រុស្ស៊ីផ្លាស់ប្តូរយុទ្ធសាស្រ្តទ័ពជើងទឹកដើម្បីទុកទប់ទល់នឹងអូតង់
យុទ្ធសាស្ត្រថ្មីនៃកងនាវារុស្ស៊ី ត្រូវបានលោកប្រធានាធិបតីពូទីន អនុម័ត គឺនៅចំ ទិវាកងនាវារុស្ស៊ី ដែលប្រារព្ធ នៅថ្ងៃអាទិត្យចុងក្រោយនៃខែកក្កដា ដែលឆ្នាំនេះត្រូវនឹង ថ្ងៃ ២៦ កក្កដា ចែងជាអាទិ៍អំពី ការពង្រឹង ទីតាំងយុទ្ធសាស្ត្រនៃកងនាវារុស្ស៊ី នៅសមុទ្រខ្មៅ និង ដាក់ កងនាវារុស្ស៊ី ឲ្យវត្តមានជាអចិន្ត្រៃយ៍ នៅមហាសមុទ្រអាត្លង់ទិក និង សមុទ្រ មេឌីទែរ៉ាណេ សម្រាប់ប្រឈមនឹងការវាតទី នៃបក្សសម្ព័ន្ធអូតង់ មកជិតព្រំដែនរុស្ស៊ី ការវាតទីដែលក្រុងម៉ូស្គូ ចាត់ទុកជាការ”មិនអាចទទួលយកបាន”។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
យុទ្ធសាស្ត្រថ្មីនៃកងនាវារុស្ស៊ី ត្រូវបានវិមានក្រេមឡាំង ប្រកាសជាសាធារណៈម្សិលមិញ គឺរំលងតែប៉ុន្មានខែសោះ ក្រោយពីរុស្ស៊ីបានអនុម័តយុទ្ធសាស្ត្រយោធាថ្មី ជាប្រតិកម្មទៅហើយ ទល់នឹង ការពង្រឹងសមត្ថភាពប្រយុទ្ធ របស់ សម្ព័ន្ធអាត្លង់ទិក នៅអឺរ៉ុបខាងកើត នៅក្នុងបរិបទនៃ ភាពតានតឹងមិនធ្លាប់មានដូចតាំងពី”សង្គ្រាមត្រជាក់” ចប់ទៅ រវាងក្រុងម៉ូស្គូ និង បស្ចិមលោក ដោយមកពីវិបត្តិ នៅអ៊ុយក្រែន។
យុទ្ធសាស្ត្រថ្មី ដែលមាន ៤៦ទំព័រ គូសបញ្ជាក់ពី ”លក្ខណៈ មិនអាចទទួលយកបាន សម្រាប់រុស្ស៊ី នៃគម្រោងអូតង់ រំកិលហេដ្ឋារចនាសម្ព័ន្ធរបស់ខ្លួន មកកាន់តែជិតនឹងព្រំដែនរុស្ស៊ី”។
អត្ថបទយុទ្ធសាស្ត្រនេះ តាំងគោលដៅ បំផុសបំផុល ហេដ្ឋារចនាសម្ព័ន្ធនៃកងនាវារុស្ស៊ីប្រចាំ សមុទ្រខ្មៅ នៅត្រង់ ទឹកដីគ្រីមេ - ទៀបកោះអ៊ុយក្រែន ដែលឆ្នាំមុន ត្រូវបានម៉ូស្គូភ្ជាប់ជា ខេត្តថ្មី ចំណុះសហព័ន្ធរុស្ស៊ី។ ហើយនៅតំបន់សមុទ្រខ្មៅនេះឯង ដែលយុទ្ធសាស្ត្រថ្មី ប្រមើលស្តារ ឡើងវិញ ដោយល្បឿនលឿន និងគ្រប់ជ្រុងជ្រោយ រាល់ទីតាំងយុទ្ធសាស្ត្ររបស់រុស្ស៊ី ដើម្បី សន្តិភាព និង ស្ថិរភាពនៅតំបន់។
ក្នុងយុទ្ធសាស្ត្រថ្មីនៃកងនាវារុស្ស៊ី មាននិយាយថា មូលហេតុ ដែលញ៉ាំងឲ្យរុស្ស៊ី ផ្តោតការយក ចិត្តទុកដាក់ទៅលើ សមុទ្រអាត្លង់ទិក គឺមកពី អូតង់ចេះតែវាតទីមកទិសខាងកើត បង្កើតជា គ្រោះថ្នាក់ដល់រុស្ស៊ី ម៉្លោះហើយបានជារុស្ស៊ី នឹងរក្សាវត្តមានកងនាវាខ្លួន ឲ្យបានគ្រប់គ្រាន់ នៅត្រង់តំបន់នេះ ក៏ដូចជា នៅសមុទ្រមេឌីទែរ៉ាណេ ដែលរុស្ស៊ីត្រូវតែដាក់កងនាវាខ្លួន ឲ្យ វត្តមានប្រចាំការ ជាអចិន្ត្រៃយ៍។
ស្តីអំពីសមុទ្រឧត្តរ ជាទីដែលរុស្ស៊ី បានផ្តើមជីកយកសម្បត្តិប្រេងឆៅ និងឧស្ម័នធម្មជាតិ ទៅហើយ កងនាវារុស្ស៊ី មានភារៈត្រូវធានាបន្ទាប ឲ្យចុះទាបទៅ ការគំរាមណា ដែលសណ្ឋិត នៅពីលើសន្តិសុខជាតិរុស្ស៊ី ហើយធានាឲ្យបាន នូវស្ថិរភាពយុទ្ធសាស្ត្រ។ ក្នុងន័យនេះ យុទ្ធសាស្ត្រថ្មី ប្រមើល បង្កើនចំនួនកងនាវារុស្ស៊ី ដែលប្រចាំ នៅសមុទ្រឧត្តរ។
ស្របនឹងតួលេខខែកក្កដាឆ្នាំ២០១៥នេះ បច្ចុប្បន្ន បម្រើយ៉ាងសកម្ម ក្នុងកងនាវាសហព័ន្ធរុស្ស៊ី គឺមាន នាវាចម្បាំងលើផ្ទៃទឹក ២០៩គ្រឿង បូកទាំងនាវាផ្ទុកយន្តហោះបរមាណូ និង នាវាមុជទឹក ៧២គ្រឿង ក្នុងនោះ មាន៥០គ្រឿង ជានាវាមុជទឹកបរមាណូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ