ៍ក្រោយ ក្រែងអាចចេញសេចក្តីថ្លែងការណ៍រួមគ្នាមួយបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:១៥
នៅថ្ងៃសុក្រម្សិលមិញនេះ អាចចាត់ទុកជារបត់ថ្មីមួយនៃអំពើហិង្សាប៉ាឡេស្ទីន ដែលរាលដាលពីសកម្មភាពចាក់នឹងកាំបិត ទៅជាការប្រឆាំងនឹងសាសនា។ តាំងពីព្រហាមឡើង យុវជនប៉ាឡេស្ទីនបានដុតបំផ្លាញ ទីសក្ការៈរបស់អ្នកកាន់សាសនាយូដានព្រមទាំងមានការប៉ះទង្គិចគ្នាយ៉ាងហិង្សា រវាងប៉ាឡេស្ទីននិងទាហានអ៊ីស្រាអែល នៅជាច្រើនចំណុច។ ក្រោយពីសូត្រធម៌ថ្ងៃសុក្ររួច ជនប៉ាឡេស្ទីនមួយក្រុម បានអំពាវនាវឱ្យ ប្រែក្លាយថ្ងៃសុក្រទៅជាថ្ងៃបដិវត្ត នៅតំបន់ស៊ីហ្ស័កដានី និងនៅតំបន់ហ្កាហ្សា។ ជនប៉ាឡេស្ទីនបួននាក់ត្រូវបានសម្លាប់។
នៅថ្ងៃនេះ មានអំពើហិង្សាចាក់នឹងកាំបិត បីករណី កើតឡើងទៀត ពីរនៅស៊ីហ្សកដានី ប្រឆាំងនឹងទាហានអ៊ីស្រាអែល និងមួយនៅយេរូសាឡឹម ដោយមាន ជនប៉ាឡេស្ទីនយ៉ាងហោច៥នាក់ត្រូវបានសម្លាប់។ ម្នាក់មានអាយុទើបតែ១៨ឆ្នាំ បានត្រូវទាហានអ៊ីស្រាអែលបាញ់សម្លាប់ ពេលជននោះប៉ុនប៉ងចាក់នឹងកាំបិត។ ម្នាក់ទៀត បានប៉ុនប៉ងចាក់សម្លាប់អ្នកដំណើរតាមផ្លូវ។ ជាសរុបត្រឹមដើមខែតុលាមក អំពើហិង្សាបានសម្លាប់ជីវិតជនប៉ាឡេស្ទីនអស់៣៧នាក់ ភាគច្រើនជាដើមហេតុកាន់កាំបិតទៅចាក់គេ និងខាងអ៊ីស្រាអែល ៧នាក់។
ក្រុមប្រឹក្សាសន្តិសុខអង្គការសហប្រជាជាតិ កោះប្រជុំជាបន្ទាន់
ប្រឈមមុខនឹងការរាលដាលហិង្សាខ្លាំង ហ្ស័កដានី ក្នុងនាមជាប្រទេសអារ៉ាបបានស្នើឱ្យក្រុមប្រឹក្សាសន្តិសុខកោះប្រជុំបន្ទាន់ ប៉ុន្តែកិច្ចប្រជុំគ្មានកម្មវត្ថុចេញសេចក្តីសម្រេចចិត្តអ្វីទេ! អង្គការសហប្រជាជាតិ ដោយមានលោក បាន គីមូន ជាអគ្គលេខាធិការ បានត្រឹមថ្លែងថ្កោលទោសយ៉ាងខ្លាំងទង្វើមិនគប្បីបំផ្លាញទីសក្ការៈសាសនា និងបានទាមទារឱ្យនាំជនដៃដល់ទៅកាត់ទោសនៅមុខតុលាការ។ ប៉ុន្តែក្រុមប្រឹក្សាសន្តិសុខអង្គការសហប្រជាជាតិ មានអំណរយ៉ាងខ្លាំង នៅពេលបានឃើញប្រតិកម្មរបស់លោក មះម៉ូដអាបាស ប្រធានអាជ្ញាធរដែនដីប៉ាឡេស្ទីន ដែលបានថ្កោលទោសភ្លាមសកម្មភាពហិង្សានោះ និងបញ្ជាឱ្យបើកអង្កេតដោយគ្មានបង្អង់។
ពីអំពើហិង្សាជាតិនិយម ទៅជម្លោះសាសនា
សម្រាប់អង្គការសហប្រជាជាតិ ការវាយប្រហារលើផ្នូរជាទីសក្ការៈរបស់បណ្តាជនអ៊ីស្រាអែល បានប៉ះពាល់ខ្លាំងដល់សាសនា ដែលនឹងអាចនាំឱ្យមានការបកស្រាយខុស ប្រែក្លាយការតស៊ូជាតិនិយម ទៅជាការប្រយុទ្ធប្រឆាំងដើម្បីសាសនា។ ហើយបើជាជម្លោះសាសនា នោះអាចបង្កជាមហន្តរាយធ្ងន់ធ្ងរបំផុត។ អង្គការសហប្រជាជាតិ បានស្នើសុំឱ្យគ្រប់ភាគី អ៊ីស្រាអែល និងប៉ាឡេស្ទីន គោរពនិងកុំប៉ះពាល់កន្លែងសក្តិសិទ្ធិ។
លោកអូបាម៉ា ក៏បានបង្ហាញក្តីព្រួយបារម្ភ និងធ្វើការថ្កោលទោសដែរ។ ដើម្បីជាតំណាង លោក ចន ឃែរី នឹងជួបពិភាក្សាដោយផ្ទាល់ជាមួយ លោក នេតាន់យ៉ាហ៊ូ នៅសប្តាហ៍នៅអាល្លឺម៉ង់។ ហើយក្នុងពេលរង់ចាំនេះ លោក ឃែរី បានទូរស័ព្ទ ដាច់ដោយឡែកពីគ្នាទៅលោក ប្រមុខដឹកនាំអ៊ីស្រាអែល និងប៉ាឡេស្ទីន ឱ្យប្រឹងធ្វើយ៉ាងណានាំភាពស្ងប់ស្ងាត់ដល់តំបន់។ មេដឹកនាំអ៊ីស្រាអែលនិងប៉ាឡេស្ទីន ក៏ទំនងជានឹងត្រូវជួបពិភាក្សាគ្នាដោយផ្ទាល់ក្នុងពេលឆាប់ៗនេះដែរ។
អ៊ីស្រាអែល-ប៉ាឡេស្ទីន ដូចទឹកនឹងប្រេង
ក្រោយហេតុការណ៍ហិង្សារាលដាលដល់ការដុតបំផ្លាញទីសក្ការៈរបស់ជនជាតិអ៊ីស្រាអែល ប៉ាឡេស្ទីន បានស្នើសុំទៅអង្គការសហប្រជាជាតិ ការការពារពីអន្តរជាតិ រាប់ទាំងការពង្រាយកម្លាំងទ័ពមួកខៀវនៅក្រុងយេរូសាឡឹមចាស់ នៅតាមមណ្ឌលសាសនាជាទីសក្ការៈរបស់អ្នកកាន់សាសនាអ៊ីស្លាម នៅយេរូសាឡឹមខាងកើត នៅវិហារ អាលអាក្សា ទីលានសក្តិសិទ្ធិ ដែលជាសមរភូមិប្រឈមមុខគ្នារវាងជនជាតិប៉ាឡេស្ទីន និងកងរក្សាសន្តិសុខអ៊ីស្រាអែល។ ប៉ុន្តែភាគីអ៊ីស្រាអែល ប្រឆាំងដាច់ខាត និងបានបដិសេធ វត្តមានបរទេសនៅវិហារអ៊ីស្លាម ព្រោះសំអាងថានឹងធ្វើមានលម្អៀង។ យេរូសាឡឹម ជាក្រុងសក្តិសិទ្ធសម្រាប់ អ្នកកាន់សាសនាអ៊ីស្លាម ឬយូដាន។
ឯកអគ្គរដ្ឋទូតថ្មីរបស់អ៊ីស្រាអែលប្រចាំអង្គការសហប្រជាជាតិ ចង់ឃើញក្រុមប្រឹក្សាថ្កោលទោស ការញុះញង់ឱ្យមានអំពើហិង្សាពីសំណាក់ប៉ាឡេស្ទីនជាង និងគាំទ្រការចរចាសន្តិភាពដោយផ្ទាល់ឡើងវិញ។ ប៉ុន្តែដំណើរការចរចាសន្តិភាពដើមបូព៌ានេះ បានអូសបន្លាយអស់ពេលជាច្រើនខែឆ្នាំ និងជួបបរាជ័យមិនដឹងជាប៉ុន្មានលើកប៉ុន្មានសាទេ។ ការផ្តល់សន្ទុះចុងក្រោយ ដែលជាគំនិតផ្តួចផ្តើមរបស់អាមេរិក ក៏ត្រូវបានជាប់គាំង លែងមានដំណើរការទៀត តាំងពីជាងមួយឆ្នាំកន្លះមកហើយ។
បារាំងបានផ្តល់គំនិតថ្មី ចង់បង្កើតក្រុមគាំទ្រអន្តរជាតិមួយក្រុម សម្រាប់ផ្តល់សន្ទុះជាថ្មីដល់ការដំណើរការសន្តិភាពនេះ។ យើងរង់ចាំមើលថាតើនឹងអាចមានប្រសិទ្ធិភាព បានប៉ុណ្ណា ឬក៏ត្រូវបរាជ័យទាំងមិនទាន់ចាប់ផ្តើមដូចមុនៗទៀតក៏មិនដឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ