ស្ថានភាពនៅអ៊ុយក្រែនមួយសប្តាហ៍ក្រោយកិច្ចព្រមព្រៀងសន្តិភាព
ភ្លើងសង្គ្រាមនៅភាគខាងកើតអ៊ុយក្រែន ដែលបានអូសបន្លាយ តាំងពីខែមេសាឆ្នាំ២០១៤ រវាងរដ្ឋាភិបាលអ៊ុយក្រែន និង ក្រុមឧទ្ទាមផ្តាច់ទឹកដីគាំទ្រដោយរុស្ស៊ី ហាក់នៅមិនទាន់រលត់នៅឡើយ ទោះបីជាមានការចុះហត្ថលេខាឈប់បាញ់ នៅទីក្រុងមីនស្ក៍ ម្តងជាពីរដងរួចមកហើយ។ កិច្ចព្រមព្រៀងលើកចុងក្រោយ ដែលបានចុះកាលពីថ្ងៃទី ១២ កុម្ភៈ បានធ្វើឲ្យគេមានសង្ឃឹមថាកងទ័ពទាំងសងខាងនឹងដាក់អាវុធ ប៉ុន្តែផ្ទុយទៅវិញ គ្រាប់កាំភ្លើងនៅតែផ្ទុះក្នុងរយៈពេលមួយសប្តាហ៍កន្លងមកនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:០០
ថ្ងៃទី១២ ចុះហត្ថលេខាឈប់បាញ់ ថ្ងៃទី១៨ ពួកឧទ្ទាមវាយដណ្តើមបានក្រុង Delbaltseve
បើសរុបជារួមទៅ ស្ថានភាពនៅភាគខាងកើតអ៊ុយក្រែន គ្មានអ្វីបានល្អប្រសើរទេ គឺមានតែដុនដាបទៅ។ កិច្ចព្រមព្រៀងសន្តិភាព ចូលជាធរមានមិនទាន់បានស្រួលបួលផង ទាហានទាំងសងខាង បានចាប់ផ្តើម បាញ់ដាក់គ្នាទៅវិញទៅមក។ ទាហានអ៊ុយក្រែនចោទថា ខាងពួកឧទ្ទាមជាអ្នកបាញ់មុន តែពួកឧទ្ទាមថាទេ មកពីកងទ័ពអ៊ុយក្រែន ជាអ្នកបាញ់មុន។ ស្តាប់ទៅ យើងមិនដឹងថាអ្នកណាខុសអ្នកណាត្រូវទេ។
ថ្ងៃបាញ់ប្រហារគ្នាខ្លាំង គឺនៅថ្ងៃទី ១៨ កុម្ភៈ ៤ ថ្ងៃបន្ទាប់ពីកិច្ចព្រមព្រៀងសន្តិភាព ចូលជាធរមាន។ សមរភូមិធំនៅថ្ងៃនោះ គឺនៅក្រុងDebaltseve។ ទីក្រុងនេះជាទីក្រុងយុទ្ធសាស្រ្តសំខាន់ណាស់ ព្រោះជាកន្លែងតភ្ជាប់ខ្សែរថភ្លើង ធ្វើដំណើរឆ្លងកាត់ពី ក្រុង លូហ្គង់ស្ក៍ និងក្រុង ដូនែតស្ក៍។ ឥឡូវទីក្រុង នេះ ត្រូវធ្លាក់ទៅក្នុងការគ្រប់គ្រងរបស់ ពួកឧទ្ទាមផ្តាច់ទឹកដី។ ពួកឧទ្ទាមបានឡោមព័ទ្ធ ជុំវិញទីក្រុង រួចបានបាញ់កាំភ្លើងធំបន្តក់ចូល ដែលធ្វើឲ្យប្រជាជន និងទាហានរដ្ឋាភិបាលអ៊ុយក្រែន រត់ទៅណាមិនរួច។ តួលេខចំនួនអ្នកស្លាប់ នៅមិនទាន់ច្បាស់ទេ តែបើតាមអ្នកនាំពាក្យកងទ័ពអ៊ុយក្រែន ថាទាហានអ៊ុយក្រែន ៦នាក់ស្លាប់ ហើយនឹងរងរបួសជាច្រើនរយនាក់ផ្សេងទៀត។ ក្រៅពីស្លាប់និងរបួស មានទាហាន ៨១នាក់ កំពុងបាត់ខ្លួន។ ខែនេះ ជាខែ ធ្លាក់ទឹកកក ត្រជាក់ខ្លាំងណាស់នៅតំបន់នោះ ធីតា ហើយ ទាហានដែលបាត់ខ្លួន អាចនឹងស្លាប់ ដោយសារតែអាកាសធាតុត្រជាក់។ យើងឃើញថា ដូចតែលើកមុនអញ្ចឹង គឺកិច្ចព្រមព្រៀងសន្តិភាពលើកទីពីរនេះ គ្មានបានផលអ្វីទាំងអស់។
ភាគីទាំងពីរព្រមដោះដូរឈ្លើយសិកគ្នា ហើយនិងដកអាវុធធនធំ ចេញពីខ្សែត្រៀម
ភាគីទាំងពីរ បានធ្វើការផ្លាស់ប្តូរអ្នកទោសគ្នា កាលពីថ្ងៃសៅរ៍ ទី ២១ កុម្ភៈ។ ការដោះដូរឈ្លើយសិកគ្នានេះ បានធ្វើឡើងក្នុងភូមិ Jobolok នៅជួរខ្សែប្រយុទ្ធ ក្បែរក្រុង លូហ្គង់ស្ក៍។ មានទាហានអ៊ុយក្រែន ១៣៩នាក់ និង ពួកឧទ្ទាម ៥២ នាក់ ដែលត្រូវដោះដូរគ្នា។ តាមការរាយការណ៍ របស់អ្នកយកព័ត៌មានបារាំង ដែលនៅកន្លែងនោះផ្ទាល់ បានប្រាប់ថា ឈ្លើយសិកទាំងសងខាង មានសុខភាពទ្រុឌទ្រោមណាស់ អ្នកខ្លះរបួស ដើរមិនចង់រួចផង។
ទាក់ទិនទៅនឹង ការដកអាវុធធន់ធំៗ ដូចជារថក្រោះ កាំភ្លើងធំអីជាដើម ភាគីទាំងសងខាង បានចុះហត្ថលេខា នៅថ្ងៃអាទិត្យនេះ លើការព្រមព្រៀង ថានឹងដកសម្ភារៈច្បាំង ធន់ធំទាំងនេះ ចេញពីជួរខ្សែប្រយុទ្ធ។ តាមការរាយការណ៍ របស់អ្នកនាំពាក្យយោធាអ៊ុយក្រែន ប្រាប់ថា ការដកអាវុធនេះ នឹងធ្វើឡើងចាប់ពីថ្ងៃអាទិត្យនេះទៅ ហើយត្រូវចំណាយពេល ២សប្តាហ៍។ ប៉ុន្តែរហូត មកដល់ពេលនេះ គេនៅមិនទាន់ទទួលបាន ការបញ្ជាក់ពីខាងពួកឧទ្ទាមទេ ថាពិតជាចាប់ផ្តើម ដកពីថ្ងៃនេះមែន រឺក៏អត់។ សូមបញ្ជាក់ដែរថា ប៉ុន្មានខែមកនេះ ពួកឧទ្ទាម បានរុលចូលមកកាន់តែជ្រៅ ចូលទៅក្នុងដីខាង អ៊ុយក្រែន។ ដូច្នេះ កិច្ចព្រមព្រៀងក្រុងមីនស្ក៍ បានតំរូវឲ្យក្រុមឧទ្ទាម ដកអាវុធថយ ទៅខ្សែបន្ទាត់ចាស់វិញ។ ការដកអាវុធទាំងសងខាងនេះ នឹងអនុញ្ញាតឲ្យបង្កើតបាន នូវតំបន់សុវត្ថិភាពមួយ ដើម្បីឲ្យប្រជាជនឆ្លងកាត់។
អាយុជីវិតអ៊ុយក្រែន ជាល្បែងលេងកម្សាន្តរបស់រុស្ស៊ី
រុស្ស៊ី នៅខាងមុខគេធ្វើជាល្អ ប៉ុន្តែធាតុពិត នៅឯសមរភូមិឯណោះ រុស្ស៊ីនៅតែបន្តជួយពួកឧទ្ទាមដដែល។ រឿងរ៉ាវវឹកវរ រហូតដល់ថ្ងៃនេះ បើមិនមែនរុស្ស៊ីជាអ្នកញុះញង់ពួកឧទ្ទាម ប្តល់លុយ ប្តល់អាវុធ ក៏ពួកឧទ្ទាមគ្មានកំលាំងឯណា ទៅវាយកងទ័ពអ៊ុយក្រែនដែរ។ ទាំងនេះ គឺដោយសារ តែរុស្ស៊ី ចង់បញ្ចេញចង្កូមដាក់អ៊ុយក្រែន ដែលលប ចង់ទៅធ្វើកូនចៅខាងពួកសហភាពអឺរ៉ុប និងអាមេរិក។ យើងធ្លាប់បានឃើញហើយ ពីនយោបាយវាទទី ប្រហាក់ប្រហែលគ្នានេះ ដែលរុស្ស៊ីបានធ្វើដាក់ប្រទេស ហ្សកហ្ស៊ី និងប្រទេសមុលដាវី។
តាមរយៈនយោបាយ នេះ លោកពូទីន បានបញ្ឆេះចលនាពុះកញ្ជ្រោល នៅក្នុងចំណោមប្រជាជនរុស្ស៊ី ដែល សូនតួ លោភលន់ជ្រុល ចង់ឃើញអតីតសហភាពសូវៀត រស់ឡើងវិញ។ ជាក់ស្តែង យើងឃើញហើយ កាលពីម្សិលមិញ ដែលជាថ្ងៃរំលឹកខួបមួយឆ្នាំ នៃចលនាបះបោរ នៅ ទីលាន ម៉ៃដាន់ ក្នុងក្រុងគៀវ នៅក្រុងមូស្គូ ឯណោះ មានប្រជាជនរុស្ស៊ី ប្រមាណជា ៣៥០០០នាក់ បានចេញដើរតាមផ្លូវ ស្រែកជេរប្រមាថអ៊ុយក្រែន ថាឲ្យអ៊ុយក្រែនរលាយ ឆេះឲ្យអស់ទៅ។ ពាក្យទាំងនេះធ្ងន់ធ្ងរណាស់។ សម្រែកជ័យឃោស ដោយឥតមានអៀនខ្មាសទាំងនេះ វាសរបញ្ជាក់ឲ្យឃើញច្បាស់ អំពីមនោគមវិជ្ជាលោភលន់ គិតតែប្រយោជន៍ខ្លួនឯង ក្នុងខួរក្បាលរបស់ ជនជាតិរុស្ស៊ីមួយចំនួន។ ទាំងអស់នេះ នរណាជាអ្នកទំនុកបំរុង គឺពូទីន ដែលជាកំពូលមហាបុរស របស់រុស្ស៊ីបច្ចុប្បន្ន។ ដូច្នេះ យើងឃើញថា សង្រ្គាមនៅអ៊ុយក្រែន មិនងាយចប់ទេ ទោះបីមានកិច្ចព្រមព្រៀងសន្តិភាព ដប់ដងទៀតក៏ដោយ។
មួយវិញទៀត គេកំពុងព្រួយបារម្ភជាខ្លាំង ពីស្ថានភាពនៅក្រុង ម៉ារីយោប៉ូល ដែលជាក្រុងកំពង់ផែ សំខាន់របស់អ៊ុយក្រែន ជាប់នឹងតំបន់គ្រីម៉េ។ តាមការប៉ាន់ស្មាន ក្រុមឧទ្ទាម និងរដ្ឋាភិបាលរុស្ស៊ី កំពុងរៀបជើងព្រួល វាយយកទីក្រុងនេះ ក្នុងពេលឆាប់ៗនេះ។ បើសិនជាបានមែន រុស្ស៊ីនឹងអាចចេញចូល ទៅតំបន់គ្រីម៉េ តាមផ្លូវគោក បានយ៉ាងស្រួល។
ទណ្ឌកម្មសេដ្ឋកិច្ចគ្មានបានផល ប្រើអន្តរាគមន៍យោធាវិញម្តង?
បារាំង និងអាល្លឺម៉ង់ បានសំដែងការខកចិត្តយ៉ាងខ្លាំង បន្ទាប់ពីបានដំណឹង ដែលថា ពួកឧទ្ទាមបានឡោមព័ទ្ធកងទ័ពអ៊ុយក្រែន នៅក្រុង Debaltseve។ មានឮដំណឹងថា លោកប្រធានាធិបតី បារាំង រួមជាមួយ លោកស្រី អង់ហ្គេឡា មែគែល នឹងនិយាយគ្នា តាមទូរស័ព្ទ ជាមួយលោក ពូទីន ប្រធានាធិបតីរុស្ស៊ី។ ប៉ុន្តែរហូតមកដល់ពេលនេះ គេនៅមិនទាន់មានដំណឹងអ្វីទាំងអស់។ ចំណែកសហរដ្ឋអាមេរិកវិញ បានថ្កោលទោសរុស្ស៊ីជាថ្មីម្តងទៀត ថាជាអ្នកដុតកំហឹងពួកឧទ្ទាមឲ្យឆេះ ហើយជំរុញ ក្រុមនេះ ឲ្យបន្ត វាយប្រហារទៅលើកងទ័ពអ៊ុយក្រែន។
រដ្ឋាភិបាលអាមេរិក ថានឹងរិះរក វិធីដាក់ទណ្ឌកម្មបន្ថែមលើរុស្ស៊ីឲ្យកាន់តែធ្ងន់ជាងមុន។ វាល្មមដល់ពេលហើយ ដែលសហគមន៍អន្តរជាតិ ឈប់ឈរឱបដៃមើល ល្បែងមហិច្ឆិតា របស់រុស្ស៊ី តទៅទៀត។ មានអ្នកនយោបាយជាច្រើន បានអំពាវនាវ សុំឲ្យធ្វើអន្តរាគមន៍យោធា រឺក៏ផ្តល់អាវុធទៅជួយអ៊ុយក្រែន។ ការប្រើកម្លាំង ជាជម្រើសចុងក្រោយ ដែលអាចស្រោចស្រង់អ៊ុយក្រែន ពីក្រញ៉ាំរបស់រុស្ស៊ីបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ