អាមេរិកគ្រោងដាក់ពង្រាយអាវុធធុនធ្ងន់នៅតាមបណ្តាប្រទេសនៅអឺរ៉ុបខាងកើត
ក្រសួងការពារជាតិអាមេរិកគ្រោងនឹងដាក់ពង្រាយអាវុធធុនធ្ងន់ នៅតាមបណ្តាប្រទេសនៅអឺរ៉ុបខាងកើត និងនៅតំបន់ជុំវិញសមុទ្របាល់ទិក ដើម្បីទុកកំញើញរុស្ស៊ី។ នេះបើយោងតាមការចុះផ្សាយរបស់កាសែត The New York Times នៅថ្ងៃអាទិត្យនេះ។ តាមគម្រោង អាវុធធុនធ្ងន់ ព្រមទាំងបរិក្ខាយោធា ដែលអាមេរិកគ្រោងបញ្ជូនទៅកាន់តំបន់អឺរ៉ុបខាងកើតនេះ គឺសម្រាប់បំពាក់ដល់ទាហានប្រយុទ្ធ ប្រមាណជា ៥ពាន់នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
បើយោងតាមកាសែត The New York Times ដែលដកស្រង់ប្រភពពីមន្រ្តីជាន់ខ្ពស់នៃក្រសួងការពារជាតិអាមេរិក គ្រឿងសព្វាវុធដែលអាមេរិកគ្រោងបញ្ជូនទៅដាក់ពង្រាយនៅអឺរ៉ុបខាងកើត រួមមានរថក្រោះ រថយន្តសម្រាប់ទាហានថ្មើរជើង ព្រមទាំងគ្រឿងសព្វាវុធធុនធ្ងន់ជាច្រើនផ្សេងទៀត ល្មមគ្រាប់គ្រាន់សម្រាប់ទាហានចំនួន ៥ពាន់នាក់។
គ្រឿងសព្វាវុធអស់ទាំងនេះនឹងត្រូវដាក់ពង្រាយនៅក្នុងប្រទេសប៉ូឡូញ រ៉ូម៉ានី ប៊ុលហ្ការី និងហុងគ្រី ព្រមទាំងប្រទេស ៣ទៀត នៅក្នុងតំបន់សមុទ្របាល់ទិក គឺលីទុយអានី ឡេតូនី និងអេស្តូនី។ ប្រទេសអស់ទាំងនេះសុទ្ធសឹងតែជាសមាជិកបក្សសម្ព័ន្ធអូតង់ ហើយកំពុងតែមានការព្រួយបារម្ភខ្លាចទទួលរងការឈ្លានពានពីសំណាក់រុស្ស៊ី ក្រោយពីគេឃើញអ្វីដែលកើតមានឡើងនៅតំបន់គ្រីមេ ប្រទេសអ៊ុយក្រែន។
គួររំឭកឡើងវិញថា នៅក្រោយពីមានផ្ទុះវិបត្តិអ៊ុយក្រែន មន្រ្តីជាន់ខ្ពស់នៅតាមបណ្តាប្រទេសនៅអឺរ៉ុបខាងកើត បានសរសេរលិខិតជាផ្លូវការ ស្នើសុំឲ្យអូតង់បញ្ជូនកងទ័ពទៅឈរជើងប្រចាំការនៅក្នុងប្រទេសរបស់ពួកគេ ដើម្បីទុកទប់ទល់នឹងអន្តរាគមន៍យោធាពីសំណាក់រុស្ស៊ី។
ក៏ប៉ុន្តែ តាមគម្រោងស្នើឡើងដោយក្រសួងការពារជាតិ អាមេរិកគ្រោងដាក់ពង្រាយតែគ្រឿងសព្វាវុធតែប៉ុណ្ណោះ ដោយមិនបញ្ជូនទាហានឲ្យទៅឈរជើងប្រចាំការ នៅអឺរ៉ុបខាងកើតនោះទេ។ យោងតាមមន្រ្តីក្រសួងការពារជាតិអាមេរិក ការដាក់ពង្រាយគ្រឿងសព្វាវុធធុនធ្ងន់ទាំងនេះ គឺធ្វើឡើង ដើម្បីរំងាប់ក្តីបារម្ភរបស់ប្រទេសសម្ព័ន្ធមិត្ត ដែលមានព្រំដែនជាប់នឹងរុស្ស៊ី ឬមានទីតាំងនៅក្បែរប្រទេសរុស្ស៊ី។ ក៏ប៉ុន្តែ គម្រោងនេះនៅមិនទាន់ទទួលភ្លើងខៀវពីសំណាក់រដ្ឋមន្រ្តីក្រសួងការពារជាតិ និងពីសំណាក់សេតវិមាននៅឡើយទេ។
អ្នកនាំពាក្យមន្ទីរប៉ង់តាហ្គោនវិញបានអះអាងនៅក្នុងសេចក្តីថ្លែងការណ៍ថា រហូតមកទល់នឹងពេលនេះ ក្រសួងនៅមិនទាន់ធ្វើសេចក្តីសម្រេចណាមួយនៅឡើយទេ ទាក់ទងនឹងការដាក់ពង្រាយគ្រឿងសព្វាវុធអស់ទាំងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ