ពិព័រណ៍សកលឆ្នាំ២០១៥ ឧទ្ទិសជាលើកដំបូងដល់បរិស្ថាន និងស្បៀងអាហារ
ពិព័រណ៍សកលឆ្នាំ២០១៥ បានបើកទ្វារជាផ្លូវការ នៅថ្ងៃសុក្រទី ១ ឧសភា នេះ រហូតដល់ថ្ងៃទី ៣១ តុលា ដោយសង្ឃឹមថានឹងមានមនុស្សម្នាចូលទស្សនា ជាង២០លាននាក់។ ពិធីកាត់ខ្សែបូបើកសម្ពោធពិព័រណ៍បានប្រព្រឹត្តទៅនៅម៉ោង១២ថ្ងៃត្រង់ម៉ោងនៅប្រទេសអ៊ីតាលី ក្រោមអធិបតីភាពលោកនាយករដ្ឋមន្ត្រីអ៊ីតាលី Matteo Renzi ម៉ាតេអូ រ៉េនហ្ស៊ី។ មានប្រទេសចំនួន ១៤៤ និងអង្គការក្រៅរដ្ឋាភិបាលដូចជាអង្គការស្បៀងអាហារនិងកសិកម្មពិភពលោក អង្គការសហប្រជាជាតិ សហភាពអឺរ៉ុប ក៏មានវត្តមានក្នុងពិធីតាំងពិព័រណ៍សកលនេះដែរ។ ប៉ុន្តែជាមួយនឹងបរិយាកាសរីករាយ ភាពតានតឹងបានមានកើតឡើងរួចស្រេចទៅហើយ។ ក្រុមបាតុករ ជានិស្សិត ជាអ្នកបរិស្ថាន បានប្រមូលផ្តុំគ្នាតាំងពីថ្ងៃ ម្សិលមិញ ដើម្បីប្រឆាំងនឹងពិព័រណ៍សកលឆ្នាំ២០១៥នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:២១
ពិព័រណ៍សកល Exposition Universelle បានរៀបចំធ្វើឡើង តាំងពីពាក់កណ្តាលសតវត្សរ៍ទី ១៩ (លើកទីមួយនៅឆ្នាំ ១៨៥១ នៅទីក្រុងឡុងដ៍) ដោយការិយាល័យពិព័រណ៍អន្តរជាតិ ដើម្បីបង្ហាញអំពីការអភិវឌ្ឍន៍ឧស្សាហកម្ម និងបច្ចេកវិទ្យា ដែលប្រទេសនីមួយសម្រេចបាន ក្នុងសម័យបដិវត្តឧស្សាហកម្ម។ ទីលានពិព័រណ៍ គឺកន្លែងប្រកួតប្រជែង និងដណ្តើម ស្នាដៃគ្នា យកឈ្មោះជាអ្នកល្បី។
ប្រទេសអ្នកចូលរួមនីមួយៗ មានភារៈរៀបចំផ្ទះ ពិព័រណ៍តំណាងប្រទេសខ្លួនដោយខ្លួនឯង ទៅតាមស្ទីលស្ថាបត្យកម្មជាតិ និងទៅតាមប្រធានបទកំណត់ដោយការិយាល័យពិព័រណ៍អន្តរជាតិ ហើយមានតែប្រទេសម្ចាស់ប៉ុណ្ណោះ ដែលអាចរក្សាសំណង់ឬផ្ទះពិព័រណ៍របស់ខ្លួនបាន។ ជាក់ស្តែងTour Eiffel ត្រូវបានបារាំងសាងសង់ឡើង នាឱកាសពិព័រណ៍សកលក្រុងប៉ារីសឆ្នាំ១៨៨៩ (ខួប១០០ឆ្នាំនៃបដិវត្តបារាំង)។ ដើម្បីបង្ហួតពីការអភិវឌ្ឍន៍ឧស្សាហកម្មនិងបច្ចេកវិទ្យា បារាំងបានសាងសង់ស្ថាបត្យកម្មធ្វើដែក យ៉ាងច្រើន។ Tour Eiffel ក៏ត្រូវបានជាប់ឈ្មោះជាសំណង់ដែលគេខ្ពស់ជាងគេបំផុតនៅលើពិភពលោក នៅសម័យនោះ មានបីជាន់ និងជណ្តើរឡើង ១៧១០កាំ។
វិធាននៃពិព័រណ៍ ត្រូវបានកែសម្រួល ធ្វើវិសោធនកម្ម ជាបន្តបន្ទាប់ ប៉ុន្តែកម្មវត្ថុដ៏សំខាន់នៃត្រូវបានរក្សាទុកដដែល គឺតាំងពិព័រណ៍ដើម្បីផ្តល់ព័ត៌មានដល់សាធារណជន បង្ហាញអំពីមធ្យោបាយដែលមនុស្សលោកអាចធ្វើបាន និងទស្សនវិស័យសម្រាប់ថ្ងៃអនាគត។ ពិព័រណ៍សកលត្រូវចូលរួម និងរៀបចំធ្វើ នៅគ្រប់ប្រទេសលើភពផែនដី ក្នុងប្រធានបទដែលមានអត្ថន័យ មានប្រយោជន៍សម្រាប់មនុស្សជាតិទូទៅ។ ហើយតាំងពីឆ្នាំ១៩៩៥មក ពិព័រណ៍សកលនេះត្រូវប្រព្រឹត្តទៅជារៀងរាល់៥ឆ្នាំម្តង និងមានរយៈពេលយ៉ាងយូរ ៦ខែ។ ពិព័រណ៍សកលលើកមុនប្រព្រឹត្តនៅក្រុងសៀងហៃប្រទេសចិន និង៥ក្រោយនៅក្រុងឌូប៉ៃ ប្រទេសអេមៀរ៉ាអារ៉ាបរួម។
ពិព័រណ៍សកលមីឡង់ និងស្បៀងអាហារ
ក្នុងផ្ទៃក្រឡា ១លានម៉ែត្រការ៉េ របស់ទីតាំងពិព័រណ៍សកល មានដាំដើមឈើ ប្រលាយទឹក មានផ្ទះពិព័រណ៍ចំនួន៨០ ដែលសាងសង់ដោយការប្រឌិតស្ថាបត្យកម្មថ្មីៗ ប្លែកៗ ស្របតាមប្រធានបទបរិស្ថាននិងចំណីអាហារ សម្រាប់ប្រកួតប្រជែងគ្នា។ ផ្ទះពិព័រណ៍អ៊ីតាលី បានផ្តល់តម្លៃដល់វប្បធម៌ និងទំនៀមទម្លាប់ជាតិ ទាក់ទងនឹងចំណីអាហារនិងគុណភាពនៃវត្ថុធាតុដើមនិងផលិតផលបញ្ចប់។ ចំណែកផ្ទះពិព័រណ៍បារាំងវិញ គោរពបានទាំងស្រុងនូវប្រធានបទបរិស្ថាន ៖ ជាសំណង់ឈើ ១០០% បណ្តុបលើគ្នា ដូចល្បែងក្មេងលេង អាចដោះ រូចសង់ឡើងវិញបាន និងដោយគ្មានឃើញស្នាមសោះ។
ពិព័រណ៍សកលមីឡង់ ពីថ្ងៃទី ១ឧសភា ដល់ថ្ងៃទី ៣១ តុលា ឧទ្ទិសទាំងស្រុងដល់បញ្ហាបរិស្ថានដែលមានទំនាក់ទំនងយ៉ាងខ្លាំងនឹងវិបត្តិស្បៀងអាហារនិងកសិកម្ម ក្រោមប្រធានបទ “ចិញ្ចឹមផែនដី ថាមពលសម្រាប់ជីវិត”។ សារដែលអ្នករៀបចំកម្មវិធីពិព័រណ៍សកលនេះ ចង់ឱ្យពិភពលោកទាំងមូល រកដំណោះស្រាយ ប្រឈមនឹងកង្វះស្បៀងអាហាររបស់ប្រជាជននៅលើលោក (៣០%)។ នៅឆ្នាំ២០៥០ នឹងមានមនុស្ស៩,៧ពាន់លាននាក់រស់នៅលើភពផែនដី ពោលគឺឡើងលើសពេលបច្ចុប្បន្ន ដល់ទៅពីរពាន់នាក់។ ដូច្នេះ ប្រឈមមុខនឹងការប្រែប្រួលអាកាសធាតុ គេត្រូវរិះរកមធ្យោបាយការពារ និងបង្កើនផលិតផលចំណីអាហារ។ តើគេត្រូវធ្វើដូចម្តេចទើបអាចធានាមនុស្សជាតិមានអាហារគ្រប់គ្រាន់ ប្រកបដោយគុណភាព និងជាយូរអង្វែងទៅ ? ត្រូវមានផលិតផលច្រើន និងប្រសើរឡើងដែលមិនប៉ះពាល់ដល់ធម្មជាតិ ដល់បរិស្ថាន។
នេះគឺជាពិព័រណ៍សកល លើកទីមួយ ដែលឧទ្ទិសជាផ្លូវការដល់សុវត្ថិភាពចំណីអាហារ និងភាពចម្រុះនៃស្បៀង។ សម្រាប់ប្រទេសដែលមានវត្តមានក្នុងគម្រោងអង្គការស្បៀងអាហារ និងកសិកម្មពិភពលោកមានជាអាទិ៍កម្ពុជា ត្រូវបង្ហាញអំពី ផលិតផលស្រូវអង្ករ កាហ្វេ ឬគ្រឿងទេស។
រឿងអាស្រូវពុករលួយ
ពិព័រណ៍សកលជាព្រឹត្តិការណ៍ថ្នាក់ពិភពលោក ដ៏សំខាន់មួយ ! ជាព្រឹត្តិការណ៍ដ៏រីករាយ អាចជួយដាស់សេដ្ឋកិច្ចឱ្យកំរើកឡើងវិញ ប៉ុន្តែអ៊ីតាលី បានប្រឈមមុខរហូតមក នឹងរឿងអាស្រូវពុករលួយ ស្ទើរដល់ថ្ងៃបើកកម្មវិធី។ អំពើពុករលួយ ក្នុងការម៉ៅធ្វើការដ្ឋាន ដែលអ្នកនយោបាយ និងមេការជាច្រើននាក់ត្រូវចាប់ខ្លួន និងដែលធ្វើឱ្យមានការយឺតយ៉ាវខ្លាំងដល់ការរៀបចំកម្មវិធី។ មានការយកចំណេញហួសហេតុ លើកម្លាំងអ្នកស្ម័គ្រចិត្ត ហើយរបៀបរៀបចំពិព័រណ៍ទៀតសោតមិនឆ្លើយតបទៅនឹងប្រធានបទសោះ ព្រោះបញ្ជីឈ្មោះអ្នកជួបឧបត្ថម្ភធំៗ សុទ្ធសឹងក្រុមហ៊ុនឧស្សាហកម្មចំណីអាហារ ដែលមិនខ្វល់អំពីគុណភាពអាហារចំពោះសុខភាព។
ហេតុដូច្នេះហើយ ទើបមាន ចលនាបាតុកម្ម នៅក្រុងមីឡង់ មុខទីតាំងពិព័រណ៍ ជារហូតមក តាំងពីម្សិលមិញមក។ ក្រុមប្រឆាំងនឹងពិព័រណ៍ មានច្រើនក្រុមច្រើនពួក ហើយខ្លះជាអ្នកការពារបរិស្ថាន ខ្លះជានិស្សិត ប៉ុន្តែក្រុមធំជាងគេមានឈ្មោះថា “No Expo”។ តាមរយៈបាតុកម្មនេះ ក្រុមNo Expo ចង់ប្រកាសប្រាប់ពិភពលោកអំពីភាពមិនប្រក្រតីមួយចំនួន។ រឿងអាស្រូវបានលេចឡើង មានពាក់ព័ន្ធតាំងពីប្លង់គំនិត ការខ្ជះខ្ជាយលុយសាធារណៈ កិច្ចសន្យាការងារ តម្លៃនៃរៀបចំពិធីនេះ (៣២០០លានអឺរ៉ូ)។ អ្នករៀបចំបាតុកម្ម ចាត់ទុកថ្ងៃសុក្រនេះ May day ដែលអាចប្រមូលគ្នាបានដល់បីម៉ឺននាក់ ដើរដង្ហែ ក្បែរក្បួនបើកកម្មវិធីពិព័រណ៍សកលផល។ អាជ្ញាធរអ៊ីតាលី បានផ្តើមរឹបអូសសម្ភារៈដូចជាម៉ាស ផាវ ជាតិផ្ទុះ ព្រមទាំងវត្ថុផ្សេងដែលអាចផលិតជាគ្រឿងផ្ទុះ... តាំងពីពីរបីថ្ងៃមុនម្ល៉េះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ