ពិព័រណ៍សកលឆ្នាំ២០១៥ “ចិញ្ចឹមផែនដី ថាមពលសម្រាប់ជីវិត”
ពិព័រណ៍សកលឆ្នាំ២០១៥ បានបើកទ្វារជាផ្លូវការ នៅថ្ងៃសុក្រទី ១ ឧសភា នេះ រហូតដល់ថ្ងៃទី ៣១ តុលា ដោយសង្ឃឹមថានឹងមានមនុស្សម្នាចូលទស្សនា ជាង២០លាននាក់។ មានប្រទេសចំនួន ១៤៤ និងអង្គការក្រៅរដ្ឋាភិបាលដូចជាអង្គការស្បៀងអាហារនិងកសិកម្មពិភពលោក អង្គការសហប្រជាជាតិ សហភាពអឺរ៉ុប ក៏មានវត្តមានក្នុងពិធីតាំងពិព័រណ៍សកលនេះដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៥៧
នៅក្នុងទីតាំងពិព័រណ៍សកល តាមការរៀបរាប់របស់អ្នកឆែកឆេរនៅច្រកចូល ចំនួនទស្សនិកជនមានកាន់តែច្រើន។ កាន់តែជិតដល់ពេលបិទ គឺកាន់តែកើនឡើង។ ជាក់ស្តែង តាំងពីម្សិលមិញមក និងនៅព្រឹកនេះទៀត នៅផ្ទះពិព័រណ៍ខ្លះ គេត្រូវឈរបន្តកន្ទុយគ្នារហូតដល់មួយម៉ោងទើបអាចចូលបាន។ អ៊ីតាលីជាម្ចាស់ផ្ទះសង្ឃឹមថា នឹងមានភ្ញៀវចូលទស្សនាជាង២០លាននាក់។ ជាលើកទីមួយ ពិព័រណ៍សកលឧទ្ទិសជាផ្លូវការដល់សុវត្ថិភាពចំណីអាហារ និងភាពចម្រុះនៃស្បៀង។ អ្នកចូលទស្សនាអាចស្រង់ក្លិន និងភ្លក់ម្ហូបអាហារគ្រប់រសជាតិ និងមកពីគ្រប់ជ្រុងនៃភពផែនដី។
ផ្ទះពិព័រណ៍ដែលបានទទួលការចាប់អារម្មណ៍ខ្លាំងគេ
ក្នុងផ្ទៃក្រឡា ១លានម៉ែត្រការ៉េ របស់ទីតាំងពិព័រណ៍សកល មានដាំដើមឈើ ប្រលាយទឹក មានផ្ទះពិព័រណ៍ចំនួន៨០ ដែលសាងសង់ដោយការប្រឌិតស្ថាបត្យកម្មថ្មីៗ ប្លែកៗ ស្របតាមប្រធានបទបរិស្ថាននិងចំណីអាហារ សម្រាប់ប្រកួតប្រជែងគ្នា និងសុទ្ធតែគួរឱ្យទាក់ភ្នែកចង់ចូលទស្សនាទាំងអស់។ តែមាន១០ផ្ទះ ដែលអ្នកទស្សនាមិនគួរខកខាន។ គ្រាន់តែចូលដល់ភ្លាម គឺផ្ទះលេខ0 របស់អង្គការសហប្រជាជាតិ។
អ៊ីតាលីជាម្ចាស់ផ្ទះ មានផ្ទះពិព័រណ៍ឧទ្ទិសដល់វប្បធម៌ និងទំនៀមទម្លាប់ជាតិ ទាក់ទងនឹងចំណីអាហារនិងគុណភាពនៃវត្ថុធាតុដើមនិងផលិតផលបញ្ចប់ស្របតាមប្រធានបទនៃពិព័រណ៍សកលឆ្នាំ២០១៥នេះតែម្តង។ ចំណែកផ្ទះពិព័រណ៍បារាំងវិញ គោរពបានទាំងស្រុងនូវប្រធានបទបរិស្ថាន ៖ ជាសំណង់ឈើ ១០០% បណ្តុបលើគ្នា ដូចល្បែងក្មេងលេង អាចដោះ រូចសង់ឡើងវិញបាន និងដោយគ្មានឃើញស្នាមសោះ។ ខុសការរំពឹងទុក ផ្ទះបារាំងបានទទួលការទស្សនាដ៏ច្រើនលើសលុប។ បានក្លាយជាផ្ទះពិព័រណ៍ដ៏ពេញនិយមបីដំបូង ប្រដំប្រសងគ្នានឹងផ្ទះកូរ៉េខាងត្បូង និងផ្ទះជប៉ុន។ ផ្ទះជប៉ុនសង់អំពីឈើដែរ ជារចនាបទអណន្ត បានទាក់ទាញភ្ញៀវយ៉ាងខ្លាំង។ តាំងពីថ្ងៃបើកមកទល់ពេលនេះ គេត្រូវឈរបន្តកន្ទុយដល់ទៅជាងមួយម៉ោងទើបអាចបានចូលទស្សនា។ ម៉ាគី សាស៊ីមី ... ចំណីអាហារធ្វើពីអង្ករ បន្លែត្រីឆៅ ឆ្លើយតបទាំងស្រុងទៅនឹងប្រធានបទបរិស្ថាន ប្រឆាំងនឹងការខ្ចះខ្ចាយអាហារ របស់ពិព័រណ៍ មិនតែប៉ុណ្ណោះថែមទាំងអាចប្រយុទ្ធទប់ស្កាត់ជំងឺធាត់ជ្រុលទៀត។
គួរឱ្យប្លែកភ្នែក គឺផ្ទះអង់គ្លេស ដែលមានស្ទីលស្ថាបត្យកម្មជាសំបុកឃ្មុំ ដើម្បីរំលេចអំពីអត្ថន័យនៃប្រព័ន្ធបរិស្ថាន។ ចំពោះផ្ទះអាល្លឺម៉ង់វិញ គ្រាន់តែបានឃើញគឺនឹងធ្វើឱ្យគេនឹកដល់ស្រុកស្រែអាល្លឺម៉ង់ហើយ។ តាមរយៈផ្ទះពិព័រណ៍នេះ អាល្លឺម៉ង់ចង់ជំរុញ និងលើកទឹកចិត្តថាមនុស្សគ្រប់រូបតែសកម្ម សកម្មដើម្បីធម្មជាតិ ដើម្បីរស់។
ផ្ទះខ្មែរនៅពិព័រណ៌សកល ក្រុងមីឡង់
វត្តមានរបស់ខ្មែរ នៅមីឡង់នេះ ស្ថិតនៅក្នុងក្របខ័ណ្ឌក្រុមប្រទេសអ្នកផលិតស្រូវអង្ករ កាហ្វេ ឬគ្រឿងទេសជាមួយ ឡាវ ភូមា បង់ក្លាដែស សារ៉ាឡេអូន នៃគម្រោងរបស់អង្គការស្បៀងអាហារ និងកសិកម្មពិភពលោក។
នៅពីមុខពន្លារជាតិ មានលម្អទៅដោយការដាំដុះស្រូវ ជាស្រែសន្ទូង ស្រែខៀវស្រងាត់ ស្រែស្រូវទុំ និងស្រែទើបច្រូតថ្មីៗ ចងជាកណ្តាប់បញ្ឈរ កណ្តាលស្រែ ក្នុងដីសើម និងអមទៅដោយអាងទឹក ដែលប្រភពដ៏សំខាន់សម្រាប់ធ្វើស្រែ និងដែល ជាតំណាងនៃប្រព័ន្ធប្រឡាយទឹក ជាកេរមរតកខ្មែរ។ គឺស្របទៅតាមប្រធានបទដែលខ្មែរបានដាក់ “ដំណាំស្រូវលើដែនដីវប្បធម៌ចំណាស់”។
ក្នុងផ្ទៃក្រឡា ១២៥ម៉ែត្រការ៉េ និងនៅមាត់ច្រកចូលផ្ទះភ្លាម ភ្ញៀវនឹងបានឃើញរូបប្រាង្គប្រាសាទអង្គរ និងរូបចម្លាក់ផ្សេង មុននឹងចូលទៅដល់ឃើញការតាំងបង្ហាញ ដើមស្រូវ ទេសភាពវាលស្រែ មានដើមត្នោត ពេញផ្ទៃនៃពន្លារ រទេះនង្គ័ល រនាស់ និងឧបករណ៍ធ្វើស្រែមួយចំនួនធំ ជាទីពេញរបស់កសិករខ្មែរ និងផលិតផលអង្ករ សម្រេច មានដាក់រាយបង្ហាញ និងខ្ចប់ជាកញ្ចប់រួចស្រេច តាមបែបស្តង់ដារដាក់លក់ ទន្ទឹមនឹងស្ករត្នោត ម្រេចដ៏ល្បីល្បាញ ព្រមទាំងវត្ថុអនុស្សាវរីយ៍ ធ្វើពីសូត្រ ពីត្រឡោកដូង ដើមត្នោត ។ល។ និង។ល។
ពិព័រណ៍សកលមីឡង់នេះ ជាឱកាសមួយសម្រាប់នាំពិភពលោកឱ្យបានស្គាល់ មិនត្រឹមតែអរិយធម៌វប្បធម៌ដ៏ល្បីល្បាញរបស់ខ្មែរនេះ តែក៏បានស្គាល់ការពិតរបស់កម្ពុជា ដែលជាប្រទេសមានប្រវត្តិសាស្ត្រដ៏ចំណាស់មួយក្នុងតំបន់ និងពោរពេញទៅដោយសក្តានុពលសេដ្ឋកិច្ច និងទេសចរណ៍។ តាំងពីបើកទ្វារភ្លាម មានមនុស្សជាច្រើនបានមកឈរតម្រង់ជួរចាំចូលទស្សនាពន្លារជាតិខ្មែរ ដែលគិតមកទល់នឹងដើមខែតុលា មានមនុស្សជាងមួយលានពីរសែននាក់ហើយ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ